ၵူၼ်းပၢႆႈၽေးသိုၵ်း 159 ၵေႃႉ ဢၼ်ပၢႆႈမႃးသွၼ်ႈဝႆႉတီႈဝတ်ႉလူင် မိူင်းၼွင် ၶၢဝ်းတၢင်းၸမ်ၼိုင်ႈလိူၼ်ၼႆႉ ယၢမ်းလဵဝ် ဢွၼ်ၵၼ်ပွၵ်ႈၶိုၼ်းမူတ်းယဝ်ႉ ယွၼ်ႉပဵၼ်ၶၢဝ်းလူင်းၵၢၼ် လူဝ်ႇမိူဝ်းၽုၵ်ႇသွမ်ႈ ။  

ပူၼ်ႉမႃး မိူဝ်ႈဝၼ်းတီႈ 8/5/2023 ၼႆႉ ၵူၼ်းပၢႆႈၽေးသိုၵ်း ဝၢၼ်ႈတူင်ႈတင်း ဝၢၼ်ႈၾၢႆႇမွင်ႉ ၼႂ်းဢိူင်ႇဝၢၼ်ႈတူင်ႈ ဢၼ်ပၢႆႈမႃးသွၼ်ႈဝႆႉတီႈဝတ်ႉလူင်မိူင်းၼွင် (မင်ႇၵလႃႇယၢၼ်ႇဢွင်ႇ) တီႈဝဵင်းမိူင်းၼွင် ၸႄႈဝဵင်းၵေးသီး ၸႄႈတွၼ်ႈလွႆလႅမ် ၸိုင်ႈ တႆးပွတ်းၸၢၼ်းၼႆႉ ယၢမ်းလဵဝ် သဵင်ၵွင်ႈယဵၼ်လူင်းယဝ်ႉလႄႈ ၼႅတ်ႈဢွၼ်ၵၼ်ပွၵ်ႈ ဝၢၼ်ႈႁိူၼ်း၊ ယွၼ်ႉလူဝ်ႇပွၵ်ႈမိူဝ်းႁဵတ်းႁႆႈသူၼ်ၼႃး ဝႃႈၼႆ။

ၽူႈၸွႆႈထႅမ် ၵူၼ်းပၢႆႈၽေးသိုၵ်း ဝဵင်းမိူင်းၼွင် လၢတ်ႈတီႈၽူႈတွႆႇႁွၵ်ႈဝႃႈ – “ၵူၼ်းပၢႆႈၽေးသိုၵ်း 159 ၵေႃႉ တီႈမိူင်းၼွင် ႁဝ်းၶႃႈၼႆႉ ဢွၼ်ၵၼ်ပွၵ်ႈၶိုၼ်းႁိူၼ်း မူတ်းယဝ်ႉ။ ယွၼ်ႉပဵၼ်ၶၢဝ်း လူဝ်ႇႁဵတ်းၵၢၼ်ႁဵတ်းၵၢၼ်း။ သဵင်ၵွင်ႈတႄႉ ယဵၼ် လူင်းမႃး လႆႈ 2-3 ဝၼ်းယဝ်ႉ”- ဝႃႈၼႆ။

ၵူၼ်းပၢႆႈၽေးသိုၵ်း 159 ၵေႃႉ တီႈဝတ်ႉလူင်မိူင်းၼွင် (မင်ႇၵလႃႇယၢၼ်ႇဢွင်ႇ) ၼႆႉ ပၢႆႈမႃး မိူဝ်ႈ ဝၼ်းတီႈ 11/4/2023 ယွၼ်ႉသိုၵ်း SSPP တင်း RCSS ပိုတ်းယိုဝ်းၵၼ် ႁၢဝ်ႈႁႅင်း ။

လိူဝ်ၼၼ်ႉ ၵူၼ်းဝၢၼ်ႈပႅၵ်ႇၸပ်း ၼႂ်းဢိူင်ႇဝၢၼ်ႈတူင်ႈ ဢၼ်ပၢႆႈၵႂႃႇသွၼ်ႈဝႆႉ တၢင်းဝဵင်းလၢႆးၶႃႈၼၼ်ႉၵေႃႈ ၶိုၼ်း ဢွၼ်ၵၼ် ပွၵ်ႈမႃးႁိူၼ်းယေးၽႂ်မၼ်း မူတ်းယဝ်ႉ ဝႃႈၼႆ။

“ၵူၼ်းပၢႆႈၽေးသိုၵ်းတႄႉ ပွၵ်ႈၵၼ်မူတ်းယဝ်ႉ ၶွင်ၵိၼ်ယႅမ်ႉ ဢၼ်ပိူၼ်ႈမႃးၸွႆႈထႅမ်သေ ၵိုတ်းဝႆႉ ၸိူဝ်းၼၼ်ႉ မိူၼ်ၼင်ႇ ၶဝ်ႈ သၢၼ်၊ ၼမ်ႉမၼ်း၊ ၽၵ်းမီႇလႅင်၊ ဢႃႇလူး၊ ၵျႃႇသၢၼ်ႇ ၸိူဝ်းၼႆႉၵေႃႈ ပၼ်မိူဝ်းၸွမ်းမူတ်းမူတ်းၶႃႈ။ လွင်ႈၼႆႉ တေယူႇတီႈ ပူႇ ၵႄႇဝၢၼ်ႈၶဝ်သေ ဢဝ်ပုၼ်ႈၽွၼ်း ၸႅၵ်ႇပၼ်ၵႂႃႇၵူၺ်းၶႃႈ”- ၽူႈၸွႆႈထႅမ် ၵူၼ်းပၢႆႈၽေးသိုၵ်း ဝဵင်းမိူင်း ၼွင် သိုပ်ႇလၢတ်ႈၼႄ ၼင်ႇၼႆ။

ပၢင်တိုၵ်း RCSS – SSPP ၼႆႉ တႄႇပဵၼ်မႃး မိူဝ်ႈဝၼ်းတီႈ 11/4/2023 တၢင်းၾၢႆႇဢွၵ်ႇဝဵင်းလၢႆးၶႃႈၼၼ်ႉသေ ႁဵတ်း ႁႂ်ႈ ၵူၼ်းဝၢၼ်ႈ ၼႂ်းဢိူင်ႇဝၢၼ်ႈၸေႈ၊ ဢိူင်ႇပၢင်သၢင်း၊ ဢိူင်ႇဝၢၼ်ႈသၢင်း၊ ဢိူင်ႇဝၢၼ်ႈထီႇ၊ ဢိူင်ႇၸိၸေႃႉ၊ ဢိူင်ႇႁၢႆးသႅင်၊ ဢိူင်ႇ ၼွင်ၵေႃႈ၊ ဢိူင်ႇၼႃးပွႆး ႁူဝ်ၵူၼ်း ဢမ်ႇယွမ်းႁဵင် လႆႈပၢႆႈမႃးသွၼ်ႈဝႆႉ ၸွမ်းႁိူၼ်းယေးပီႈၼွင်ႉၽႂ်မၼ်းလႄႈ ၸွမ်းဝတ်ႉမုၼ်ၸဝ်ႈ ၼႂ်းဝဵင်းလၢႆးၶႃႈ ၸိူဝ်းၼႆႉ။

ယွၼ်ႉပၢင်တိုၵ်း တၢင်းၾၢႆႇဢွၵ်ႇဝဵင်းလၢႆၶႃႈၼႆႉသေ တုမ်ႉတိူဝ်ႉပၢင်သွၼ်ၾိင်ႈငႄႈပုတ်ႉထလႄႈ လိၵ်ႈလၢႆးတႆး ၶၢဝ်းမႆႈ 17 ပၢင် လုၵ်ႈႁဵၼ်း 478 ၵေႃႉ လႆႈၸိူင်ႉၵၢတ်ႈ ဢမ်ႇလႆႈၶဝ်ႈတွပ်ႇလိၵ်ႈ ၼႆယဝ်ႉ။