တီႈဝဵင်းသီႇသႅင်ႇ ၸိုင်ႈတႆးပွတ်းၸၢၼ်းၼႆႉ တွၼ်ႈတႃႇတေပႂ်ႉႁူင်းၸၢၵ်ႈတွတ်ႈၶႅပ်းၵၢင်ၸႂ် ၵမ်းထီႉသွင် ၼၼ်ႉဢဵၼ်ႁႅင်းမေႃသွၼ်ဢမ်ႇၵုမ်ႇထူၼ်ႈလႄႈ ၵၢင်ႉၵႄႇၶၢၼ်းၸႂ်ႉၼုမ်ႇယိင်းၼႂ်းပွၵ်ႉတႃႇၵႂႃႇပႂ်ႉ ႁူင်းတွတ်ႈၶႅပ်းၵၢင်ၸႂ် ဝႃႈၼႆ။
ဝဵင်းသီႇသႅင်ၼႆႉတေၸတ်းပၢင်လိူၵ်ႈတင်ႈ ၼႂ်းၵမ်းထီႉသွင် ၼႂ်းဝၼ်းတီႈ 11 /1/2026 ဝၼ်းဢႃးတိတ်ႉ တေမႃးၼႆႉ ။ ယၢမ်းလဵဝ် ယူႇတီႈၾၢႆႇၶွမ်ႊမသျိၼ်ႊပၢင်လိူၵ်ႈတင်ႈ ၼႂ်းၸႄႈဝဵင်းသီႇသႅင်ႇ လႄႇလမ်း ႁႃသေႃႇသူၼ်းတႃႇသႂ်ႇၶႅပ်းၵၢင်ၸႂ်လႄႈ ပိုၼ်ၽႄႈဝႂ်ပိဝ် ၼႂ်းၵၢတ်ႇ ၸိူဝ်းၼႆႉဝႆႉ ဝႃႈၼႆ ။
ၼၢင်းယိင်းၼႂ်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ – “ တေႃႇထိုင်တလဵဝ်ႁူင်းပၼ်ၶႅပ်းၵၢင်ၸႂ်မီးတီႈလႂ်ပႆႇႁူႉ ၊ ၽႂ်ၵေႃႈဢမ်ႇသူၼ်ၸႂ် ၊ တႃႇပႂ်ႉႁူင်းၸၢၵ်ႈတွတ်ႈၶႅပ်းၵၢင်ၸႂ်ၼၼ်ႉ ဢဵၼ်ႁႅင်းမေႃသွၼ် ဢမ်ႇၵုမ်ထူၼ်ႈ လႄႈ ၵၢင်ႉၵႄႇၼႂ်းဝၢၼ်ႈ ၸႂ်ႉၼုမ်ႇယိင်းၼႂ်းပွၵ်ႉ ပၼ်ၶႅပ်းၵၢင်ၸႂ်လူင်ႈၼႃႈယဝ်ႉ တေၸႂ်ႉၵႂႃႇပႂ်ႉၸွမ်းၼႆ ၊ ၼုမ်ႇယိင်းၸိူဝ်းၼၼ်ႉ ၶဝ်ႁဵတ်းႁိုဝ်လိူၵ်ႈဝႆႉၵေႃႈ ဢမ်ႇႁူႉ ဢမ်ႇလႆႈယိၼ်းဝႃႈၶဝ်ပၼ်ပၢင်သွၼ်လွင်ႈ ၸၢၵ်ႈပၼ်သဵင်ၵၢင်ၸႂ်သေပွၵ်ႈသေၵမ်း ၊ ပေႃးၶဝ်တေၵႂႃႇပႂ်ႉၵေႃႈ တေၵႂႃႇပႂ်ႉတင်းၼွၵ်ႈမၼ်း ၸိူင်ႉၼၼ် ၵူၺ်းယူဝ်ႉထၢင်ႇတႄႉ”- ဝႃႈၼႆ ။
ဝၼ်းတေလႆႈၵႂႃႇတွတ်ႈၶႅပ်းၵၢင်ၸႂ်ၼၼ်ႉသိုၵ်းမၢၼ်ႈႁၢင်ႈႁႅၼ်းဝႆႉ ပျီႇတူႉၸိတ်ႉၵူၼ်းမိူင်း လႄႈ ပလိၵ်ႈမၢၼ်ႈသိုၵ်းမၢၼ်ႈ ႁႂ်ႈၵႂႃႇဢဝ်ႁူမ်ႇလူမ်ႈပၼ်ၼႆ – ၵူၼ်းပိုၼ်ႉတီႈလၢတ်ႈၼင်ႇၼႆ ။
မိူၼ်ၼင်ႇၼႆ မိူဝ်ႈႁၢင်လိူၼ်တီႊသႅမ်ႊပိူဝ်ႊ ပူၼ်ႉမႃးၼႆႉၵေႃႈ ပႃႇတီႇ( ၸုမ်းပျီႇတူႉၸိတ်ႉ PNO ) လူင်း ႁူၺ်းသူၼ်း ႁႃသဵင် ၼႂ်းဝဵင်းသီႇသႅင်ႇ ၸႂ်ႉသႂ်ႇၶႅပ်းၵၢင်ၸႂ် ပၼ်ၶဝ်။ ၶဝ်တေသၢင်ႈပၼ် လွင်ႈငမ်း ယဵၼ် တွၼ်ႈတႃႇ ၵူၼ်းမိူင်း ဝႃႈၼႆသေတႃႉ ၵူၼ်းမိူင်းဢမ်ႇသူၼ်ၸႂ် ၵမ်ႈၽွင်ႈယင်းလၢတ်ႈဝႃႈ တေ ဢမ်ႇၵႂႃႇ သႂ်ႇၶႅပ်းၵၢင်ၸႂ် ဝႃႈၼႆ ။
ၼၢင်းယိင်းၼႂ်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“တလဵဝ်ၼႆႉတႄႉ ၶဝ်မႃးပၼ်ဝႆႉသဵၼ်ႈမၢႆ ၵူၼ်းတေလႆႈၵႂႃႇသႂ်ႇၶႅပ်းၵၢင်ၸႂ်ၼၼ်ႉယဝ်ႉ ၊ လႆႈယိၼ်းဝႃႈ မိူဝ်ႈၽုၵ်ႈၼႆႉ ၵူၼ်းဢမ်ႇၶႅင်ႁႅင်းလႄႈတင်း ၵူၼ်းထဝ်ႈတေလႆႈၵႂႃႇသႂ်ႇၶႅပ်းၵၢင်ၸႂ်လူင်ႈၼႃႈၼႆ ၊ ဢမ်ႇပေႃးမီးၵူၼ်းသူၼ်ၸႂ်မၼ်းၼမ် ၊ ထိုင်မိူဝ်ႈၼႆႉၶဝ် ႁႃၸႅၵ်ႇၽိုၼ်လိၵ်ႈ သေႃႇသူၼ်းတႃႇၵႂႃႇသႂ်ႇပၼ်ၶႅပ်းၵၢင်ၸႂ်ဝႆႉယူႇ”– ဝႃႈၼႆ ။
တီႈသီႇသႅင်ႇၼႆႉ ပႃႇတီႇဢၼ်တေၶဝ်ႈလိူၵ်ႈတင်ႈမီးဝႆႉသၢမ်ဢၼ် ။ ပဵၼ်ပႃႇတီႇ PPP ပႃႇတီႇပဢူဝ်း PNO လႄႈ ပႃႇတီႇသၢင်ႇသီႈ USDP ။ ဝၼ်းတီႈ 11/1/2026 ဝၼ်းဢႃးတိတ်ႉတေမႃးၼႆႉ တေလႆႈၵႂႃႇသႂ်ႇၶႅပ်းၵၢင်တီႈႁူင်းႁဵၼ်း ပွၵ်ႉၽႂ်ပွၵ်ႉမၼ်းမီးၶၢဝ်ႇဝႆႉၼင်ႇၼႆၵူၺ်း ။ တီႈဝဵင်းသီႇသႅင်ၼႆႉ ႁူင်းႁဵၼ်းသွၼ်လိၵ်ႈတင်းမူတ်း မီး 6 ဢၼ် ။
ပၢင်လိူၵ်ႈတင်ႈ ၵမ်းထီႉသွင်ၼႆႉ ၸႄႈဝဵင်းၸိူဝ်းတေလႆႈၸတ်းႁဵတ်းပၢင်လိူၵ်ႈတင်ႈ ၼႂ်းမိူင်းတႆးပဵၼ် 17 ၸႄႈဝဵင်း။ မိူင်းတႆးပွတ်းၸၢၼ်း ပဵၼ်ၸႄႈဝဵင်းယႂႃႇငၢၼ်ႇ၊ ၸႄႈဝဵင်းသီႇသႅင်ႇ၊ ၸႄႈဝဵင်းၵၢတ်ႇလေႃႉ၊ ၸႄႈဝဵင်းလွၵ်ႉၸွၵ်ႇ၊ ၸႄႈဝဵင်းၵုၼ်ႁဵင်၊ ၸႄႈဝဵင်းမိူင်းပၼ်ႇ၊ ၸႄႈဝဵင်းမွၵ်ႇမႂ်ႇ၊ ၸႄႈဝဵင်းမိူင်းၵိုင် ၊ ၸႄႈဝဵင်းလၢႆးၶႃႈ ပဵၼ် 9 ၸႄႈဝဵင်း ။ ၼႂ်းမိူင်းတႆးပွတ်းဢွၵ်ႇသမ်ႉပဵၼ် ၸႄႈဝဵင်းမိူင်းၶၢၵ်ႇ၊ ၸႄႈဝဵင်းမိူင်းတူၼ်၊ ၸႄႈဝဵင်းမိူင်းယွင်း၊ ၸႄႈဝဵင်းမိူင်းယၢင်း၊ ၸႄႈဝဵင်းမိူင်းပဵင်း၊ ၸႄႈဝဵင်းမိူင်းၽျၢၵ်ႈ 6 ၸႄႈဝဵင်း။ ၼႂ်းမိူင်းတႆးပွတ်းႁွင်ႇသမ်ႉပဵၼ် ၸႄႈဝဵင်းတၢင်ႉယၢၼ်း၊ ၸႄႈဝဵင်းမိူင်းယႆ 2 ၸႄႈဝဵင်း။
လႆႈႁူႉဝႃႈ မိူဝ်ႈၽုၵ်ႈ ဝၼ်းတီႈ 8/1/2026 ၼႆႉၵူၼ်းဢမ်ႇၶႅင်ႁႅင်းလႄႈ ၵူၼ်းထဝ်ႈ ၼႂ်းၸႄႈဝဵင်းသီႇသႅင် တေလႆႈၵႂႃႇသႂ်ႇၶႅပ်းၵၢင်ၸႂ်လူင်ႈၼႃႈ တီႈႁူင်းတွတ်ႈၶႅပ်းၵၢင်ၸႂ် ဝႃႈၼႆ ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ