Saturday, June 22, 2024

ၵူၼ်းမိူင်းၵေးသီး ၶုတ်းႁၼ်မၢၵ်ႇပုမ်းၵဝ်ႇ 80 ပီ တီႈၼႂ်းၵၢတ်ႇ

Must read

ၵူၼ်းမိူင်းၵေးသီး ၶုတ်းႁၼ်မႅၼ်ႈ မၢၵ်ႇလူင်ၵဝ်ႇၵႄႇ ဢႃယုမွၵ်ႈ 80 ပီ တီႈၼႂ်းၵၢတ်ႇၵၢင်ဝဵင်း ၵူၼ်းမိူင်းတူၵ်းၸႂ်။

ၵၢတ်ႇၵေးသီး

မိူဝ်ႈဝႃး ဝၼ်းတီႈ 15/5/2023 ယၢမ်းၵၢင်ၼႂ်  ၵူၼ်းမိူင်းၵေးသီး ၶုတ်းလုၵ်းလိၼ်တႃႇႁဵတ်းၶဵင်ႇတၢင်းၶၢႆ ၼႂ်းၵၢတ်ႇသေ လႆႈႁၼ်မႅၼ်ႈ မၢၵ်ႇပုမ်းလူင်ၵဝ်ႇၵႄႇပၢၼ်ဢိင်းၵလဵတ်ႈၽွင်းငမ်းမိူင်း လုၵ်ႈၼိုင်ႈ ဢၼ်ဢႃယုမၢၵ်ႇ မီးၸမ် 80 ပီ။

- Subscription -

ၵူၼ်းၼႂ်းပိုၼ်ႉတီႈၸႄႈဝဵင်းၵေးသီးၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ၸႂ်ႈဢေႃႈ ၶဝ်ၶုတ်းလုၵ်းလိၼ်တႃႇ တေႁဵတ်းၾွင်ႇတေးသျိၼ်းတႃႇၶဵင်ႇတၢင်းၶၢႆမႂ်ႇထႅင်ႈၼႆဢေႃႈ။ၶုတ်းလိုၵ်ႉမွၵ်ႈ 3 ထတ်း ။သမ်ႉၶုတ်းႁၼ်ပႃး မၢၵ်ႇလူင်ၼႆဢေႃႈ။ၵႂႃလၢတ်ႈ ၾၢႆႇလူင်ႉလႅၼ်ႇမၢၵ်ႇမႅင်းၼႂ်းတပ်ႉမၢၼ်ႈၶူဝ်လမ် မႃးတူၺ်း ။ ၶဝ်သမ်ႉဝႃႈ ပဵၼ်မၢၵ်ႇလူင် ဢၼ်ၾင်ဝႆႉ ၸဵမ်မိူဝ်ႈပၢၼ်ဢိင်းၵလဵတ်ႈပုၼ်ႉၼႆဢေႃႈ ပဵၼ်မၢၵ်ႇ USA ” – ဝႃၼႆ။

မၢၵ်ႇလူင်ၵဝ်ႇၵႄႇ ဢၼ်ၶုတ်းႁၼ်ၼႆႉ တၢင်းယၢဝ်းမီးမွၵ်ႈ 3 ထတ်း သေ တၢင်းယႂ်ႇမီး 1 ထတ်းပၢႆၶိုင်ႈပၼ်ႇမူၼ်း ပႃးဝႆႉမိၵ်ႈ USA ၊ ဢႃယု မီးၸမ် 80 ပီ ၊ ၸွမ်းၼင်ႇၵူၼ်းမိူင်းတူၵ်းလူင်းၵၼ်သေ တေၶၢႆႉၵႂႃႇၾင်ဝႆႉၾၢႆႇၼွၵ်ႈဝဵင်းၵေးသီး ။

ၵူၼ်းၼႂ်းပိုၼ်ႉတီႈသိုပ်ႇလၢတ်ႈဝႃႈ – “ သိုၵ်းမၢၼ်ႈၶဝ်တႄႉ ဢမ်ႇဢဝ်မိူဝ်းၼင်ႇၵဝ်ႇ ၶဝ်ဝႃႈ မၢၵ်ႇၼႆႉ မၼ်းဢမ်ႇတႅၵ်ႇလႆႈယဝ်ႉၼႆလႄႈ ႁဝ်းၵေႃႈ တေဢဝ်ၵႂႃႇၾင်ဝႆႉ တၢင်းၼွၵ်ႈဝဵင်းပုၼ်ႉၼႆဢေႃႈ ” – ဝႃႈၼႆ။

ပေႃးထူပ်းႁၼ် မၢၵ်ႇမႅင်းၾင်လိၼ် ၊ ၶိူင်ႈၵွင်ႈၵၢင်ႇၸိူဝ်းၼႆႉလႄႈသင် ၶူဝ်းၶွင်ဢၼ်မေႃတႅၵ်ႇၽူင်ႉၸိူဝ်းၼႆႉလႄႈသင် ပေႃးဢမ်ႇမီးၽူႈလူင်ႉလႅၼ်ႇၼႆ ဢမ်ႇထုၵ်ႇလီ တိူဝ်ႉယိပ်း ၊ ဢမ်ႇထုၵ်ႇတီႉတွႆႇတူၺ်း ၸၢင်ႈပဵၼ်ၽေးတေႃႇသၢႆၸႂ် ၼႆ ၸုမ်းပၼ်တၢင်းႁူႉမၢၵ်ႇမႅင်း ပၼ်ၾၢင်ႉဝႆႉၼင်ႇၼႆ။

ၸွမ်းၼင်ႇသဵၼ်ႈမၢႆ ၾၢႆႇလူလွမ်လဵပ်ႈႁဵၼ်းမၢၵ်ႇမႅင်းၾင်လီမိူင်းႁူမ်ႈတုမ်(မြန်မာနိုင်ငံ မြေမြှုပ်မိုင်း စောင့်ကြည့်လေ့လာရေးအဖွဲ့) တၢင်ႇဝႆႉ မိူဝ်ႈ 2020 ၼၼ်ႉၼႆၸိုင် မီးၵူၼ်းမၢတ်ႇၸဵပ်းလူႉတၢႆယွၼ်ႉမၢၵ်ႇမႅင်း 368 ၵေႃႉသေ ၼႂ်းမိူင်းတႆးၼႆႉ ၵူၼ်းမိူင်းတိူဝ်ႉမၢတ်ႇၸဵပ်းၼမ်သုတ်း မီး 121 ၵေႃႉၼႆယဝ်ႉ။

ပေႃးတူၺ်းသဵၼ်ႈမၢႆၵူၼ်းမိူင်းယဵပ်ႇၺႃးမၢၵ်ႇမႅင်း ၸွမ်းထုင်ႉလႂ် ထုင်ႉၼၼ်ႉၼႆၸိုင် မိူင်းတႆး မီး 42 % ၊ တိူင်းၸႄႈၵႅင်း 12 % ၊ မိူင်းရၶႅင်ႇ 11 % ၊ မိူင်းၶၢင် 10 % လႄႈ မိူင်းယၢင်း 7 % သေ လႆႈဝႃႈ မိူင်းတႆး ၼမ်သုတ်းၼႆယဝ်ႉ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း