သိုၵ်းမၢၼ်ႈ ၼႄးပူႇၵႄႇဝၢၼ်ႈ ၸွႆႈသိုၵ်း PDF ၼႆသေ တီႉၺွပ်း ပၼ်တူတ်ႈတၢမ်ႇ ဢဝ်ပုင်းၼမ်ႉႁွႆႈၶေႃး ပၼ်ႇ ၸွမ်းဝၢၼ်ႈယဝ်ႉၸင်ႇပွႆႇပၼ်ၶိုၼ်း တီႈၸႄႈဝဵင်းၼွင်ၶဵဝ်။

ဝၼ်းတီႈ 18/4/2023 ယၢမ်းၵၢင်ၼႂ် သိုၵ်းမၢၼ်ႈ ယိုတ်းမိူင်း ၶဝ်ႈတီႉၺွပ်း လုင်းၸၢႆးပၢၼ်းၵျႃႇ ပူႇၵႄႇဝၢၼ်ႈၼွင်လူင် ၼႂ်း ၸႄႈဝဵင်းၼွင်ၶဵဝ် ၼႄးဝႃႈ ပူႇၵႄႇႁႅမ်မူလဵင်ႉၸုမ်း PDF သေ ပၼ်တၢမ်ႇဢဝ်ပုင်းၼမ်ႉႁွႆႈၶေႃး ပၼ်ႇလဵပ်ႈၼႂ်းဝၢၼ်ႈ ယဝ်ႉၸင်ႇပွႆႇၶိုၼ်း။

ၵူၼ်းပိုၼ်ႉတီႈ ဝဵင်းၼွင်ၶဵဝ် လၢတ်ႈတီႈၽူႈတွႆႇႁွၵ်ႈဝႃႈ – “ဝၢႆးသိုၵ်း PDF ထွႆဢွၵ်ႇယဝ်ႉ သိုၵ်းမၢၼ်ႈၼႆႉ ၶဝ်ႈမႃးၼႂ်းဝၢၼ်ႈသေ တီႉၺွပ်းပူႇၵႄႇဝႆႉ ဝၼ်းပၢႆႁၢင်ႈ။ ၶဝ်ၼႄးပူႇၵႄႇႁႅမ်မူလဵင်ႉ သိုၵ်း PDF ၼႆသေ မတ်ႉမိုဝ်းပူႇၵႄႇယဝ်ႉ ဢဝ်ပုင်းၼမ်ႉႁွႆႈၶေႃး သေၸႂ်ႉလဵပ်ႈဝၢၼ်ႈ ။ လွင်ႈပေႃႉႁႅမ်တႄႉ ဢမ်ႇမီး ။ ႁိူၼ်းယေး ၵူၼ်းဝၢၼ်ႈၸိူဝ်းၼႆႉၵေႃႈ ၶဝ်သွၵ်ႈတဝ်  ၵမ်ႈၽွင်ႈဢေႃႈ”- ဝႃႈၼႆ။

လုင်းၸၢႆးပၢၼ်းၵျႃႇ ပူႇၵႄႇဝၢၼ်ႈၼွင်လူင်ၼႆႉ ထုၵ်ႇပွႆႇတူဝ် ၼႂ်းဝၼ်းတီႈ 19/4/2023 (မိူဝ်ႈဝႃး) ၶိုၼ်းယဝ်ႉ ဝႃႈၼႆ။

မိူၼ်ၼႆ ၼင်ႇၵဝ်ႇ မိူဝ်ႈဝၼ်းတီႈ 14/4/2023 ၼၼ်ႉၵေႃႈ သိုၵ်းမၢၼ်ႈ ၶဝ်ႈတီႉၺွပ်း လုင်းၸၢႆးသူၺ်ႇ ပူႇၵႄႇဝၢၼ်ႈၵုင်း ၸၢမ်။ ၼၼ်ႉၵေႃႈ ထၢင်ႇထိူမ်ဝႃႈႁႅမ်မူႇလဵင်ႉ ၸုမ်း PDF ၼႆသေ တီႉၺွပ်းၵုမ်းၶင်ဝႆႉ ၶၢဝ်းတၢင်း 5-6 ဝၼ်းသေ ၸင်ႇပွႆႇတူဝ်ၶိုၼ်း ဝႃႈၼႆ။

“သိုၵ်းမၢၼ်ႈ ၶဝ်ႈမႃးထၢမ်ပူႇၵႄႇဝႃႈ ၸွင်ႇမီးသိုၵ်းလွႆ ၊ PDF ႁႃႉ ႁိမ်းႁွမ်းၼႆႉ။ ပူႇၵႄႇတွပ်ႇဝႃႈ ဢမ်ႇမီး ယဝ်ႉၵေႃႈဝႃႈ ႁႂ်ႈငိူင်ႉ ဢွၵ်ႇပၼ်ၼႂ်းဝၢၼ်ႈႁဝ်းၶႃႈၽွင်ႈ ယွၼ်ႉႁဝ်းၶႃႈ လူဝ်ႇၶိုၼ်ႈဝတ်ႉ/ ၵျွင်း ၽွင်းသၢင်းၵျၢၼ်ႇ ၼႆႉ။ ၽိူဝ်ႇသိုၵ်းမၢၼ်ႈ ဢွၵ်ႇဝၢၼ်ႈ ၵႂႃႇတၢင်းၾၢႆႇႁွင်ႇဝၢၼ်ႈ သိုၵ်း PDF ဢၼ်မူၵ်းပႂ်ႉၸွမ်းသၼ်လွႆၾၢႆႇႁွင်ႇဝၢၼ်ႈၼၼ်ႉ ယိုဝ်းၶဝ်။ သိုၵ်းမၢၼ်ႈၼၼ်ႉ ၶိုၼ်း လႅၼ်ႈၶဝ်ႈမႃးၼႂ်းဝၢၼ်ႈ။ ဝၢႆးၼၼ်ႉ ၶဝ်ၸင်ႇၵႂႃႇတီႉပူႇၵႄႇသေ ၸႅတ်ႈထၢမ်ဝႃႈ သူႁႅမ်မူလဵင်ႉသိုၵ်း PDF ႁႃႉ ႁဝ်းႁၼ်ႁူဝ်မူ ဢိူဝ်ႈ တီႈဢၼ် ႁဝ်းၶိုၼ်ႈသိမ်းတပ်ႉၶဝ်ၼၼ်ႉ သူယႃႇပေလႅၼ် ႁဵတ်းၼႆဢေႃႈ။ ယွၼ်ႉပဵၼ်ၶၢဝ်းသၢင်းၵျၢၼ်ႇလႄႈ ၵူၼ်း ဝၢၼ်ႈၵေႃႈ ႁႅမ်ၵိၼ်ၼိူဝ်ႉမူၵၼ်၊ ၸုမ်း PDF ၵေႃႈ ၶဝ်ႁႅမ်ၵိၼ် ႁဵတ်းၼႆၵေႃႈ ပူႇၵႄႇၺႃးၺွပ်း”- ၵူၼ်းပိုၼ်ႉတီႈဝဵင်းၼွင်ၶဵဝ် သိုပ်ႇလၢတ်ႈၼင်ႇၼႆ။

ထိုင်မႃး ဝၼ်းတီႈ 19/4/2023 သိုၵ်းမၢၼ်ႈၼႆႉ ၸင်ႇပွႆႇတူဝ် လုင်းၸၢႆးသူၺ်ႇ ပူႇၵႄႇ ဝၢၼ်ႈၵုင်းၸၢမ်ၶိုၼ်း။ ယဝ်ႉၵေႃႈ သိုၵ်း မၢၼ်ႈ တင်း PDF ပဵၼ်ပၢင်တိုၵ်းၵၼ်ထႅင်ႈ တီႈဝၢၼ်ႈၵုင်းၸၢမ် ၾၢႆႇသိုၵ်း PDF ဢဝ်ၵွင်ႈလူင် ယိုဝ်းၶဝ်ႈဝၢၼ်ႈ ဢမ်ႇယွမ်း 20 လုၵ်ႈ ၾၢႆႇသိုၵ်းမၢၼ်ႈ လုၵ်ႉၼႂ်းဝၢၼ်ႈ ယိုဝ်းဢွၵ်ႇထႅင်ႈ တင်းၼမ်။

မိူဝ်ႈဝႃး ဝၼ်းတီႈ 19 ယၢမ်းႁူဝ်ၶမ်ႈ 5 မူင်း သိုၵ်းမၢၼ်ႈ ယူႇတၢင်းဝၢၼ်ႈၶျွင်းသႃႇသေ ယိုဝ်းၵွင်ႈလူင်မႃး တူၵ်းတႅၵ်ႇ ၼႂ်း ၵႄႈဝၢၼ်ႈလူင်ၶၢၼ်လႄႈ ဝၢၼ်ႈပဵင်းၼိဝ်ႉ ဢမ်ႇယွမ်း 6 လုၵ်ႈ။ ၵူၼ်းဝၢၼ်ႈလူင်ၶၢၼ် ၸိူဝ်းၵိုတ်းဝႆႉ ပႂ်ႉႁိူၼ်းယေးၵၼ် ၼၼ်ႉ ၵမ်ႈၽွင်ႈ လႆႈပၢႆႈဢွၵ်ႇဝၢၼ်ႈထႅင်ႈႁူဝ်ၵူၼ်း ဢမ်ႇယွမ်း 30 ၼႆယဝ်ႉ။

ၼွၵ်ႈလိူဝ်ၼၼ်ႉ မိူဝ်ႈဝႃး ဝၼ်းတီႈ 19/4/2023 တႄႇဢဝ် ယၢမ်းၵၢင်ၶမ်ႈ 7 မူင်း တေႃႇထိုင် မိူဝ်ႈၼႆႉ ၵၢင်ၼႂ်ၸဝ်ႉ 5 မူင်း သိုၵ်းတဢၢင်း TNLA တင်း ၸုမ်းၵႅတ်ႇၶႄၵူၼ်းမိူင်း PDF ႁူမ်ႈၵၼ် လေႃႇတိုၵ်း တပ်ႉသိုၵ်းမၢၼ်ႈ ၶလယ 501 တီႈလွႆ ၸဝ်ႈၶုၼ် ၼႂ်းၸႄႈဝဵင်းၵျွၵ်ႉမႄး။

ၵူၼ်းပိုၼ်ႉတီႈ ဝဵင်းၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ – “သိုၵ်းလွႆတင်း PDF ႁူမ်ႈၵၼ် ၶိုၼ်ႈလေႃႇတိုၵ်း သိုၵ်းမၢၼ်ႈ 501 တီႈလွႆၸဝ်ႈၶုၼ် ၾၢႆႇသိုၵ်းလွႆ တင်း PDF ဢဵၼ်ႁႅင်းၶဝ်မီးၵႃႈႁိုဝ်တႄႉ ဢမ်ႇႁူႉၶႃႈ။ ပၢင်တိုၵ်းၶဝ်ၼၼ်ႉ ၸႂ်ႉမၢၵ်ႇလူင်ယိုဝ်း 2-3  လုၵ်ႈၶႃႈဢေႃႈ။ လိူဝ်ၼၼ်ႉ လႆႈငိၼ်းသဵင်ၵွင်ႈဢွၼ်ႇၵွင်ႈၸၢၵ်ႈ ၸိူဝ်းၼႆႉ တေႃႇထိုင် မိူဝ်ႈၼႆႉ ယၢမ်းၵၢင်ၼႂ်ၸဝ်ႉမွၵ်ႈ 5 မူင်း သဵင်ၵွင်ႈၸင်ႇတေယဵၼ်”- ဝႃႈၼႆ။

ၵဵဝ်ႇလူၺ်ႈ ပၢင်တိုၵ်းၼႆႉသေ လွင်ႈမၢတ်ႇၸဵပ်းလူႉတၢႆ တင်းသွင်ၾၢႆႇတႄႉ ပႆႇႁူႉ။ လွင်ႈၵူၼ်းပိုၼ်ႉတီႈ ပၢႆႈၽေးသိုၵ်း ၵေႃႈ ပႆႇမီး ဢွင်ႈတီႈပဵၼ်ပၢင်တိုၵ်းၼၼ်ႉ မီးဝႆႉၼႂ်းဢိူင်ႇၵိဝ်ႇသႅဝ်း ယူႇဝႆႉၾၢႆႇႁွင်ႇ ဝဵင်းၵျွၵ်ႉမႄး ၼႆယဝ်ႉ။