Friday, March 29, 2024

ၵူၼ်းပၢႆႈၽေးသိုၵ်း တီႈဝဵင်းလၢႆးၶႃႈ 100 ပၢႆ ပႆႇၸၢင်ႈပွၵ်ႈၶိုၼ်း ႁိူၼ်းယေးၽႂ်မၼ်း

Must read

ၵူၼ်းပၢႆႈၽေးသိုၵ်း ဢၼ်ပၢႆႈမႃးသွၼ်ႈယူႇဝႆႉ တီႈဝတ်ႉဝႃႇသူဝ်ႇလႄႈ ဝတ်ႉ/ ၵျွင်းၶမ်း ႁူဝ်ၵူၼ်း 100 ပၢႆၼၼ်ႉ တေႃႇထိုင်ယၢမ်းလဵဝ် ပႆႇၸၢင်ႈ ပွၵ်ႈၶိုၼ်းႁိူၼ်းယေးၽႂ်မၼ်း ယွၼ်ႉၼႂ်းပိုၼ်ႉတီႈ တိုၵ်ႉမီးလွင်ႈၶဵင်ႈၶႅင် ၵၢၼ်သိုၵ်းတေႃႇၵၼ်ယူႇ ဝႃႈၼႆ။  

ၵူၼ်းပၢႆႈၽေးသိုၵ်း
Photo by – ၵူၼ်းပိုၼ်ႉတီႈ/ ၵူၼ်းပၢႆႈၽေးသိုၵ်း တီႈဝဵင်းလၢႆးၶႃႈ

ပူၼ်ႉမႃး မိူဝ်ႈဝၼ်းတီႈ 15/4/2023 ၼၼ်ႉ ၵူၼ်းဝၢၼ်ႈၼမ်ႉမေႃႇမူၼ်ႇ၊ ဝၢၼ်ႈၼွင်ႁွမ် ဢိူင်ႇမၢၵ်ႇလၢင်းလႄႈ ဝၢၼ်ႈမၢၵ်ႇၵွၵ်ႇႁူဝ်မီ ၼႂ်း ဢိူင်ႇဝၢၼ်ႈသၢင်း ၸိူဝ်းၼႆႉ ပၢႆႈၽေးသိုၵ်းမႃးသွၼ်ႈယူႇဝႆႉ တီႈဝတ်ႉဝႃႇသူဝ်ႇတင်း ၵျွင်းၶမ်း ၼႂ်းဝဵင်းလၢႆးၶႃႈ ၸႄႈတွၼ်ႈလွႆလႅမ် ၸိုင်ႈတႆး ပွတ်းၸၢၼ်း ႁူဝ်ၵူၼ်း 100 ပၢႆ ပႆႇၸၢင်ႈပွၵ်ႈၶိုၼ်းႁိူၼ်းယေးၵၼ် ယွၼ်ႉသိုၵ်း SSPP တင်း RCSS တိုၵ်ႉၶဵင်ႈၶႅင်ၵၢၼ်သိုၵ်းတေႃႇၵၼ် ၵူၼ်းမိူင်းမႆႈၸႂ် လွင်ႈၶူဝ်းသူၼ်ႁႆႈၼႃး ဢၼ်ၵိုတ်းဝႆႉတၢင်းလင် ၸိူဝ်းၼၼ်ႉ။   

- Subscription -

ၵူၼ်းပိုၼ်ႉတီႈ ဝဵင်းလၢႆးၶႃႈ လၢတ်ႈတီႈၽူႈတွႆႇႁွၵ်ႈဝႃႈ – “ႁဝ်းၶႃႈ ၶႂ်ႈပွၵ်ႈႁိူၼ်းၼႃႇယဝ်ႉ ၵမ်ႈၽွင်ႈမီးသူၼ်ႁႆႈၼႃးလႄႈ လူဝ်ႇမိူဝ်းဢဝ်ၽၵ်း ယိူဝ်ႈၼၢင်းၶဵဝ် ၸိူဝ်းၼႆႉ။ ၶၢဝ်းၼႆႉ ပဵၼ်ၶၢဝ်းဢဝ်ၽၵ်းမီႇ။ မိူဝ်ႈၶဝ်ပဵၼ်ပၢင်တိုၵ်းၵၼ်ၼၼ်ႉ ႁဝ်းၶႃႈ ဢမ်ႇတၼ်းလႆႈသင် ၼႅတ်ႈဢွၼ်ၵၼ်ပၢႆႈဢွၵ်ႇမႃး။ ၵူၼ်းဝၢၼ်ႈ ၸိူဝ်းပၢႆႈမႃးသေ ပွၵ်ႈမိူဝ်းၶိုၼ်းၼၼ်ႉ ယွၼ်ႉသိုၵ်းၼႂ်းပိုၼ်ႉတီႈၶဝ် ၸႂ်ႉငိူင်ႉဝႄႈဝႆႉ ပႆႇပၼ်ယူႇၼႂ်းဝၢၼ်ႈလႄႈ ႁဝ်းၶႃႈ ၸင်ႇ ၶိုၼ်း ဢွၼ်ၵၼ်မႃး ယူႇတီႈဢွင်ႈပၢႆႈၽေးၼႆႉၶိုၼ်း”- ဝႃႈၼႆ။

ၼႂ်းၵူၼ်းပၢႆႈၽေးသိုၵ်း 100 ပၢႆၼၼ်ႉ မီးပႃးမႄႈမၢၼ်း ၵမ်ႈၽွင်ႈ လႆႈသူင်ႇယူႇဝႆႉ တီႈႁူင်းယႃဝဵင်းလၢႆးၶႃႈ ၸိူဝ်းၼႆႉ ၵေႃႈမီး ၼႆယဝ်ႉ။

“ပေႃးသိုပ်ႇလႆႈပၢႆႈယူႇ ႁဵတ်းၼႆတႄႉ တေထူပ်းတၢင်းယၢပ်ႇၽိုတ်ႇ လွင်ႈၵိၼ်ယႅမ်ႉတႄႉတႄႉၶႃႈ။ ၼႂ်းၵူၼ်းပၢႆႈၽေးသိုၵ်းၼႆႉ ပႃးမႄႈမၢၼ်းဝႆႉ ၵမ်ႈၽွင်ႈ လႆႈသူင်ႇၵႂႃႇယူႇဝႆႉ တီႈႁူင်းယႃပုၼ်ႉၵေႃႈမီးဢေႃႈ။ ၵူၼ်းပၢႆႈၽေး မၢင်ၸိူဝ်း မႆႈၸႂ်သေ ၶိုၼ်းမိူဝ်းတူၺ်းဝူဝ်း/ ၵႂၢႆးတီႈဝၢၼ်ႈၶဝ် ၵေႃႈမီး။ ၵူၺ်းၼႃႇ ဢမ်ႇႁတ်းယူႇ။ ၸိူဝ်းယူႇၸမ် ဝၢၼ်ႈၼွင်ႁွမ် ၼၼ်ႉတႄႉ မၢင်ၵမ်း တိုၵ်ႉလႆႈငိၼ်းသဵင်ၵွင်ႈတႅၵ်ႇယူႇၼႆၶႃႈ”- ၵူၼ်းပိုၼ်ႉ တီႈ ဝဵင်းလၢႆးၶႃႈ သိုပ်ႇလၢတ်ႈၼႄၼင်ႇၼႆ။

ဢိင်ၼိူဝ် လွင်ႈၼႆႉ ပူၼ်ႉမႃး မိူဝ်ႈဝၼ်းတီႈ 11/4/2023 ၼၼ်ႉ ယွၼ်ႉသိုၵ်း RCSS တင်း SSPP ပိုတ်းယိုဝ်းၵၼ် တၢင်းၾၢႆႇဢွၵ်ႇ ဝဵင်း လၢႆးၶႃႈ မႃးႁၢဝ်ႈႁႅင်း ႁၢၼ်ႉတေႃႇထိုင်ယၢမ်းလဵဝ် တင်းသွင်ၾၢႆႇ တိုၵ်ႉၶဵင်ႈၶႅင်ၵၢၼ်သိုၵ်းၵၼ်ဝႆႉယူႇ ဝႃႈၼႆ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း