မိူဝ်ႈဝႃးဝၼ်းတီႈ 16/12/2025 ယၢမ်းၵၢင်ၶမ်ႈ 8 မူင်း ၾႆးမႆႈႁၢၼ်ႉၶၢႆသၢင်ႇၵၢၼ်း ၼႂ်းၵၢတ်ႇဝဵင်းသီႇသႅင်ႇၸိုင်ႈတႆးပွတ်းၸၢၼ်း ၵူၼ်းမိူင်းႁူမ်ႈၵၼ်ၶႄၾႆးၸင်ႇမွတ်ႇ။
ၶၢဝ်းပိူၼ်ႈပိၵ်ႉၵၢတ်ႇယဝ်ႉသေတႃႉ ၾႆးလုၵ်ႉမႆႈတီႈႁၢၼ်ႉၶၢႆ သၢင်ႇၵၢၼ်းၼၼ်ႉလႄႈ ႁဵတ်းႁႂ်ႈၵူၼ်းမိူင်း ၸဝ်ႈႁၢၼ်ႉၶၢႆၶူဝ်းၼႂ်းၵၢတ်ႇဢွၼ်ၵၼ်တူၵ်းၸႂ်း။
ၼၢင်းယိင်းၵူၼ်းပိုၼ်ႉတီႈဝဵင်းသီႇသႅင်ႇလၢတ်ႈၽူႈတွႆႇႁွၵ်ႈဝႃႈ -“ပဵၼ်ၵႂႃႇၶမ်ႈဝႃးဢေႃႈ။ ၶူဝ်းၶွင်ၼႂ်းႁၢၼ်ႉ ၸဵမ်ဢဝ် သၢင်ႇၵၢၼ်း ၊ ၶူဝ်ႉမွၵ်ႇ မေႃႈမွၵ်ႇ ၸိူဝ်းၼႆႉ ၾႆးမႆႈမူတ်း ၶဝ်ၶၢႆပႃးၶူဝ်းလႄႈ ၶူဝ်းၸိူဝ်းၼၼ်ႉၵေႃႈ ၾႆးမႆႈပႃး ၊ ၵၢတ်ႇၼႆႉမီးၵူၼ်းပႂ်ႉယူႇ ၵူၺ်းၵႃႈ မၼ်းၵႆႉမဝ်းလဝ်ႈ။ ၵူၼ်းၼႂ်းပွၵ်ႉယွမ်ႇႁိမ်းႁွမ်းၼၼ်ႉဢွၼ်ၵၼ်ၶႄ ၸင်ႇလႆႈ”- ဝႃႈၼႆ ။
ၾႆးမႆႈႁၢၼ်ႉၶၢႆသၢင်ႇၵၢၼ်းၼႆႉ ၵူၼ်းၼႂ်းၵၢတ်ႇလၢတ်ႈဝႃႈ ပလိၵ်ႈမၢၼ်ႈလၢတ်ႈ – မီးၵူၼ်း 4 ၵေႃႉ ၶဝ်ႈမႃးၽဝ်ဝႃႈၼႆသေတႃႉ- ယူႇတီႈၵူၼ်းမိူင်းသေ ၽႂ်ၵေႃႈဢမ်ႇႁၼ်သိုဝ်ႈၼႃႈတၼ်းတႃ။ ၵွပ်ႈၼၼ်လႄႈ ပဵၼ်ၽႂ်ၵေႃႈသွတ်ႇ ပဵၼ်ယွၼ်ႉသင်တႄႉတႄႉ ၼႆယူႇတီႈၽူႈတွႆႇႁွၵ်ႈတႄႉ ပႆႇယိုၼ်ယၼ်လႆႈ။
ၵူၼ်းပိုၼ်ႉတီႈတႄႉလၢတ်ႈဝႃႈ တေႃႇထိုင်မိူဝ်ႈၼႆႉၵၢင်ဝၼ်း ပလိၵ်ႈမၢၼ်ႈ သိုၵ်းမၢၼ်ႈလၢတ်ႈဝႃႈတႃႇသွၵ်ႈႁႃၵူၼ်းဢၼ်လီထၢင်ႇထိူမ်ၼႆသေ တိုၵ်ႉႁွၼ်ႈထဝ်ႇသွၵ်ႈတဝ်ၼႂ်းၵၢတ်ႇၼႂ်းဝၢၼ်ႈ ၸွမ်းၵိဝ်ႇၸွမ်းငွၼ်ႈယူႇ – ဝႃႈၼႆ။
ၼၢင်းယိင်းၵူၼ်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ ယွၼ်ႉသင်လႄႈ ၾႆးမႆႈဢမ်ႇႁူႉ ။ ပဵၼ်ၵူၼ်းၽဝ်တႄႉယူႇႁိုဝ်ၵေႃႈဢမ်ႇႁူႉ ၊ ၸမ်ပၢင်လိူၵ်ႈတင်ႈလႄႈ သၢင်ႈပၼ်ႁႃၼေၵၼ်ႁိုဝ်ၵေႃႈဢမ်ႇႁူႉ။ တလဵဝ်ၼႆႉ ပလိၵ်ႈၶဝ်ၶဝ်ႈၵူတ်ႇထတ်း ဢမ်ႇပၼ်ၵူၼ်းၼႂ်းၵၢတ်ႇ တေႃႉၶူဝ်းၶၢႆႉၶူဝ်းဢွၵ်ႇၵၢတ်ႇ ၊ မၢင်ၸိူဝ်းငိၼ်းၶၢဝ်ႇၸိူင်ႉၼၼ်သေ ဢမ်ႇႁတ်းမႃးပိုတ်ႇႁၢၼ်ႉၼႂ်းၵၢတ်ႇလူးၵွၼ်ႇ”- ဝႃႈၼႆ ။
ယွၼ်ႉၼၼ် ၼင်ႇႁိုဝ်တေလွတ်ႈၽေးၼၼ်ႉ သင်တေဢွၵ်ႇႁိူၼ်းၵႂႃႇတၢင်းၼွၵ်ႈၼႆၸိုင် ထုၵ်ႇလီ ၾၢင်ႉ မုၵ်ႉၾႆး၊ ၾႆးတဵၼ်း၊ ၾႆးၾႃႉတင်း ၾႆးသႅင်လႅတ်ႇ ၵူႈဢၼ်ဢၼ် ၼႆၸဝ်ႈႁၢၼ်ႉ ၶၢႆၵုၼ်ႇ တိုၵ်းသူၼ်း လၢတ်ႈပႃးၼင်ႇၼႆ ။
တီႈဝဵင်းသီႇသႅင်ႇၼႆႉ ပၼ်ႁႃလၵ်ႉၽဝ်ႁၢၼ်ႉၶၢႆၶူဝ်းၵၼ်ၸိူင်ႉၼႆ မိူဝ်ႈၵႃႈၵွၼ်ႇပူၼ်ႉမႃး ဢမ်ႇယၢမ်ႈ မီးမႃး သေပွၵ်ႈ။ မိူဝ်ႈပီ 2024 ၼႂ်းလိူၼ်ၾႅပ်ႉပိဝ်ႊရီႊ ၼၼ်ႉ မၢၵ်ႇၵွင်ႈလူင်တူၵ်းသႂ်ႇၵၢတ်ႇလႄႈ ၾႆးမႆႈႁၢၼ်ႉၶၢႆၶူဝ်း လူႉၵွႆၵႂႃႇတင်းၼမ်။ ထိုင်မႃးၼႂ်းပီ 2025 လိူၼ် မတ်ႉၶျ် ၵူၼ်းမိူင်းၶိုၼ်းမႄးၵုမ်းၵေႃႇသေ ပိုတ်ႇႁၢၼ်ႉၶၢႆၶူဝ်းၶိုၼ်းတေႃႇထိုင်ဝၼ်းမိူဝ်ႈၼႆႉ။
မိူၼ်ၼင်ႇၼႆၼႂ်းဝၼ်းလဵဝ်ၵူၺ်း ဝၼ်းတီႈ 16/12/2025 ယၢမ်းၵၢင်ဝၼ်း 12 မူင်းၶိုင်ႈၼၼ်ႉ သမ်ႉ ၾႆးၾႃႉသျွတ်ႉသေ ယွတ်ႈၾႆးၽုပ်ႉသႂ်ႇၵႃးတၢင်ႇၼမ်ႉမၼ်းလမ်းၼိုင်ႈလႄႈ ၾႆးသိုပ်ႇလၢမ်း မႆႈပႃး ပုင်းသႂ်ႇၼမ်ႉမၼ်း 50 ပုင်း တီႈႁၢၼ်ႉၶၢႆၼမ်ႉမၼ်းရူတ်ႉ တီႈဝဵင်းဢေးတႃႇယႃႇ ဝဵင်းတူၼ်ႈတီး။ ၵူၼ်းၸၢႆးၵေႃႉၼိုင်ႈ မၢတ်ႇၸဵပ်းႁၢဝ်ႈႁႅင်း ။
ယၢမ်းလဵဝ်တီႈဝဵင်းသီႇသႅင်ႇၼႆႉ တွၼ်ႈတႃႇပၢင်လိူၵ်ႈတင်ႈၼႆသေ ပႃႇတီႇသၢင်ႇသီႈ USDP ၊ ပႃႇတီႇ PPP ၊ လႄႈ PNO ၶဝ်ႈမႃးပူၵ်းပၢႆႉသူၼ်းတုမ် တႃႇသႂ်ႇၶႅပ်းၵၢင်ၸႂ်ပၼ်ၶဝ် – ၵူၼ်းပိုၼ်ႉတီႈလၢတ်ႈ ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ