ၵူၼ်းပၢႆႈၽေးသိုၵ်း တီႈဝဵင်းမိူင်းၼွင် ႁူဝ်ၵူၼ်း 175 ၵေႃႉ ႁိုင် 2 ဝူင်ႈယဝ်ႉပႆႇၸၢင်ႈပွၵ်ႈၶိုၼ်းႁိူၼ်းယေး ၼႂ်းပိုၼ်ႉတီႈ သိုၵ်းသွင်ၾၢႆႇ တိုၵ်ႉၶဵင်ႈၶႅင်ၵၢၼ်သိုၵ်းၵၼ်ယူႇ ဝႃႈၼႆ။

သိုၵ်း RCSS လႄႈ SSPP ပိုတ်းယိုဝ်းၵၼ် ၊ ၵူၼ်းဝၢၼ်ႈ ၼႂ်းဢိူင်ႇဝၢၼ်ႈတူင်ႈ ႁူဝ်ၵူၼ်း 175 ၵေႃႉ ပၢႆႈမႃးသွၼ်ႈဝႆႉ တီႈဝတ်ႉလူင် မိူင်းၼွင် (မင်ႇၵလႃႇယၢၼ်ႇဢွင်ႇ) ဝဵင်းမိူင်းၼွင် ၸႄႈဝဵင်းၵေးသီး ၸဵမ်မိူဝ်ႈဝၼ်းတီႈ 11/4/2023 ၼၼ်ႉမႃး တေႃႇထိုင်ယၢမ်းလဵဝ် ပႆႇၸၢင်ႈပွၵ်ႈႁိူၼ်းၶိုၼ်း ၊ လူဝ်ႇတၢင်းၸွႆႈထႅမ် ၶဝ်ႈၼမ်ႉတင်းၵိၼ် (ၶွင်ၵိၼ်ယႅမ်ႉ)။

ၽူႈၸွႆႈထႅမ် ၵူၼ်းပၢႆႈၽေးသိုၵ်း တီႈဝဵင်းမိူင်းၼွင် လၢတ်ႈတီႈၽူႈတွႆႇႁွၵ်ႈဝႃႈ – “ယၢမ်းလဵဝ် ဢၼ်ႁဝ်းၶႃႈ လူဝ်ႇတၢင်းၸွႆႈထႅမ် ႁႅင်းတႄႉ ပဵၼ်ၶဝ်ႈသၢၼ်၊ ၼမ်ႉမၼ်း၊ ၵိူဝ်၊ ၽွင်ဝၢၼ်လႄႈ ၽၵ်းၶဵဝ် ၸိူဝ်းၼႆႉ ပဵၼ်ပိူင်ယႂ်ႇယဝ်ႉ။ ၵူၼ်းပၢႆႈၽေး တီႈမိူင်းၼွင်ၼႆႉ မီးၶၢဝ်းတၢင်း 2 ဝူင်ႈယဝ်ႉ။ တေႃႇထိုင်ယၢမ်းလဵဝ် ပႆႇၸၢင်ႈပွၵ်ႈ ယွၼ်ႉၼႂ်းပိုၼ်ႉတီႈ သိုၵ်းတင်းသွင် ၾၢႆႇ တိုၵ်ႉမီးလွင်ႈၶဵင်ႈၶႅင်ၵၢၼ်သိုၵ်းၵၼ်ယူႇလႄႈ ၵူၼ်းမိူင်းပႆႇတမ်းၸႂ် ငဝ်းလၢႆး၊ ပႆႇႁတ်းပွၵ်ႈၵၼ်ၶႃႈဢေႃႈ”- ဝႃႈၼႆ။

ၵူၼ်းဝၢၼ်ႈ ဢၼ်ပၢႆႈမႃးသွၼ်ႈဝႆႉ တီႈဝဵင်းမိူင်းၼွင်ၼႆႉ ပဵၼ်ၵူၼ်းဝၢၼ်ႈတူင်ႈတင်း ဝၢၼ်ႈၾၢႆႇမွင်ႉ ၼႂ်းဢိူင်ႇဝၢၼ်ႈတူင်ႈ တင်း မူတ်း ႁူဝ်ၵူၼ်း 175 ၵေႃႉ။ ဢိူင်ႇဝၢၼ်ႈတူင်ႈၼႆႉ မီးၾၢႆႇၸၢၼ်း ဝဵင်းမိူင်းၼွင် ယၢၼ်ဝဵင်းမွၵ်ႈ 10 လၵ်း ။

ၼႂ်းၵူၼ်းပၢႆႈၽေးသိုၵ်းၸိူဝ်းၼႆႉ ၵမ်ႈၼမ် တေပဵၼ်ၼၢင်းယိင်း၊ ၵူၼ်းထဝ်ႈလႄႈ လုၵ်ႈဢွၼ်ႇ။ ၽူႈၸၢႆး/ ၵူၼ်း ၼုမ်ႇ ၸိူဝ်းၼႆႉသမ်ႉ ဢွၼ်ၵၼ်ပႂ်ႉႁိူၼ်း သူၼ်ႁႆႈၼႃးလႄႈ မႃႉလႃးဝူဝ်းၵႂၢႆး ၸိူဝ်းၼႆႉ ဝႃႈၼႆ။

ၼွၵ်ႈလိူဝ်ၼၼ်ႉ ၵူၼ်းပိုၼ်ႉတီႈ ၾၢႆႇဢွၵ်ႇဝဵင်းလၢႆးၶႃႈ ၸိူဝ်းၼၼ်ႉၵေႃႈ ဢွၼ်ၵၼ်ပၢႆႈၶဝ်ႈဝဵင်း မႃးသွၼ်ႈဝႆႉ ၸွမ်းဝတ်ႉၵျွင်းမုၼ် ၸဝ်ႈလႄႈ ႁိူၼ်းယေးပီႈၼွင်ႉၽႂ်မၼ်း ႁူဝ်ၵူၼ်းဢမ်ႇယွမ်း 500 ၵေႃႉ။ ယွၼ်ႉပၢင်တိုၵ်း ၼႆႉသေ ပၢင်သွၼ်ၾိင်ႈငႄႈပုတ်ႉထလႄႈ လိၵ်ႈလၢႆးတႆး ၶၢဝ်းမႆႈ ၵေႃႈလႆႈၵိုတ်းပႅတ်ႈ 13 ပၢင် လုၵ်ႈဢွၼ်ႇ 360 ပၢႆ လႆႈႁၢမ်းၵၢၼ်သွၼ်ႁဵၼ်း ၵူၼ်းပိုၼ်ႉတီႈလၢတ်ႈၼင်ႇၼႆ။

တႄႇဢဝ် ဝၼ်းတီႈ 11/4/2023 မႃးၼႆႉ သိုၵ်း SSPP တင်း သိုၵ်း RCSS ႁႅၼ်းသိုၵ်းလေႃႇတိုၵ်းၵၼ် ႁၢဝ်ႈႁႅင်း တၢင်း ၾၢႆႇဢွၵ်ႇဝဵင်းလၢႆးၶႃႈလႄႈ ႁဵတ်းႁႂ်ႈၵူၼ်းဝၢၼ်ႈ ၾၢႆႇဢွၵ်ႇဝဵင်း ဢွၼ်ၵၼ်ပၢႆႈၶဝ်ႈဝဵင်းတင်းၼမ်လၢႆ။ ႁဵတ်းႁႂ်ႈၵူၼ်းပိုၼ်ႉတီႈ ႁၢမ်းၵၢၼ်ႁၢမ်းငၢၼ်း တႃႇႁႃၵိၼ်လဵင်ႉတွင်ႉ။