သိုၵ်းမၢၼ်ႈၸႂ်ႉၶိူင်ႈမိၼ်ပွႆႇမၢၵ်ႇသႂ်ႇၼႂ်းဝၢၼ်ႈ ၸၢၵ်ႇမၢၵ်ႇတိူဝ်ႉၵူၼ်းမိူင်းၸႄႈဝဵင်းၾၢႆၶုၼ် မၢတ်ႇၸဵပ်းႁၢဝ်ႈႁႅဝ်း 3 ၵေႃႉ ၼႂ်းၼၼ်ႉပႃး လုၵ်ႈဢွၼ်ႇလဵၵ်ႉ ၵေႃႉၼိုင်ႈ။

မိူဝ်ႈဝႃးဝၼ်းတီႈ 6/5/2023 ယၢမ်းႁူဝ်ၼႂ် 3 မူင်းၶိုင်ႈၼၼ်ႉ ဢမ်ႇမီးပၢင်တိုၵ်းသိုၵ်းသိူဝ်သင်သေ သိုၵ်းမၢၼ်ႈတင်ႈၸႂ် ၸႂ်ႉၶိူင်ႈမိၼ်ပွႆႇမၢၵ်ႇသႂ်ႇ ၼႂ်းဝၢၼ်ႈလႄႈ ၵူၼ်းမိူင်းမၢတ်ႇၸဵပ်းႁၢဝ်ႈႁႅင်း 3 ၵေႃႉ ၼႂ်းၼၼ်ႉ ပႃးလုၵ်ႈဢွၼ်ႇလဵၵ်ႉ ၵေႃႉၼိုင်ႈ။

ၵူၼ်းၼႂ်းပိုၼ်ႉတီႈ ၸႄႈဝဵင်းၾၢႆၶုၼ်ၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈဢေႃႈ ပၢင်တိုၵ်းသင်ၵေႃႈဢမ်ႇပဵၼ်လႄႈ ၶဝ်ဢဝ်ၶိူင်ႈမိၼ်သေ မႃးပွႆႇမၢၵ်ႇသႂ်ႇၼႂ်းဝၢၼ်ႈဢေႃႈ။မွၵ်ႈ 3 ၵေႃႉၼႆႉယဝ်ႉ ဢၼ်မၢတ်ႇၸဵပ်းႁႅင်းတႄႉ။ ပၢႆပႃးထႅင်ႈ လုၵ်ႈဢွၼ်ႇလဵၵ်ႉ ထႅင်ႈလူးၵွၼ်ႇဢေႃႈၼၼ်ႉ” – ဝႃႈၼႆ။

လုၵ်ႈဢွၼ်ႇဢၼ်တိူဝ်ႉမၢတ်ႇၸဵပ်းၼႆႉ ဢႃယု တိုၵ်ႉမီး 10 ၶူပ်ႇ  လႆႈမႆႈၸႂ်ဝႆႉ။လိူဝ်သေ မီးၵူၼ်းမၢတ်ႇၸဵပ်းယဝ်ႉ ဢွင်ႈတီႈၵိူဝ်းယမ်ၽႃႇသႃႇၶရိတ်ႉလႄႈ လင်ႁိူၼ်းၵမ်ႈၽွင်ႈ လူႉၵွႆၸွမ်းလႆႈႁူႉၼင်ႇၼႆ။

မိူဝ်ႈဝၼ်းတီႈ 5/5/2023 ၼၼ်ႉၵေႃႈ သိုၵ်းမၢၼ်ႈၸႂ်ႉၶိူင်ႈမိၼ် ဢမ်ႇယွမ်း 4 လမ်း ပွႆႇမၢၵ်ႇဢွၼ်ႇမၢၵ်ႇလူင် တူၵ်းသႂ်ႇၼႂ်းဝၢၼ်ႈ ဢၼ်မီးၼႂ်းၵႄႈ ၾၢႆၶုၼ် – ပၢင်လွင်း ႁၢဝ်ႈႁႅင်း။

ၼႂ်းလိူၼ်ဢေႊပရိူဝ်ႊပူၼ်ႉမႃးၼႆႉၵေႃႈ သိုၵ်းမၢၼ်ႈၸႂ်ႉၶိူင်ႈမိၼ်ယိုဝ်းသႂ်ႇႁူင်းယႃသွင်းၽူၺ်း ၼႂ်းၸႄႈဝဵင်းၾၢႆၶုၼ် ဢၼ်မီးၵူၼ်းပၢႆႈၽေးသိုၵ်းမႃးပိုင်ဢိင် ယူတ်းယႃတူဝ်ဝႆႉၼၼ်ႉလႄႈ မီးၵူၼ်းပၢႆႈၽေး မၢတ်ႇၸဵပ်းတင်းၼမ် ။

သိုၵ်းမၢၼ်ႈၸႂ်ႉၶိူင်ႈမိၼ်သေ တိုၵ်းတေႃးပွႆႇမၢၵ်ႇသႂ်ႇၵူၼ်းမိူင်းၼႂ်းမိူင်းတႆးလၢႆၸႄႈဝဵင်း မိူၼ်ၼင်ႇ ပၢင်လွင်း ၊ မိူင်းပၢႆး လႄႈ ၾၢႆၶုၼ် ဢၼ်ႁၢဝ်ႈႁႅင်းတႄႉ ၵမ်ႈၼမ်ပဵၼ်ၸွမ်းလႅၼ်လိၼ် တႆး-ယၢင်းလႅင်။