ၼႂ်းၵၢင်လိူၼ်မတ်ႉၶျ်ၼႆႉ မီးၼၢင်းယိင်းဢမ်ႇႁူႉၾၢႆႇၵေႃႉၼိုင်ႈပူၵ်ႉၼႃႈပူၵ်ႉတႃႇ ၶဝ်ႈၼႂ်းႁိူၼ်း ထဝ်ႈယိင်းၵေႃႉၼိုင်ႈ ဢၼ်ယူႇၼႂ်း ပွၵ်ႉၽြႃးၽိူၵ်ႇ ဝၢၼ်ႈသၢႆးၶၢဝ် ၸႄႈဝဵင်းသီႇသႅင်ႇ ၸိုင်ႈတႆး ပွတ်းၸၢၼ်းသေ ၸူၼ်ဢဝ်ၵႂႃႇသၢႆၶေႃးၶမ်းၵႂႃႇသွင်သဵၼ်ႈ  ။

ၼၢင်းယိင်းၵေႃႉၶဝ်ႈၸူၼ်ၼၼ်ႉဢႃယုမီးမွၵ်ႈ 30 ပၢႆ ၊ ၽွင်းထဝ်ႈယိင်းမီးယူႇတီႈ ၼႂ်းႁိူၼ်း ၵေႃႉလဵဝ်ၼၼ်ႉ မၼ်းၼၢင်းၶဝ်ႈၵႂႃႇဢဝ်မိတ်ႈၸမ်ႈထဝ်ႈယိင်းသေ ၸူၼ်ဢဝ်သၢႆၶေႃးၶမ်း ၵႂႃႇ သွင်သဵၼ်ႈ ၵိုင်ႇငိုၼ်း 200 သႅၼ်ပျႃးပၢႆ  ။

ၵူၼ်းၸၢႆး ၵူၼ်းဝၢၼ်ႈသၢႆးၶၢဝ် လၢတ်ႈၽူႈတွႆႇႁွၵ်ႈဝႃႈ -“ ၶဝ်ႈၸူၼ်ၵႂႃႇ ၽွင်းမီးၵူၼ်းထဝ်ႈ ၵေႃႉလဵဝ် ၊ မႄႈထဝ်ႈၼၼ်ႉ တိုၵ်ႉၼင်ႈယူႇတီႈၼႂ်းသိုင်ႇၾႆး ၊ ၼၢင်းယိင်း ဢႃယုမွၵ်ႈ 30 ပီ ၵေႃႉၼိုင်ႈ ၶဝ်ႈၼႂ်းႁိူၼ်းသေ ဢဝ်မိတ်ႈၸမ်ႈမႄႈထဝ်ႈၼၼ်ႉယဝ်ႉ ၸူၼ်ၵႂႃႇသၢႆၶေႃးသွင်သဵၼ်ႈ  ၊ ၵတ်းၵႃႈ ဢမ်ႇႁဵတ်းႁၢႆႉၵႂႃႇမႄႈထဝ်ႈလႃႈ ၊ ၸူၼ်တေႃႈလဵဝ်ၼႆႉဢမ်ႇၸႂ်ႈဝႃႈ ပဵၼ်ၵူၼ်းမဝ်းလဝ်ႈၵိၼ်ယႃႈၵူၺ်းယဝ်ႉ ၊ ၼၢင်းယိင်းၵေႃႈ ႁတ်းႁဵတ်းမႃးယဝ်ႉ ၊ ၼႆႉပဵၼ်ၽွၼ်းယွၼ်ႈ ယွၼ်ႉပၵ်းပိူင်ၽွင်းငမ်းဝၢၼ်ႈမိူင်းဢမ်ႇလီ ၵူၼ်းမိူင်းၵေႃႈတုၵ်ႉၶ ႁႃလဵင်ႉတွင်ႉယၢပ်ႇၽိုတ်ႇၵိၼ်းၸႂ် ”- ဝႃႈၼႆ ။

ယွၼ်ႉၵၢၼ်ႁႃၵိၼ်လဵင်ႉတွင်ႉယၢပ်ႇၽိုတ်ႇမႃးၼႆႉ မီးၵူၼ်းၶဝ်ႈလၵ်ႉ သွၵ်ႈတဝ် ၼႂ်းပွၵ်ႉၼႂ်းယွမ်ႇ ရူတ်ႉၶိူင်ႈၵႆႉႁၢႆမႃးၵူႈမိုဝ်ႉၵူႈဝၼ်း သေဢမ်ႇၵႃး မီးၵူၼ်းသူႇသမ်းၵိၼ်ယႃႈ ၊ လဵၼ်ႈၵဵမ်း ဢွၼ်ႊလၢႆႊ သေ မီးၼီႈမီးၶွတ်ႇ ဢမ်ႇသၢႆႈတႅၼ်းၼီႈလႆႈၵေႃႈ မီးတင်းၼမ် ၼႆ -ၼၢင်းယိင်းၼႂ်းပိုၼ်ႉတီႈလၢတ်ႈၼင်ႇၼႆ ။

ၼၢင်းယိင်းဢႃယု 30 ပီၵေႃႉၼိုင်ႈ လၢတ်ႈၽူႈတွႆႇႁွၵ်ႈဝႃႈ – “တေႃႈလဵဝ်ၼႆႉ မီးၵူၼ်းလဵၼ်ႈၵဵမ်းဢွၼ်ႊလၢႆႊ(ကျွဲဂိမ်း) ၼမ်ၼႃႇ ၊ လဵၼ်ႈယဝ်ႉ ဢမ်ႇသၢႆႈတႅၼ်းၼီႈလႆႈၶိုၼ်း ၊ ယွၼ်ႉၼၼ် တႃႇတေလႆႈငိုၼ်းၼႆႉ လၵ်ႉၶူဝ်းၶွင် ၊ ၸူၼ် ၊ ႁဵတ်းႁၢႆႉၶႃႈႁႅမ် ၸိူဝ်းၼႆႉၵေႃႈ ႁတ်းႁဵတ်းၵူႈမဵဝ်းယဝ်ႉ ၊ ၼႂ်းၼႆႉ ပေႃးပဵၼ်ၵူၼ်းတိတ်းယႃႈၶႅၼ်းၼႃႇ ပေႃးယိၼ်ႉယႃႈၶဝ် ဢွၵ်ႇမႃးၼႆႉ ဢီႈသင်ၵေႃႈၶဝ်ႁတ်းႁဵတ်းဢေႃႈ လီၵူဝ်ႇၼႃႇ ဝၢၼ်ႈမိူင်းၼႆႉ ဢမ်ႇလီယူႇ သေဢိတ်းယဝ်ႉ”- ဝႃႈၼႆ ။  

ယွၼ်ႉၼၼ် ပေႃးဢွၵ်ႇတၢင်းၼွၵ်ႈ ယႃႇပေၵႂႃႇမႃးၵေႃႉလဵဝ် ၊ ယႃႇပေၵႂႃႇတီႈဢမ်ႇမီးၵူၼ်း၊ ၵူၼ်းၶၢတ်ႇ ၊ ၽွင်းၵႂႃႇၸွမ်းတၢင်း ပေႃးၵူၼ်းပႅၵ်ႇၼႃႈ ႁႄႉရူတ်ႉၵေႃႈ တိုၼ်းယႃႇပေၵိုတ်းပၼ် ၊ ႁႂ်ႈၾၢင်ႉၵၼ်ၵႂႃႇမႃးၼႆ -ၼၢင်းယိင်းပိုၼ်ႉတီႈပၼ်ၾၢင်ႉလၢတ်ႈၼင်ႇၼႆ ။

မိူၼ်ၼင်ႇၼႆႉၼႂ်းလိူၼ်ဢေႃးၵၢတ်ႉ ပီ 2025 ၼၼ်ႉၵေႃ မီးၵူၼ်းဢမ်ႇႁူႉၾၢႆႇၶဝ်ႈၸူၼ် ၼၢင်းယိင်းဝၢၼ်ႈသၢႆးၶၢဝ် ၊ ၽွင်းၼၼ်ႉၵေႃႈ ပႃးၵႂႃႇၶမ်းလႄႈ ငိုၼ်း 20 သႅၼ်ပျႃး ၼင်ႇၵဝ်ႇ။

ဝၢၼ်ႈသၢႆးၶၢဝ် ၼႂ်းၸႄႈဝဵင်းသီႇသႅင်ႇၼႆႉ ပဵၼ်ပိုၼ်ႉတီႈပျီႇတူႉၸိတ်ႉပဢူဝ်း PNO ၵုမ်းၵမ် ဝႆႉဝႃႈၼႆသေတႃႉ ၵဵဝ်ႇလူၺ်ႈလွင်ႈ ၽူႈလၵ်ႉၸၵ်ႉၶုတ်ႈၸိူဝ်ႈၼႆႉ ၶဝ်ပႆႇၸတ်းၵၢၼ်ပၼ် သင်လႄႈ  ႁဵတ်းႁႂ်ႈၵူၼ်းပိုၼ်ႉတီႈ ယူႇဢမ်ႇမီးလွင်ႈႁူမ်ႇလူမ်ႈ- ၵူၼ်းပိုၼ်ႉတီႈလၢတ်ႈ ။