ၼၢင်းယိင်းၵူၼ်းၵျွၵ်ႉမႄးၵေႃႉၼိုင်ႈ  ပဵၼ်ၶေႃးၸဵပ်း/ယဵၼ်း ယၢပ်ႇၽိုတ်ႇတႃႇယူတ်းယႃ။

ၽူႈတူင်ႉၼိုင်ၼႂ်းၸုမ်းၸွႆႈတူင်ႇဝူင်းၵူၼ်း ဢိုမ်းတမၢဝ်း ၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ- “ မၼ်းပဵၼ်လိူဝ်ႁႅင်းဝႆႉဢေႃႈ ၵႂၢမ်းၵေႃႈ ဢမ်ႇၸၢင်ႈလၢတ်ႈလီလီယဝ်ႉ။ တေႃႈၼင်ႇ တေၵိၼ် ၼမ်ႉ ၵူၺ်းၵေႃႈ ယၢပ်ႇၼႃႇ။ မိူဝ်ႈၵူႈပွၵ်ႈတႄႉ တီႈၶေႃးမၼ်းၼႆႉ  ပဵၼ်လုၵ်ႈမၢၵ်ႇဢွၼ်ႇ လဵၵ်ႉလဵၵ်ႉၵွႆး ။ မွၵ်ႈ 4 လိူၼ်ပူၼ်ႉမႃးၼႆႉတႄႉ လိူဝ်ႁႅင်းမႃးတိၵ်းတိၵ်းၼႆဢေႃႈ ဢမ်ႇၵိၼ်သင်လႆႈလႄႈ ယွမ်ဝႃႈယွမ် ယဝ်ႉ ” –  ဝႃႈၼႆ။

 ၵေႃႉဢၼ် ပဵၼ်ၶေႃးၸဵပ်းၼႆႉ ၸိုဝ်ႈ ၼၢင်းဢၢမ် ဢႃယု 29 ပီ ။ တႄႇၼႃႈႁိူၼ်းသေ မီးလုၵ်ႈဢွၼ်ႇလဵၵ်ႉ ဢႃယု 1 ၶူပ်ႇ  ၵေႃႉၼိုင်ႈလႄႈ ဢႃယု 5 ၶူပ်ႇၵေႃႉၼိုင်ႈ ယူႇပွၵ်ႉဢိၼ်ႇၵျိၼ်း(ၸၢၼ်း) ၸႄႈဝဵင်းၵျွၵ်ႉမႄး။ မိူဝ်ႈလိူၼ်မၢတ်ႉၶျ်ပူၼ်ႉမႃးၼႆႉ ယၢမ်ႈၵႂႃႇၼႄႁူင်းယႃ တီႈဝဵင်းလိူဝ်ႇမႃးယဝ်ႉၵမ်းၼိုင်ႈ ။ မေႃယႃ ပၼ်ယႃႈယႃၵိၼ်မႃးၵူၺ်း။  ထိုင်မိူဝ်ႈလဵဝ် ဢမ်ႇႁၼ်ၸိုၼ်ႈၶႅၼ်းလႄႈ မၼ်းၼၢင်းဢၢၼ်းၶႂ်ႈၵႂႃႇ ၽႃႇတတ်း ၼႆယဝ်ႉ။

ၽူႈတူင်ႉၼိုင်ၼႂ်းၸုမ်းၸွႆႈတူင်ႇဝူင်းၵူၼ်း ဢိုမ်းတမၢဝ်းသိုပ်ႇလၢတ်ႈဝႃႈ- “ ၶဝ်ပဵၼ်ၵူၼ်းႁႃၸဝ်ႉၵိၼ်ၶမ်ႈၵူၺ်း။ ၵၢၼ်ၶၢဝ်းၼႆႉၵေႃႈ ၵိၼ်ၸၢင်ႈပိတ်းၼဵင်ႈပိူၼ်ႈၼၼ်ႉၼႃႇၼေႃ။ တႃႇတေမီးငိုၼ်း တဵမ်ထူၼ်ႈတႃႇယူတ်းယႃၵေႃႈယၢပ်ႇဢေႃႈ။ မိူဝ်ႈၵမ်းပူၼ်ႉၼၼ်ႉတႄႉ ထၢမ်တူၺ်းမေႃယႃတီႈမၢၼ်းတလေးၶဝ်ဝႃႈ ပေႃးၽႃႇတတ်းၼႆ တေသဵင်ႈငိုၼ်းမွၵ်ႈ 8 သႅၼ်ၼႆႉၼႆဢေႃႈ။ မိူဝ်ႈလဵဝ်တႄႉ တႃႇၽႃႇတတ်းတႄႉ ငိုၼ်းလႅပ်ႈပေႃးယူႇ ၵူၺ်းၼႃႇ တႃႇတေလုမ်းလႃးၵၼ် ဝၢႆးၽႃႇတတ်းၸိူဝ်းၼႆႉၵေႃႈ သမ်ႉလူဝ်ႇငိုၼ်းတွင်းယူႇၼင်ႇၵဝ်ႇၼႃႇၼေႃ ။ ၵွပ်ႈဝႃႈ မီးလုၵ်ႈဢွၼ်ႇလဵၵ်ႉ ၵၢၼ်ၵေႃႈ သမ်ႉတေဢမ်ႇၸၢင်ႈႁဵတ်းလီလီ။ ၵွပ်ႈၼႆ ပေႃးမီးၵူၼ်းမႃးၵမ်ႉမႃးၸွႆႈၵေႃႈ တေၶႅၼ်းၸႂ်ၶဝ်ၽွင်ႈယူႇၶႃႈ ” – ဝႃႈၼႆ။

မိူဝ်ႈၼႆႉ ဝၼ်းတီႈ 8/5/2023 ယၢမ်းဝၢႆးဝၼ်း ၸုမ်းၸွႆႈတူင်ႇဝူင်းၵူၼ်းဢိုမ်းတမၢဝ်း တေသူင်ႇတူဝ်ၵူၼ်းပဵၼ် ၵႂႃႇယူတ်းယႃ တီႈႁူင်းယႃလူင် ဝဵင်းလိူဝ်ႇ။မိူဝ်ႈလဵဝ် တိုၵ်ႉၽႅၼ်ယႃဝႆႉယူႇတီႈ ႁွင်ႈယႃ(သေးၶၢၼ်း) တီႈဝဵင်းၵျွၵ်ႉမႄးဝႆႉၼႆယဝ်ႉ။

သင်ၽူႈမီးၼမ်ႉၸႂ်ၵေႃႉလႂ် ၶႂ်ႈၸွႆႈၵမ်ႉငိုၼ်းတွင်းတႃႇယူတ်းယႃၵူၼ်းပဵၼ်ၼႆၸိုင် ၵပ်းသိုပ်ႇတွင်ႈထၢမ်ႁူဝ်ယွႆႈလႆႈတီႈ ႁူဝ်ပဝ်ႈ ၸုမ်းၸွႆႈတူင်ႇဝူင်းၵူၼ်းဢိုမ်းတမၢဝ်း မၢႆးသမၢႆႇရိၼ်း မၢႆၾူၼ်းတႃႇၵပ်းသိုပ်ႇလႄႈဢူၼ်းငိုၼ်းၵမ်ႉၸွႆႈ 09 445 016 761 ။