ၵူၼ်းၸၢႆးသႅၼ်းႁၢတ်ႈႁၢႆးၵေႃႉၼိုင်ႈ ဝႅၼ်တူၵ်းၼမ်ႉတူႈ တီႈဝဵင်းသီႇပေႃႉ တေႃႇထိုင်ယၢမ်းလဵဝ် ၸုမ်းၸွႆႈထႅမ်ပရႁိတ ဢွၼ်ၵၼ်သွၵ်ႈႁႃတူဝ် ပႆႇႁၼ်။
မိူဝ်ႈဝႃး ဝၼ်းတီႈ 6/3/2023 ယၢမ်းဝၢႆးဝၼ်းၵူၼ်းၸၢႆး ၵေႃႉၼိုင်ႈ ၵူၼ်းဝၢၼ်ႈ ပွၵ်ႉဢူၵ်ႉၵျိၼ်း ဝဵင်းသီႇပေႃႉ ဝႅၼ်တူၵ်းၼမ်ႉ တူႈ တီႈၶူဝ်မႂ်ႇ ဝဵင်းသီႇပေႃႉ ၸႄႈတွၼ်ႈၵျွၵ်ႉမႄး တၢႆႁိုဝ်လိပ်းႁိုဝ် ပႆႇႁူႉ ယူႇတီႈ ၸုမ်းၸွႆႈထႅမ်ပရႁိတ တိုၵ်ႉဢွၼ်ၵၼ် သွၵ်ႈႁႃတူဝ်မၼ်းၸၢႆးယူႇ ဝႃႈၼႆ။
ၵူၼ်းပိုၼ်ႉတီႈ ဝဵင်းသီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ ပဵၼ်ဢွၼ်ႇၸၢႆး ၵေႃႉၼိုင်ႈ ယူႇပွၵ်ႉဢူၵ်ႉ ၵျိၼ်းသေ ဝႅၼ်တူၵ်းၼမ်ႉတူႈ တီႈၶူဝ်မႂ်ႇ ဢၼ်ၵၢႆႇၸူးတၢင်းလႃႈသဵဝ်ႈၼၼ်ႉ။ ယွၼ်ႉသင်လႄႈ မၼ်းၸၢႆးဝႅၼ်တူၵ်းတႄႉ ဢမ်ႇႁူႉၶႃႈ။ ပူၼ်ႉ မႃး ပႆႇႁိုင်ၼႆႉ ပီႈၼွင်ႉမၼ်းၸၢႆးတၢႆသေ တိုၵ်ႉၸႂ်ႉမၼ်းၵႂႃႇၵဵပ်းလုပ်ႇယူႇဢိူဝ်ႈၼၼ်ႉ။ ၶႅၼ်ႈ ၵၼ်လၢႆဝၼ်းၼႆႉၵူၺ်း မၼ်းၸၢႆး သမ်ႉ မႃးဝႅၼ်တူၵ်းၼမ်ႉ ၸိူင်ႉၼႆထႅင်ႈ တေလႆႈဝႃႈ ဢမ်ႇသၢင်ႇထုၵ်ႇသေဢိတ်း ၶႃႈ”- ဝႃႈၼႆ။
ဢိင်ၼိူဝ် လွင်ႈၼႆႉ ယူႇတီႈ ၸုမ်းပရႁိတ ဝဵင်းသီႇပေႃႉ ဢဝ်ႁိူဝ်းသေ ၸွမ်းသွၵ်ႈႁႃတူဝ် မၼ်းၸၢႆး တင်ႈတႄႇမိူဝ်ႈဝႃး ဝၼ်း တီႈ 6 ၼၼ်ႉမႃး တေႃႇထိုင် ဝၼ်းတီႈ 7 ၼႆႉ ယင်းပႆႇထူပ်းႁၼ်တူဝ်မၼ်းၸၢႆး၊ လႆႈႁူႉဝႃႈပဵၼ်သႅၼ်းပၢၼ်ႁၢတ်ႈႁၢႆးၼႆၵူၺ်း ဢႃယုမွၵ်ႈလႂ်ၵေႃႈဢမ်ႇလႆႈႁူႉ၊ ယွၼ်ႉသင်လႄႈ ဝႅၼ်တူၵ်းၼမ်ႉၵေႃႈဢမ်ႇပႆႇႁူႉလွင်ႈတၢင်းတႅတ်ႈတေႃး ဝႃႈၼႆ။
ၸုမ်းၸွႆႈထႅမ် ပရႁိတ ဝဵင်းသီႇပေႃႉ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ႁဝ်းၶႃႈ ဢဝ်ႁိူဝ်းသေ ၸွမ်းသွၵ်ႈႁႃတူဝ်မၼ်း ၸၢႆးမႃး တႄႇဢဝ်မိူဝ်ႈဝႃး ယၢမ်းဝၢႆးဝၼ်းတေႃႇထိုင်ယၢမ်းလဵဝ် ပႆႇႁၼ်တူဝ်မၼ်းၸၢႆးၶႃႈ။ ၽူႈၸၢႆး ဢၼ်ဝႅၼ်တူၵ်းၼမ်ႉၼႆႉ ၸိုဝ်ႈဝႃႈႁိုဝ်၊ ဢႃယုမီးၵႃႈႁိုဝ်၊ ယွၼ်ႉသင်လႄႈ ဝႅၼ်တူၵ်းၸိူဝ်းၼႆႉတႄႉ ႁဝ်းၶႃႈ ဢမ်ႇလႆႈႁူႉ”- ဝႃႈၼႆ။
မိူဝ်ႈဝၼ်းတီႈ 23/11/2018 ၼၼ်ႉၵေႃႈ ၼၢင်း Miss Houng Young Heo ၸၢဝ်းၵဝ်းလီ (ၵူဝ်ႊလီႊယိူဝ်ႊ) တင်း ၵူၼ်း ၼွၵ်ႈမိူင်း 5 ၵေႃႉ လူင်းလဵၼ်ႈၼမ်ႉတူႈ တီႈဝဵင်းသီႇပေႃႉၼႆႉ ၸွမ်းၵၼ်သေ မၼ်းၼၢင်းလႆႈလႆလွင်ႈၸွမ်းၼမ်ႉတူႈၵႂႃႇ တေႃႇ ထိုင်ယၢမ်းလဵဝ် ပႆႇႁၼ်တူဝ် ဝႃႈၼႆ။
