မိူဝ်ႈၼႆႉ ဝၼ်းတီႈ 30/6/2026 ယၢမ်းၵၢင်ၼႂ်ၸဝ်ႉ ၸဝ်ႈၼႃႈတီႈပလိၵ်ႈထႆး ႁွင်ႈၵၢၼ်ၾၢႆႇသၢႆႊပႃႊ ဝဵင်းမႄႈသွတ်ႈ ၸႄႈတွၼ်ႈတၢၵ်ႇ တီႉၺွပ်းဢဝ် ၼၢင်းယိင်း 2 ၵေႃႉ ဢၼ်ႁဵတ်း ၵၢၼ်တေႃႇလွင်းၼိူဝ်ဢွၼ်ႊလၢႆႊ မီးငိုၼ်းၶဝ်ႈၼိုင်ႈၵေႃႉ 30 လၢၼ်ႉၿၢတ်ႇပၢႆ ၵူႈလိူၼ်ၼၼ်ႉဝႆႉ ဝႃႈၼႆ။

ၸဝ်ႈၼႃႈတိႈပလိၵ်ႈထႆး ဝဵင်းမႄႈသွတ်ႇ ပိုၼ်ၽၢဝ်ႇဝႃႈ – ၼၢင်းယိင်း 2 ၵေႃႉ ၵူၼ်းမိူင်းမၢၼ်ႈၼၼ်ႉ ပဵၼ်ၵူၼ်းယိပ်းဝႅပ်ႉသၢႆႉၵၢၼ်တေႃႇလွင်းၼိူဝ်ဢွၼ်ႊလၢႆႊ ဢၼ်မီးၸိုဝ်ႈဝႃႈ “Las Vegas LV177” ။ ဝႅပ်ႉသၢႆႉၼၼ်ႉ ၼိုင်ႈလိူၼ်မီးငိုၼ်းၶဝ်ႈယူႇမွၵ်ႈ 70 လၢၼ်ႉၿၢတ်ႇ ပိုၼ်ၽႄႈပႃး ပၢင်ပိတ်ႉမၢၵ်ႇၼင်လုမ်ႈၾႃႉ ပီ 2026 ထႅင်ႈ” ဝႃႈၼႆ။

လႆႈႁူႉဝႃႈ ယၢမ်းလဵဝ် ၾၢႆႇၸဝ်ႈၼႃႈတီႈပလိၵ်ႈထႆးၶဝ် ယိုတ်းဢဝ်ဝႆႉ ၶွမ်ႊပိဝ်ႊတိူဝ်ႊ၊ ၾူၼ်းမိုဝ်းထိုဝ်၊ ipad ၊ ငိုၼ်းထႆး (တူဝ်ငိုၼ်း) တႃႇ 35000 ၿၢတ်ႇ၊ ၶိူင်ႈႁွႆႈၶူဝ်းတိုဝ်း ၊ ႁုၼ်ႇႁၢင်ႈ ၽြႃး လႄႈ ပပ်ႉယေးငိုၼ်းၸဵမ်ၸိူဝ်းၼႆႉသေ သိုပ်ႇၵူတ်ႇထတ်းသဵၼ်ႈတၢင်းငိုၼ်းၶဝ်ႈငိုၼ်းဢွၵ်ႇ ၸဵမ်ၸိူဝ်းယူႇ- ဝႃႈၼႆ။

ၼၢင်းယိင်းၵူၼ်းမိူင်းမၢၼ်ႈသွင်ၵေႃႉ ၸိူဝ်းၺႃးတီႉၺွပ်းၼႆႉ ထုၵ်ႇသူင်ႇတူဝ်ၵႂႃႇဝႆႉတီႈ ႁူင်းပလိၵ်ႈဝဵင်းမႄႈသွတ်ႇသေ ပိုတ်ႇလိူင်ႈ တၢင်းၽိတ်း ၵွင်ႉၵဵဝ်ႇၸွမ်း ၵၢၼ်တေႃႇလွင်းၼိူဝ် ဢွၼ်ႊလၢႆႊ၊ တၢင်းၽိတ်းႁူၺ်းသူၼ်းႁႂ်ႈၵူၼ်းလဵၼ်ႈၵၢၼ်တေႃႇလွင်း ၸဵမ်ၸိူဝ်းၼႆႉဝႆႉ – ၼႆယဝ်ႉ။

လိူဝ်ၼၼ်ႉ ၾၢႆႇၸဝ်ႈၼႃႈတီႈပလိၵ်ႈထႆးၶဝ် တိုၵ်ႉသိုပ်ႇၸွမ်းသွၵ်ႈႁႃ ၵူၼ်းၸိူဝ်းၵဵဝ်ႇၶွင်ႈၸွမ်း၊ ၸိူဝ်းလႆႈၼမ်ႉမျၢတ်ႈၼမ်ႉတွၼ်းၸွမ်း ဝႅပ်ႉသၢႆႉ ၵၢၼ်တေႃႇလွင်းၼိူဝ်ဢွၼ်ႊလၢႆႊ ၼၼ်ႉယူႇ- ဝႃႈၼႆ။

ၼႂ်းၶၢဝ်းတၢင်း ပၢင်ပိတ်ႉမၢၵ်ႇၼင်လုမ်ႈၾႃႉ ပီ 2026 ၼႆႉ ၸဝ်ႈၼႃႈတီႈပလိၵ်ႈထႆး လႄႈ လူင်ပွင်ၸိုင်ႈထႆး ၶဝ် ၸႂ်ႉတိုဝ်း ဢေႇဢၢႆႊ (AI) သေ ၸွမ်းဢိုတ်း ၸွမ်းၺွပ်းဝႅပ်ႉသၢႆႉ ပၢင်တေႃႇလွင်းဢွၼ်ႊလၢႆႊယူႇၼႆ သိုဝ်ႇၶၢဝ်ႇထႆးၵေႃႈ ႁၢႆးငၢၼ်းဝႆႉၼင်ႇၼႆ။