ၵဝ်ႉငဝ်ႈသုၼ်ႇလႆႈၵူၼ်း ၸိုင်ႈတႆး SHRF ၸီႉၸမ်ပိုၼ်ၽၢဝ်ႇႁႂ်ႈသိုၵ်းမၢၼ်ႈ သၢႆႈတႅၼ်းၶိုၼ်းၵူၼ်းမိူင်းၼွင်ၶဵဝ် လႆႈလူႉသုမ်း ၶူဝ်းၶွင်လႄႈသၢႆၸႂ် ယွၼ်ႉပၢင်တိုၵ်း ။
မိူဝ်ႈၼႆႉ ဝၼ်းတီႈ 9/5/2023 ယူႇတီႈ ၵဝ်ႉငဝ်ႈသုၼ်ႇလႆႈၵူၼ်း ၸိုင်ႈတႆး (SHRF) ဢွၵ်ႇၽိုၼ်တၢမ်းငဝ်းလၢႆး လွင်ႈသိုၵ်းမၢၼ်ႈ ၸႂ်ႉၵွင်ႈလူင်၊ ၶိူင်ႈမိၼ်တိုၵ်း ၼႂ်းပၢင်တိုၵ်းတင်း သိုၵ်းတဢၢင်း TNLA လႄႈၸုမ်းၵႅတ်ႇၶႄၵူၼ်းမိူင်း PDF ၼႂ်းၸႄႈဝဵင်းၼွင်ၶဵဝ် ၸႄႈ တွၼ်ႈၵျွၵ်ႉမႄး ။ ယွၼ်ႉပၢင်တိုၵ်းၼႆႉသေ ၵူၼ်းမိူင်း လႆႈလူႉတၢႆၸွမ်း 4 ၵေႃႉ ႁိူၼ်းယေး ၵူၼ်း ဝၢၼ်ႈ လူႉၵွႆၸွမ်းထႅင်ႈ တင်းၼမ်လၢႆ။
ၸၢႆးႁေႃသႅင် ၽူႈၶၢၼ်ပၢၵ်ႇ SHRF လၢတ်ႈတီႈၽူႈတွႆႇႁွၵ်ႈဝႃႈ – “ၼႆႉတႄႉ ႁဝ်းၶႃႈ ဢွၵ်ႇသၢၼ်ၶတ်းလၢႆးႁဵတ်းသိုၵ်းမၢၼ်ႈ ဢမ်ႇသုတ်ႈဢမ်ႇႁူၼ်ၶႃႈယဝ်ႉ။ ယွၼ်ႉၶဝ်သိုပ်ႇပူၼ်ႉပႅၼ်ပႄႉၵိၼ်ၵူၼ်းမိူင်းႁဝ်း၊ ဢဝ်ၵူၼ်းမိူင်းႁဝ်း ပဵၼ်ယိူဝ်ႇတၢင်ၶဝ် ၸိူဝ်း ၼႆႉ။ လွင်ႈၵူၼ်းမိူင်းလူႉတၢႆ မၢတ်ႇၸဵပ်း၊ ႁိူၼ်းယေးလူႉၵွႆၸွမ်းၶဝ် ၸိူဝ်းၼႆႉ ႁဝ်းၶႃႈ တုၵ်းယွၼ်းႁႂ်ႈၶဝ်ဢဝ်ပုၼ်ႈၽွၼ်းသၢႆႈ တႅၼ်းတၢင်ၶိုၼ်းမူတ်းမူတ်း ၵွပ်ႈၶဝ်ပဵၼ်သိုၵ်းလူင်ပွင်ၸိုင်ႈၶႃႈလူး”- ဝႃႈၼႆ။
ၼႂ်းၽိုၼ်တၢမ်းငဝ်းလၢႆး ၵဝ်ႉငဝ်ႈသုၼ်ႇလႆႈၵူၼ်း ၸိုင်ႈတႆး ဢွၵ်ႇဝႆႉတႄႉ တင်ႈတႄႇ ပၢင်တိုၵ်း သိုၵ်းမၢၼ်ႈလႄႈ ၸုမ်းၵႅတ်ႇ ၶႄၵူၼ်းမိူင်း တိူင်းဝဵင်းလိူဝ်ႇ (MDY – PDF) ပဵၼ်မႃးၼႂ်းလိူၼ်ဢေႊပရိူဝ်ႊ 2023 ၼႆႉ ၸွမ်းသဵၼ်ႈတၢင်းလူင် ပၢင်ႇဢူႈလူင် – မိူင်းၵုတ်ႈ ၼႂ်းၸႄႈဝဵင်းၼွင်ၶဵဝ်ၼၼ်ႉ သိုၵ်းမၢၼ်ႈ ၸႂ်ႉၶိူင်ႈမိၼ်သိုၵ်းယိုဝ်းလူင်းၸွမ်းပိုၼ်ႉတီႈ ဝၢၼ်ႈၵူၼ်းမိူင်းယူႇသဝ်းလႄႈ ႁဵတ်းႁႂ်ႈၵူၼ်းဝၢၼ်ႈ လူႉတၢႆ 4 ၵေႃႉ။ ၼႂ်းၼၼ်ႉ ပႃးတင်း လုၵ်ႈဢွၼ်ႇ သွင်ၵေႃႉ ။ ႁိူၼ်းယေး ၵူၼ်းဝၢၼ်ႈ လူႉၵွႆၼပ်ႉႁူဝ်သိပ်း။ သိုၵ်းမၢၼ်ႈ တီႉၺွပ်း ႁူဝ်ၼႃႈ ၵူၼ်းဝၢၼ်ႈထႅင်ႈ သွင်ၵေႃႉ။ ၵေႃႉၼိုင်ႈပႃး ၸွမ်းလုၵ်ႈမေး လႄႈ ၵူၼ်းဝၢၼ်ႈထႅင်ႈႁႃႈၵေႃႉ မၢတ်ႇၸဵပ်း ယွၼ်ႉမၢၵ်ႇၾင်လိၼ် ဝႃႈၼႆ။
ပၢင်တိုၵ်းယႂ်ႇလူင်သိုပ်ႇလၢမ်းၸွမ်းဢိူင်ႇဝၢၼ်ႈ တၢၼ်ႇပူဝ်ႇ၊ ၵုင်းၵျီးလႄႈ ႁူဝ်ၶူဝ် ႁူမ်ႈပႃးတင်း လၢႆလၢႆဝၢၼ်ႈ ၸိူဝ်းယူႇႁိမ်း ႁွမ်း ၼႂ်းၸႄႈဝဵင်းၼွင်ၶဵဝ်။ ၼႂ်းၵႄႈဝၼ်းတီႈ 6-20/4/2023 ၼၼ်ႉ သိုၵ်းမၢၼ်ႈ ဢဝ်ၶိူင်ႈမိၼ် တိုၵ်းယိုဝ်းလူင်းၼႂ်းပိုၼ်ႉတီႈ မွၵ်ႈ 30 ပွၵ်ႈပၢႆ၊ ႁိူၼ်းယေး 9 လင်လူႉၵွႆ ပဵၼ်ၼႂ်းဝၢၼ်ႈၵုင်းၵျီးလႄႈ ၼႂ်းဝၢၼ်ႈႁူဝ်ၶၢႆးသမ်ႉလူႉၵွႆ 20 လင်၊ ၶဝ်ႈၵၢပ်ႇ(ၶႄႇ) ဢၼ်ၵဵပ်းဝႆႉတႃႇၶၢႆမွၵ်ႈၶၼ်ငိုၼ်း 20 လၢၼ်ႉပျႃး ၼၼ်ႉၵေႃႈ ထုၵ်ႇၾႆးမႆႈထႅင်ႈ။
ပၢင်တိုၵ်းတႄႉ တႄႇပဵၼ်မိူဝ်ႈ ဝၼ်းတီႈ 5/4/2023 ၽွင်းသိုၵ်း မၢၼ်ႈသွၵ်ႈတဝ်မႃးၸွမ်းတၢင်းၼွင်ၶဵဝ်သေ ႁူပ်ႉၺႃး ၸုမ်း PDF ဝဵင်းလိူဝ်ႇ တီႈဝၢၼ်ႈတၢၼ်ႇပူဝ်ႇ။ သိုၵ်းမၢၼ်ႈ ဢဝ်ၵွင်ႈလူင်ယိုဝ်းၶဝ်ႈ ၼႂ်းဝၢၼ်ႈ။ ဝၼ်းၼၼ်ႉ ယၢမ်းဝၢႆးဝၼ်း 4 မူင်း မၢၵ်ႇလူင် သိုၵ်းမၢၼ်ႈ တူၵ်းသႂ်ႇ ႁိူၼ်းလင်ၼိုင်ႈသေ လုၵ်ႈဢွၼ်ႇသွင်ၵေႃႉ ၸိုဝ်ႈႁွင်ႉ ၼၢင်းမျႃႉဢေး ဢႃယု 14 ပီလႄႈ ဢွၼ်ႇၸၢႆးၸၢႆးဝႃႇဝႃႇ ဝိၼ်း ဢႃယု 11 လိူၼ် တၢႆထင်တီႈ။
ဝၼ်းၼၼ်ႉ ယၢမ်းဝၢႆးဝၼ်း 5 မူင်းသမ်ႉ သိုၵ်းမၢၼ်ႈ ဢၼ်ဢဝ်တီႈယူႇတီႈဢွင်ႈၶုတ်းမိူင် ရတၼႃႇ တဵင်ႇၵီႇၼၼ်ႉဢဝ်ၵွင်ႈ လူင်ၶဝ်ယိုဝ်းၶဝ်ႈၵႂႃႇ ၼႂ်းဝၢၼ်ႈၵုင်းၺွင်ႇမွၵ်ႈ 10 လုၵ်ႈ၊ ႁဵတ်းႁႂ်ႈဢွႆႈ ဢၼ်မီး ၼႂ်းသူၼ်ၼၼ်ႉ လုၵ်ႉပဵၼ်ၾႆး။ ၸၢၵ်ႇမၢၵ်ႇ ၼၼ်ႉ ၵႂႃႇတိူဝ်ႉၺႃး ၵူၼ်းၶၢႆတၢင်းၶၢႆ ၼိူဝ်သဵၼ်ႈတၢင်းသေ မၢတ်ႇၸဵပ်းပႃး။
မိူဝ်ႈဝၼ်းတီႈ 11/4/2023 ၶၢဝ်းယၢမ်း 8 မူင်းၵၢင်ၼႂ် သိုၵ်းမၢၼ်ႈမွၵ်ႈ 60 ၵေႃႉ ၶဝ်ႈၵႂႃႇၼႂ်းဝၢၼ်ႈဢိၼ်းမ ဢိူင်ႇႁူဝ်ၶူဝ် (ႁွင်ႇ)၊ သိုၵ်းမၢၼ်ႈပေႃႉထုပ်ႉယဝ်ႉ တိမတ်ႉ ဢဝ်ပူႇၵႄႇဝၢၼ်ႈဢိၼ်းမလႄႈ မေးၼၢင်းမၼ်း ၵႂႃႇၸွမ်းၶဝ်ယဝ်ႉၼႄးဝႃႈ ၵမ်ႉ ထႅမ်ၸုမ်း PDF။
မိူဝ်ႈဝၼ်းတီႈ 11/4/2023 ၶၢဝ်းယၢမ်း 8 ၵၢင်ၶမ်ႈသမ်ႉ ၸၢၵ်ႇမၢၵ်ႇလူင်ဢၼ်သိုၵ်းမၢၼ်ႈယိုဝ်းမႃးတၢင်း ဢွင်ႈ ၶုတ်းမိူင် ရတ ၼႃႇ တဵင်ႇၵီႇသေ ၶဝ်ႈတူၵ်းၼႂ်းဝၢၼ်ႈတၢၼ်ႇပူဝ်ႇၼၼ်ႉၵႂႃႇတိူဝ်ႉၺႃးလုင်းၸၼ်ႇတိမႃႇ ဢႃယု 70 ၵေႃႉၼိုင်ႈလုတၢႆထင်တီႈ။
ဝၼ်းတီႈ 13/4/2023 သိုၵ်းမၢၼ်ႈတိမတ်ႉ ၽူႈၵွၼ်းဢိူင်ႇ ဝၢၼ်ႈၵုင်းသႃႇ တီႈႁိူၼ်းမၼ်း။ ထိုင်မိူဝ်ႈလဵဝ် ယင်းပႆႇမီးၽႂ်လႂ်ႁူႉ ဝႃႈ ၵႂႃႇမီးၵႃႈလႂ်။ ဝၼ်းတီႈ 21/4/2023 ၶၢဝ်းယၢမ်း 4 မူင်းဝၢႆးဝၼ်း သိုၵ်းမၢၼ်ႈယိုဝ်းမၢၵ်ႇလူင်ၵႂႃႇတိူဝ်ႉၺႃးႁိူၼ်းလင်ၼိုင်ႈ ၼႂ်းဝၢၼ်ႈၵၢတ်ႇလၵ်းၵႂၢႆး (ၵလႃးၵွႆး) သေတိူဝ်ႉၺႃးဢူးၶျိတ်ႉသူၺ်ႇ ဢႃယု 52 တၢႆၸွမ်း။
မိူဝ်ႈဝၼ်းတီႈ 29/4/2023 ၶၢဝ်းယၢမ်း 11 မူင်းပွတ်းၼႂ် ၵူၼ်းဝၢၼ်ႈၼွင်ၶၢႆး ဢိူင်ႇၵုင်းၵျီး ယဵပ်ႇၺႃးမၢၵ်ႇ ၾင်လိၼ် ၽွင်း ၵႂႃႇတူၺ်းသူၼ်ဢွႆႈ လႆႈမၢတ်ႇၸဵပ်းႁၢဝ်ႈႁႅင်း။
သိုၵ်းမၢၼ်ႈၸိူဝ်းမႃး ႁူမ်ႈပၢင်တိုၵ်း ပွၵ်ႈၼႆႉ ပဵၼ်သိုၵ်းမၢၼ်ႈ ၶလယ 147 ပႃႈတႂ်ႈတိူင်းသိုၵ်းၸဵင်ႇႁွင်ႇဝၼ်းဢွၵ်ႇလႄႈ သိုၵ်း မၢၼ်ႈၶလယ 253 ၊ ၶလယ 258 ဢၼ်ယူႇပႃႈတီႈတႂ်ႈတပ်ႉၸုမ်းလူင် 101 ပႃႈတႂ်ႈတိူင်း သိုၵ်းပွတ်းၵၢင် ၵုမ်းၵမ် SHRF ဢွၵ်ႇၽိုၼ်တၢမ်းငဝ်းလၢႆးဝႆႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ