ၵေႃလိၵ်ႈလၢႆးလႄႈ ၾိင်ႈငႄႈတႆး ၸႄႈဝဵင်းၵဵင်းတုင် ၸတ်းႁဵတ်းပၢင်လိူၵ်ႈတင်ႈၽူႈပွင်ၵၢၼ်မႂ်ႇ လႄႈ ႁူဝ်ပဝ်ႈမႂ်ႇ မီးၽူႈၶဝ်ႈႁူမ်ႈ ႁိမ်း 80 ဝႃႈၼႆ။
ဝၼ်းတီႈ 08/04/2018 ယၢမ်းဝၢႆးဝၼ်း 1 မူင်း ၵေႃလိၵ်ႈလၢႆးလႄႈ ၾိင်ႈငႄႈတႆး ၸႄႈဝဵင်းၵဵင်းတုင် ၸတ်းႁဵတ်း ပၢင်လိူၵ်ႈတင်ႈ ႁူဝ်ပဝ်ႈလႄႈ ၽူႈပွင်ၵၢၼ်မႂ်ႇ တီႈဝတ်ႉၵမ်မထၢၼ်းၸွမ်ၸႅင်ႈ ၸႄႈဝဵင်းၵဵင်းတုင် ၸိုင်ႈတႆး ပွတ်း ဢွၵ်ႇ။ ၼႂ်းၼၼ်ႉ ၶိုၼ်းလိူၵ်ႈဢဝ် လုင်းၸၢႆးလႃႈ သိုပ်ႇပဵၼ်ၶိုၼ်း ႁူဝ်ပဝ်ႈၵႂႃႇ ဝႃႈၼႆ။
ၼၢင်းဝူဝ်းၽတ်း ၽူႈတူင်ႉၼိုင်ၼႂ်းတူင်ႇဝူင်းတႆး လၢတ်ႈတီႈၽူႈတွႆႇႁွၵ်ႈဝႃႈ “ ၵၢၼ်လိူၵ်ႈတင်ႈၼႆႉ ပႆႇယဝ်ႉ။ ယၢမ်းလဵဝ် ဢၼ်လိူၵ်ႈဝႆႉ ႁူဝ်ပဝ်ႈ၊ ၵႅမ်ႁူဝ်ပဝ်ႈ၊ ၽူႈၼမ်းၼႂ်း၊ ၵႅမ်ၽူႈၼမ်းၼႂ်း လႄႈ ႁွင်ႈၵၢၼ်ၾၢႆႇၵၢၼ်ငိုၼ်း ၸိူဝ်းၼႆႉ။ ၵူၺ်းၵႃႈ ဢၼ်လိူၵ်ႈဝႆႉၼႆႉ တေလႆႈဝႃႈ လိူၵ်ႈဝႆႉၸူဝ်ႈၶၢဝ်းၵူၺ်း ပေႃးထိုင် မႃး ဝၼ်းတီႈ 22 လိူၼ်ၼႆႉ ၸင်ႇတေမၵ်း မၼ်ႈပဵၼ်တၢင်းၵၢၼ်ၵႂႃႇ။ ၵၢၼ်လိူၵ်ႈတင်ႈၼႆႉ တေဢဝ်ၸွမ်းပိူင် 4 ပီ ၼိုင်ႈပွၵ်ႈ” ဝႃႈၼႆ။
တေႃႈလဵဝ် ဢၼ်လိူၵ်ႈဝႆႉ ႁူဝ်ပဝ်ႈ ၵေႃလိၵ်ႈလၢႆးလႄႈၾိင်ႈငႄႈတႆး ၸႄႈဝဵင်းၵဵင်းတုင်သမ်ႉ ပဵၼ်လုင်းၸၢႆးလႃႈ၊ ၵႅမ် ႁူဝ်ပဝ်ႈ (1) လုင်းသြႃႇလႃႉထုၼ်း၊ ၵႅမ်ႁူဝ်ပဝ်ႈ (2) ၼၢင်းဝူဝ်းၽတ်း၊ ၽူႈၼမ်းၼႂ်းသမ်ႉ ၸၢႆးဝုၼ်းၶိူဝ်း၊ ၵႅမ်ၽူႈ ၼမ်း ၼႂ်း (1) ၸၢႆးသႅင်တုၺ်ႈ၊ ၵႅမ်ၽူႈၼမ်းၼႂ်း (2) ၼၢင်းၽူးပုၺ်ႉ၊ ၽူႈၵွၼ်းႁွင်ႈၵၢၼ်ငိုၼ်း ၸၢႆးၵျေႃႇဝိၼ်း၊ ၵႅမ် ၽူႈၵွၼ်း ႁွင်ႈၵၢၼ်ငိုၼ်း (1) ၼၢင်းလၢဝ်ဝၼ်း၊ ၵႅမ်ၽူႈၵွၼ်းႁွင်ႈၵၢၼ်ငိုၼ်း (2) ၼၢင်းႁွမ်ၽွင်း ၸိူဝ်းၼႆႉ ဝႃႈၼႆ။
ၼၢင်းဝူဝ်းၽတ်း လၢတ်ႈဝႃႈ ၼႂ်းၶၢဝ်းတၢင်း 20 ပီပၢႆမႃးၼႆႉ တီႈၵဵင်းတုင်ႁဝ်းၶႃႈ ပႆႇယၢမ်ႈမီးမႃး ၵၢၼ်လိူၵ်ႈ တင်ႈႁူဝ် ပဝ်ႈ လႄႈ ၽူႈပွင်ၵၢၼ်မႂ်ႇ ၸိူင်ႉၼႆ။ ပီၼႆႉ တေလႆႈဝႃႈ ပဵၼ်ပီ ၵမ်းႁႅၵ်ႈ။ ၵူၺ်းၵႃႈ ၵၢၼ်လိူၵ်ႈတင်ႈၼႆႉ တေလႆႈဝႃႈ ပႆႇယဝ်ႉ ပေႃးထိုင်မႃး ဝၼ်းတီႈ 22 လိူၼ်ၼႆႉ ႁဝ်းၶႃႈ ၶိုၼ်းဢုပ်ႇၵၼ်ထႅင်ႈ၊ ဢၼ်လူဝ်ႇဢုပ်ႇတၢင်ႇလၢတ်ႈ သပ်းလႅင်း ၼႄၵၼ် ၵိုတ်းထႅင်ႈတင်းၼမ် မိူၼ် လွင်ႈငိုၼ်းတွင်းၵေႃႈ လူဝ်ႇ မႃးဢုပ်ႇၵၼ်၊ လွင်ႈတမ်းဝၢင်းပၵ်းပိူင် ၵေႃလိၵ်ႈလၢႆး၊ လွင်ႈၵၢၼ်ဝၢင်းၽႅၼ်ၵႂႃႇတၢင်းၼႃႈလႄႈ လွင်ႈတႃႇသၢင်ႈ ႁူင်းႁေႃ ၵေႃလိၵ်ႈလၢႆးလႄႈ ၾိင်ႈငႄႈတႆး ၸဵမ်ၸိူဝ်းၼႆႉ” ဝႃႈၼႆ။
ႁွင်ႈၵၢၼ် ဢၼ်လူဝ်ႇၽိူမ်ႉထႅမ် တူင်ႉၼိုင် ႁဵတ်းသၢင်ႈၵႂႃႇၼႂ်းၵေႃလိၵ်ႈလၢႆးလႄႈ ၾိင်ႈငႄႈတႆး ၸႄႈဝဵင်းၵဵင်းတုင် မိူၼ်ၼင်ႇ ၾၢႆႇသူၼ်းတုမ်၊ ၾၢႆႇၾိင်ႈငႄႈ၊ ၾၢႆႇပၢႆးပၺ်ၺႃ၊ ၾၢႆႇၵေႃႇသၢင်ႈ ႁဵတ်းႁူင်းႁေႃး လႄႈ ဢိၵ်ႇထႅင်ႈ လၢႆ လၢႆဢၼ် ၸိူဝ်းၼႆႉ ပေႃးထိုင်မႃး ဝၼ်းတီႈ 22 လိူၼ်ၼႆႉၸိုင် ၸင်ႇတေဢုပ်ႇဢူဝ်းၵၼ်ၵႂႃႇထႅင်ႈ ဝႃႈၼႆ။
ၵေႃလိၵ်ႈလၢႆးလႄႈ ၾိင်ႈငႄႈတႆး ၸႄႈဝဵင်းၵဵင်းတုင်ၼႆႉ တေတမ်းပိူင်ဝႆႉ 4 ပီ ၼိုင်ႈပွၵ်ႈ တေလိူၵ်ႈတင်ႈ ႁူဝ်ပဝ်ႈမႂ်ႇ လႄႈ ၽူႈပွင်ၵၢၼ်မႂ်ႇ ဝႃႈၼႆ။
ႁူဝ်ပဝ်ႈ ၵေႃလိၵ်ႈလၢႆးလႄႈၾိင်ႈငႄႈတႆး ၸႄႈဝဵင်းၵဵင်းတုင်ၼႆႉ ပဵၼ်လုင်းၸၢႆးလႃႈ တႄႇႁပ်ႉပုၼ်ႈၽွၼ်းပဵၼ်ႁူဝ် ပဝ်ႈမႃး ၸဵမ်မိူဝ်ႈ ပီ 1991 ပီ ထိုင်ယၢမ်းလဵဝ် ဝႃႈၼႆ။
