မိူဝ်ႈၼႆႉဝၼ်းတီႈ 11/1/2026 ဝၼ်းပၢင်လိူၵ်ႈတင်ႈ ၵူၼ်းမိူင်းလွၵ်ႉၸွၵ်ႇ လႄႈ သီႇသႅင်ႇ ၸိူဝ်းၵႂႃႇပၼ်သဵင်ၵၢင်ၸႂ်ၼၼ်ႉ ႁွင်ႈၵၢၼ်ၾၢႆႇၽွင်းငမ်းၵူႈလွင်ႈလွင်ႈမႃး ၸႅၵ်ႇပၼ် ၼမ်ႉလႄႈၶဝ်ႈမုၼ်း တၢင်းၵိၼ်တၢင်းယမ်ႉဝႃႈၼႆ ။
တီႈ ၸႄႈဝဵင်းလွၵ်ႉၸွၵ်ႇၼႆႉ ႁူင်းတွတ်ႈၶႅပ်းၵၢင်ၸႂ်ႁူမ်ႈသဵင်ႈ မီး 85 ဢၼ် ။ ၵူၼ်းၵႂႃႇတွတ်ႈၶႅပ်းၵၢင်ၸႂ်ၼမ်ယူႇဝႃႈၼႆသေတႃႉ- သူၼ်ၸႂ်ပႃးၸႂ်တႄႉဢမ်ႇၸႂ်ႈ။ ၵူၺ်းၵႃႈ ယွၼ်ႉမႆႈၸႂ် ၵူဝ်ဢမ်ႇမီးလွင်ႈႁူမ်ႇလူမ်ႈလႄႈၸင်ႇၵႂႃႇဝႃႈၼႆ ။
ၵူၼ်းၵႂႃႇတွတ်ႈၶႅပ်းၵၢင်ၸႂ်တီႈဝဵင်းလွၵ်ႉၸွၵ်ႇၵေႃႉၼိုင်ႈလၢတ်ႈၽူႈတွႆႇႁွၵ်ႈဝႃႈ -“ဢွၼ်ၵၼ်ဢမ်ႇၶႂ်ႈသုၵ်ႉသၵ်ႉၸွမ်းပၼ်ႁႃဝၢႆးလင်မၼ်း ၊ တီႈႁူင်းၸၢၵ်ႈပၼ်ၶႅပ်းၵၢင်ၸႂ်ဢမ်ႇပၼ်ဢဝ်ၵႂႃႇၾူင်း ၊ ၵၢတ်ႇတႄႉဢမ်ႇၸႂ်ႉပိၵ်ႉ ၵူၺ်းဢမ်ႇမီးၵူၼ်း ၊ ၵမ်ႈၼမ်ပိူၼ်ႈလူဝ်ႇၵႂႃႇၵၢၼ်လႄႈ ဢွၼ်ၵၼ်ၵႂႃႇသႂ်ႇၸဵမ်ၸဝ်ႉ”- ဝႃႈၼႆ ။
ၵူၼ်းၵမ်ႉထႅမ်သိုၵ်းမၢၼ်ႈပိုၼ်ၽႄႈ ၶႅပ်းႁၢင်ႈ တီႈTelegram ဝႆႉဝႃႈ ၽူႈႁၢပ်ႇၵၢၼ် ႁွင်ႈၵၢၼ် ၾၢႆႇၽွင်းငမ်း ၵူႈလွင်ႈလွင်ႈ ၸႅၵ်ႇပၼ် ၼမ်ႉလႄႈ တၢင်းၵိၼ်ယႅမ်ႉ တီႈၽူႈပၼ်သဵင် တီႈႁူင်းတွတ်ႈၶႅပ်းၵၢင်ၸႂ် ၵမ်ႈၽွင်ႈ ၼႂ်းၸႄႈဝဵင်းလွၵ်ႉၸွၵ်ႇ ဝႃႈၼႆ ။
ၵဵဝ်ႇၵပ်းလွင်ႈၼႆႉ ၵူၼ်းပႂ်ႉတူၺ်းပၢင်လိူၵ်ႈတင်ႈလၢတ်ႈဝႃႈ ႁၼ်ဝႃႈ ပႃႇတီႇၵၢၼ်မိူင်းၶဝ် ဢမ်ႇလူင်းသူၼ်းတုမ်ၵမ်းသိုဝ်ႈသေတႃႉ ၼႆႉပဵၼ်လွင်ႈ ႁူၺ်းသူၼ်း ၽူႈပၼ်သဵင် ၼႂ်းဝၼ်းလိူၵ်ႈတင်ႈဢၼ်ၼိုင်ႈလႄႈ ၽိတ်းမၢႆမီႈပၢင်လိူၵ်ႈတင်ႈၵမ်းသိုဝ်ႈ ဝႃႈၼႆ ။
တီႈဝဵင်းလွၵ်ႉၸွၵ်ႇၼႆႉ ပႃႇတီႇဢၼ်ၶဝ်ႈလိူၵ်ႈတင်ႈ မီး 3 ဢၼ် ။ ပဵၼ်ပႃႇတီႇ ပႃႇတီႇသၢင်ႇသီႈ (USDP) ပႃႇတီႈပဢူဝ်း (PNO) ပႃႇတီႇထၼူႉ (DNDP) ၸိူဝ်းၼႆႉ ဝႃႈၼႆ ။
တေႃႇထိုင်ဝၢႆးဝၼ်းၼႆႉ ၼပ်ႉဢၢၼ်ႇၶႅပ်းၵၢင်ၸႂ်ပႆႇယဝ်ႉတူဝ်ႈသေတႃႉ ႁူင်းတွတ်ႈၶႅပ်းၵၢင်ၸႂ်တၢင်းဝၢၼ်ႈတႄႉပႃႇတီႇ ထၼူႉ လႆႈၶႅပ်းသဵင်ၼမ်ဝႆႉသေတႃႉ ႁူင်းတွတ်ႈၶႅပ်းၼႂ်းဝဵင်းတႄႉ သဵင်ပႃႇတီႇသၢင်ႇသီႈ ၼမ်ဝႆႉ။ ၵူၺ်းၵႃႈ ပႆႇၸၢင်ႈလၢတ်ႈလႆႈတႅတ်ႈတေႃး – ၵူၼ်းမိူင်းဝဵင်း လွၵ်ႉၸွၵ်ႇလၢတ်ႈၼင်ႇၼႆ။
မိူၼ်ၼင်ႇၼႆ တီႈဝဵင်းသီႇသႅင်ႇ ၸိုင်ႈတႆးပွတ်းၸၢၼ်းၵေႃႈ ႁွင်ႈၵၢၼ်ၾၢႆႇၽွင်းငမ်းၵူႈလွင်ႈ ၸႅၵ်ႇ ႁွင်ႈၵၢၼ်ၾၢႆႇၽွင်းငမ်းၶဝ်မႃးၸႅၵ်ႇၶဝ်ႈၼမ်ႉတၢင်းၵိၼ် ။
ၼၢင်းယိင်းၵူၼ်းဝဵင်းသီႇသႅင်ႇၵေႃႉၼိုင်ႈလၢတ်ႈၽူႈတွႆႇႁွၵ်ႈဝႃႈ -“ ၵူၼ်းၵႂႃႇတွတ်ႈၵၢင်ၼႂ်ၸဝ်ႉတႄႉ ၶဝ်ဢမ်ႇပၼ်သင် ၊ လႃႈမႃးဢိတ်ႉၵေႃႈ ၶဝ်ၸႅၵ်ႇတၢင်းၵိၼ်လႄႈ ၼမ်ႉ ၼႆ တီႈၵူၼ်းၵႂႃႇတွတ်ႈၶႅပ်းၵၢင်ၸႂ် ၊ ဢွၼ်ၵၼ်ၵႂႃႇသႂ်ႇၶႅပ်းၵၢင်ၸႂ်ၼမ်ဢေႃႈ ။ ပေႃးဢမ်ႇၵႂႃႇသႂ်ႇၼႆဢမ်ႇႁူႉဝႃႈတေပဵၼ်ၽေးၸိူင်ႉႁိုဝ်ၼေႃႈ ၵႂႃႇသႂ်ႇယဝ်ႉၵေႃႈယဝ်ႉၼႃႇ ၊ ၵႂႃႇသႂ်ႇၵၼ်ၸဝ်ႉၸဝ်ႉဢေႃႈ ဢွၼ်ၵၼ်လူဝ်ႇၵႂႃႇၵၢၼ်ႁင်းၽႂ်ႁင်းမၼ်းဢမ်ႇတၼ်းၵၼ်ၶႃႈ”- ဝႃႈၼႆ ။
ႁူင်းတွတ်ႈၶႅပ်းၵၢင်ၸႂ်တီႈဝဵင်းသီႇသႅင်ႇၼႆႉ မီး 90 ႁူင်း ။ တွၼ်ႈတႃႇတေပႂ်ႉႁူင်းၸၢၵ်ႈတွတ်ႈၶႅပ်းၵၢင်ၸႂ်ၼၼ်ႉ ဢဵၼ်ႁႅင်းမေႃသွၼ်ဢမ်ႇၵုမ်ႇထူၼ်ႈလႄႈ ၵၢင်ႉၵႄႇၶၢၼ်းၸႂ်ႉၼုမ်ႇယိင်းၼႂ်းပွၵ်ႉတႃႇၵႂႃႇပႂ်ႉ ႁူင်းတွတ်ႈၶႅပ်းၵၢင်ၸႂ် ဝႃႈၼႆ။
ပႃႇတီႇဢၼ်တေၶဝ်ႈလိူၵ်ႈတင်ႈမီးဝႆႉသၢမ်ဢၼ် ။ ပဵၼ်ပႃႇတီႇ PPP ပႃႇတီႇပဢူဝ်း PNO လႄႈ ပႃႇတီႇသၢင်ႇသီႈ USDP ။ မိူဝ်ႈၼႆႉ ဝၼ်းတွတ်ႈၶႅပ်းၵၢင်ၸႂ်ၼၼ်ႉ ပျီႇတူႉၸိတ်ႉၵူၼ်းမိူင်း လႄႈ ပလိၵ်ႈမၢၼ်ႈသိုၵ်းမၢၼ်ႈ ႁႂ်ႈၵႂႃႇဢဝ်ႁူမ်ႇလူမ်ႈပၼ်ၼႆ – ၵူၼ်းပိုၼ်ႉတီႈလၢတ်ႈၼင်ႇၼႆ ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ