မိူဝ်ႈၼႆႉ ဝၼ်းတီႈ 31/5/2023 ယၢမ်းၵၢင်ၼႂ် ၵူၼ်းဝၢၼ်ႈၵုင်းၼိဝ်ႉ ဢိူင်ႇၼႃးမၢင်း ဢွၼ်ၵၼ်ၶီႇထေႃႈ ပၢႆႈမႃးသွၼ်ႈဝႆႉတီႈ ၵျွင်းပၢင်ႇ ဝဵင်းလၢႆးၶႃႈ ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း တႃႇ 12 လမ်း ယွၼ်ႉသဵင်ၵွင်ႈမၢၵ်ႇလူင် တႅၵ်ႇႁိမ်းဝၢၼ်ႈ ႁဵတ်းႁႂ်ႈၵူၼ်းဝၢၼ်ႈ ဢမ်ႇႁတ်းယူႇလႄႈ ဢွၼ်ၵၼ်ပၢႆႈၶဝ်ႈဝဵင်း ဝႃႈၼႆ။

ၵူၼ်းဝဵင်းလၢႆးၶႃႈ လၢတ်ႈတီႈၽူႈတွႆႇႁွၵ်ႈဝႃႈ – “မၼ်းပဵၼ်ၼႆ ယၢမ်းၵၢင်ၶမ်ႈ၊ ၵၢင်ၶိုၼ်းၼႆႉ မၢၵ်ႇၵႆႉတႅၵ်ႇ ၸွမ်းႁိမ်း ႁွမ်းဝၢၼ်ႈလႄႈ ၵူဝ်သေ ဢွၼ်ၵၼ်ပၢႆႈဢွၵ်ႇမႃးသွၼ်ႈဝႆႉတီႈၵျွင်းပၢင်ႇၼႆႉ တင်းမူတ်း ထေႃႈ 12 လမ်း။ တီႈဝၢၼ်ႈၵုင်းၼိဝ်ႉ ယၢမ်းလဵဝ် မီးဝႆႉၵူၼ်းပႂ်ႉဝၢၼ်ႈ 8 ၵေႃႉၵူၺ်း ” – ဝႃႈၼႆ။

ဝၢၼ်ႈၵုင်းၼိဝ်ႉၼႆႉ ယူႇၼႂ်းဢိူင်ႇၼႃးမၢင်း မီးၾၢႆႇဢွၵ်ႇတဵင်း တေယၢၼ်ဝဵင်းလၢႆးၶႃႈ မွၵ်ႈ 6 လၵ်း ၼႆယဝ်ႉ။

မိူဝ်ႈႁူဝ်လိူၼ်ဢေႊပရိူဝ်ႊ 2023 ပူၼ်ႉမႃးၼႆႉၵေႃႈ ၵူၼ်းပိုၼ်ႉတီႈ တၢင်းၾၢႆႇဢွၵ်ႇဝဵင်းလၢႆးၶႃႈ ဢၼ်လႆႈပၢႆႈၽေးသိုၵ်း မႃးသွၼ်ႈဝႆႉ တီႈဝတ်ႉမုၼ်ၸဝ်ႈလႄႈ ၸွမ်းႁိူၼ်းယေး ပီႈၼွင်ႉၽႂ်မၼ်း ၼႂ်းဝဵင်းၼႆႉ ဢမ်ႇယွမ်းႁဵင် ။ ယၢမ်းလဵဝ် ပွၵ်ႈ မိူဝ်းႁိူၼ်းယေးၽွင်ႈယဝ်ႉ၊ မၢင်ၸိူဝ်းၵေႃႈ ဢမ်ႇႁတ်းပွၵ်ႈ တင်ႈၸႂ်ပွႆႇႁိူၼ်းယေး သူၼ်ႁႆႈၼႃးႁၢမ်းသေ ပၢႆႈၵႂႃႇတၢင်းမိူင်း ထႆး ၸိူဝ်းၼၼ်ႉၵေႃႈ မီးထႅင်ႈတင်းၼမ်။ လိူဝ်ၼၼ်ႉ ၸိူဝ်းၵိုတ်းဝႆႉ ၸွမ်းႁိူၼ်းယေးပီႈၼွင်ႉၽႂ်မၼ်းလႄႈ ၸွမ်းဝတ်ႉမုၼ်ၸဝ်ႈ ၼႂ်းဝဵင်းလၢႆးၶႃႈ ၸိူဝ်းၼႆႉၵေႃႈ တိုၵ်ႉၵိုတ်းဝႆႉထႅင်ႈ ၵမ်ႈၽွင်ႈယူႇ။

တႄႇဢဝ် ဝၼ်းတီႈ 11/4/2023 ၼၼ်ႉမႃး သိုၵ်း SSPP တင်း RCSS ပိုတ်းယိုဝ်းၵၼ်မႃး ႁၢဝ်ႈႁႅင်းတၢင်းၾၢႆႇဢွၵ်ႇဝဵင်း လၢႆးၶႃႈ။ ႁၢၼ်ႉတေႃႇထိုင် ယၢမ်းလဵဝ် သဵင်ၵွင်ႈတိုၵ်ႉတႅၵ်ႇယူႇ မၢင်တီႈမၢင်ပွၵ်ႈ။ ယၢမ်းလဵဝ် သိုၵ်းမၢၼ်ႈ၊ RCSS ၊ SSPP ၊ သိုၵ်းဝႃႉ ၊ ပျီႇတူႉၸိတ်ႉမၢၵ်ႇၵႅင်း၊ ပျီႇတူႉၸိတ်ႉၼႃးယၢႆးလႄႈ ပျီႇတူႉၸိတ်ႉမၢၼ်ႈပၢင်ႇ 758 ၸိူဝ်းၼႆႉ တူင်ႉ ၼိုင်ၵႂႃႇမႃး ယူႇဝႆႉ တင်းၼမ် တၢင်းၾၢႆႇဢွၵ်ႇဝဵင်း ၼႂ်းၵႄႈသဵၼ်ႈတၢင်း လၢႆးၶႃႈ – ၶူဝ်လမ်။