ပီႈမႂ်ႇသၢင်းၵျၢၼ်ႇ ပီ 2023 ၼႆႉ သိုၵ်းမၢၼ်ႈယိုတ်းမိူင်း တေဢွၼ်ႁူဝ်ၸတ်းႁဵတ်းပွႆးသွၼ်းၼမ်ႉၶိုၵ်ႉယႂ်ႇဝဵင်းယႂ်ႇဝဵင်းလူင် ၼႂ်းၸိုင်ႈတႆး ၼႆလႄႈ PDF တိုၵ်းသူၼ်း ၵူၼ်းမိူင်း ႁႂ်ႈဝႆႉၾၢင်ႉၼၵ်းၼႃ။
ၸုမ်း PDF ဝဵင်းၾၢႆၶုၼ် ၾၢင်ႉဝႆႉဝႃႈ- “ ပေႃႈမႄႈၵူၼ်းမိူင်း ၸိူဝ်းတေၵႂႃႇလဵၼ်ႈၼမ်ႉၸွမ်းပွႆးသွၼ်းၼမ်ႉဢၼ် သိုၵ်းမၢၼ်ႈဢွၼ်ၼမ်းၸတ်းႁဵတ်းၼၼ်ႉ ႁႂ်ႈၾၢင်ႉယႂ်ႇၼမ် ။ယွၼ်ႉဝႃႈ သိုၵ်းမၢၼ်ႈၼႆႉ ၵႆႉႁၢင်ႈမၢၵ်ႇဝႆႉသေ ပေႃးမၢၵ်ႇတႅၵ်ႇလႄႈၵူၼ်းမိူင်းလူႉတၢႆၼႆ ၶဝ်တေၼႄး PDF ။ၵွပ်ႈၼၼ်လႄႈ ပေႃးပဵၼ်လႆႈတႄႉ ဢမ်ႇၶႂ်ႈႁႂ်ႈၵူၼ်းမိူင်းဢွၵ်ႇၵႂႃႇလဵၼ်ႈၼမ်ႉ” – ဝႃႈၼႆ။
မိူၼ်ၼင်ႇ ဝဵင်းလူင်တူၼ်ႈတီးၼႆႉၵေႃႈ သိုၵ်းမၢၼ်ႈ ႁၢင်ႈႁႅၼ်းဝႆႉ ဢွင်ႈတီႈတေလဵၼ်ႈၼမ်ႉၶိုၵ်ႉၶႅမ်ႉ 7 တီႈ လႆႈႁူႉၼင်ႇၼႆ။
ၵူၼ်းပိုၼ်ႉတီႈၼႂ်းဝဵင်းတူၼ်ႈတီးၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ၸႂ်ႈဢေႃႈ တႄႇႁဵတ်းသၢင်ႈၶဵင်ႇလဵၼ်ႈၼမ်ႉ ယူႇယဝ်ႉမိူဝ်ႈလဵဝ် ။ ဢၼ်သိုၵ်းမၢၼ်ႈဢွၼ်ႁဵတ်းဝႆႉပၼ် တေမီး 7 တီႈ ။ ႁဵတ်းဝႆႉၶိုၵ်ႉၶႅမ်ႉၵမ်းလဵဝ်ယဝ်ႉ။ႁိမ်း ၵၢတ်ႇလူင်ၼၼ်ႉၵေႃႈမီး ႁိမ်း လုမ်းသၽႃး ၵေႃႈမီး” – ဝႃႈၼႆ။
ၼႂ်းမိူင်းတႆးလၢႆတီႈ မိူၼ်ၼင်ႇ ဝဵင်းလႃႈသဵဝ်ႈ ၊ ဝဵင်းမူႇၸေႊ ၊ ဝဵင်းၵဵင်းတုင် ၊ ဝဵင်းတႃႈၶီႈလဵၵ်း ၸိူဝ်းၼႆႉၵေႃႈ သိုၵ်းမၢၼ်ႈၶိုင်ၸတ်းႁဵတ်းၶိုၵ်ႉယႂ်ႇၼႆယဝ်ႉ။မိူၼ်ၼင်ႇ ၼႂ်းၼွင်ႁၢႆးယႃႈ ၵေႃႈ တေၸတ်း ပွႆးသွၼ်းၼမ်ႉၶိုၵ်ႉယႂ်ႇ ပဵၼ်ပွၵ်ႈၵမ်း 2 ၶၢဝ်းတၢင်း 4 ဝၼ်း။
ယွၼ်ႉၼၼ် ၸုမ်း PDF ဝဵင်းၾၢႆၶုၼ်ႇ ၾၢင်ႉဝႆႉထႅင်ႈ ဝႃႈ- “ ၶၢဝ်းပွႆးသွၼ်းၼမ်ႉ ႁႂ်ႈဝႆႉၾၢင်ႉၼၵ်းၼႃ ၽွင်းတူင်ႉၼိုင် ၵႂႃႇမႃး ၼႂ်းၵႄႈၵူၼ်းၼမ်” – ဝႃႈၼႆ။
ပွႆးသွၼ်းၼမ်ႉလိူၼ်ႁႃႈ ပီ 2022 ပူၼ်ႉမႃးၼၼ်ႉၵေႃႈ ၾၢႆႇသိုၵ်းမၢၼ်ႈဢွၼ်ႁူဝ်သေ ၸတ်းႁဵတ်းၼႂ်းဝဵင်းယႂ်ႇဝဵင်းလူင်သေတႃႉ ၵူၼ်းၵႂႃႇမႃးဢႅဝ်ႇယဵမ်ႈ ဢမ်ႇမီး လိူဝ်သေမီး လုၵ်ႈၸုမ်းသိုၵ်းမၢၼ်ႈၵူၺ်းၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ