ၼႂ်း လိူၼ် ၵျႅၼ်ႊၼိဝ်းရီႊ ပီ 2023 ၼႆ့မႃး ၶၢဝ်းတၢင်းလိူၼ်ပၢႆ ၾႆးၵမ်းၵမ်းမႆႈႁိူၼ်းၵူၼ်းမိူင်းတႆး ဢမ်ႇယွမ်း 20 လင်ယဝ်ႉ။

မိူဝ်ႈဝၼ်းတီႈ13/2/2023 ၼၼ့် ၾႆးမႆႈဝတ့်ၵျွင်း 2 လင်ၸပ်းၵၼ် တီႈဝၢၼ်ႈၸၢမ်ၽိူၵ်ႇ  ၸႄႈဝဵင်းသီႇပေႃ့ ၸိုင်ႈတႆး ပွတ်းႁွင်ႇ ၶူဝ်းၶွင်ၼႂ်းဝတ်ႉၵျွင်း လူ့သုမ်းတင်းၼမ်  ၸဝ်ႈသၢင်ႇဢွၼ်ႇ ဢႃယု 8 ၶူပ်ႇ လူႉလွၼ်ႇၶမ်ၾႆး ၸဝ်ႈၼိုင်ႈ။

ထိုင်မႃးဝၼ်းတီႈ 14/2/2023 မိူဝ်ႈဝႃးၼႆ့ၵေႃႈ ယၢမ်းၸဝ့် 5 မူင်းပၢႆၼၼ့် ၾႆးမႆႈႁိူၼ်းလင်ၼိုင်ႈ ၼိူဝ်သဵၼ်ႈတၢင်းဢွင်ႇမင်ႇၵလႃႇ  တီႈပွၵ့်ရတၼႃႇသီႇရိ ဝဵင်းလူင်တူၼ်ႈတီး ၸိုင်ႈတႆးပွတ်းၸၢၼ်း။

ၼႂ်းလိူၼ်ၵျႅၼ်ႊၼိဝ်ႊရီႊလႄႈ ႁူဝ်လိူၼ်ၾႅပ်ႊပိဝ်ႊရီႊၼႆ့ၵူၺ်း ယွၼ့်ငဝ်းလၢႆးၵူႈပိူင်ပိူင်သေ  ၾႆးမႆႈႁိူၼ်းယေးၼႂ်းၸႄႈဝဵင်းမူႇၸႄႈ ၊ ဝဵင်းတူၼ်ႈတီး ၊ဝဵင်းၵူတ့်ၶၢႆ  ၊ ဝဵင်းလႃႈသဵဝ်ႈ ၊ ဝဵင်းၵျွၵ့်မႄး ၊ ဝဵင်းတႃႈၶီႈလဵၵ်း ၊ ဝဵင်းၵၢတ်ႇလေႃႉ ၊ ဝဵင်းသီႇပေႃႉ ၊ ဝဵင်းတၢင့်ယၢၼ်း ၊ ဝဵင်းၵဵင်းတွင်း ၸိူဝ်းၼႆႉ။

ၵူၼ်းမိူင်းၼႂ်းၸႄႈတွၼ်ႈလၢင်းၶိူဝ်း ၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ -“ ၼႂ်းထုင်ႉ ဝဵင်းလၢင်းၶိူဝ်း ၵဵင်းတွင်း ဝၢၼ်ႈႁၢတ်ႇ မွၵ်ႇမႆႇႁဝ်းၶႃႈၼႆႉၵေႃႈ ရႃႇသီႇဢုတု မႆႈၼႃႇၶႃႈလူင်။ ပေႃးထိုင်ၶၢဝ်းႁႅင်ႈမႃး လႆႈဢွၼ်ၵၼ်ၾၢင်ႉ ၽေးၾႆးႁႅင်းႁႅင်းၵမ်းလဵဝ်ယဝ်ႉၶႃႈ။ ပေႃးတူၺ်းတလဵဝ် ယင်းပႆႇၶဝ်ႈၶၢဝ်းမႆႈတႄႉတႄႉ ၾႆးၵမ်းၵမ်းမႆႈယူႇၸိူင်ႉၼႆ ပေႃးထိုင်ၶၢဝ်းမႆႈမႃးတေမိူၼ်ႁိုဝ်။ ဝူၼ်ႉတူၺ်းၵေႃႈပေႃးလီတူၵ်းၸႂ်ဝႆႉယူႇယဝ်ႉ။ ႁႂ်ႈဢွၼ်ၵၼ်ၾၢင်ႉလွင်ႈၽိုၼ်းၾႆး လႄႈပလၵ်ႉၾႆးၾႃႉ လီလီသေၵမ်းၶႃႈ ”- ဝႃႈၼႆ။

မိူဝ်ႈဝၼ်းတီႈ 11/2/2023 ၼႆ့ၵေႃႈ ၾႆးမႆႈႁိူၼ်း 2 လင်ထပ်းၵၼ် တီႈဝၢၼ်ႈၼႃးၵွၼ်း ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ လူ့သုမ်းၶူဝ်းႁိူၼ်းယေးတင်းၼမ်လႄႈ ငိုၼ်း 50 သႅၼ်ပျႃး။ၼႂ်းဝၼ်းၼၼ့်ၵူၺ်းၼင်ႇၵဝ်ႇ ယၢမ်းၵၢင်ၼႂ်  မေႃႈၾႆး(ပႅတ်ႊထရီႊ)သျွတ်ႉ  ၾႆးလၢမ်းမႆႈႁိူၼ်းလင်ၼိုင်ႈ တီႈ ဢိူင်ႇပႃႇၶူၵ့် မိူင်းၽူင်း (ၶ) ၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇ။

ၾၢႆႇၶႄၾႆးသင်ႇလၢတ်ႈဝႃႈ – “ ၶၢဝ်းႁႅင်ႈၵေႃႈ ၸမ်မႃးယဝ့်လႄႈ ႁႂ်ႈဢွၼ်ၵၼ်ၾၢင့် ယႂ်ႇၼမ်။ ယႃႇဝႆ့ၾႆးမဝ်မၢင်။ တေဢွၵ်ႇႁိူၼ်းဢွၵ်ႇယေး ႁႂ်ႈဢွၼ်ၵၼ် မွတ်ႇၾႆးၽိုၼ်းၾႆးတဵၼ်းသေ ၸင်ႇဢွၵ်ႇ။ တေၸုတ်ႇတေၽဝ် သင်ၵေႃႈ ႁႂ်ႈၸုတ်ႇၵႆၵႆ ႁိူၼ်းၵူၼ်းယူႇသဝ်း။ ႁႂ်ႈလဵပ်ႈႁဵၼ်းႁူ့ဝႆ့ ပိုၼ့်ႁူ့လၢႆးၶႄၾႆး လႄႈ ႁႂ်ႈၵႅမ်ဝႆ့ ၶိူင်ႈမွတ်ႇၾႆးၵူႈၸိူဝ်းၸိူဝ်း မိူၼ်ၼင်ႇ ၼမ့်ယႃမွတ်ႇၾႆး၊ မၢႆၾူၼ်း ၸဝ်ႈၼႃႈတီႈ ၾၢႆႇၶႄၾႆး ၸဵမ်ၸိူဝ်းၼႆ့ ဢဝ်ဝႆ့ၵိုၵ်းႁိူၼ်းၽႂ်မၼ်းဝႆ့တႃႇသေႇ ” –  ဝႃႈၼႆ။

ၶၢဝ်းတၢင်းသိုၵ်းမၢၼ်ႈယိုတ်းမိူင်းမႃးၼႆ့ ၾႆးၾႃ့ ဢမ်ႇမႃးမႅၼ်ႈၸွမ်းၶၢဝ်းယၢမ်းလႄႈ ၵူၼ်းမိူင်းၸိူဝ်းၸႂ့်ၶိူင်ႈၾႆးၾႃ့ထူပ်းတၢင်းယၢပ်ႇၽိုတ်ႇ ၵမ်ႈၽွင်ႈလႆႈၸႂ့်ၾႆးတႆး ၾႆးၽိုၼ်းသေ ဢမ်ႇသၢင်ႇထုၵ်ႇၾႆးမႆႈႁိူၼ်း ထိုင်တီႈ လူ့သုမ်းၶူဝ်းၶွင်ႁိူၼ်းယေးတင်းၼမ်ဢမ်ႇၵႃး လူ့သုမ်းပႃးသၢႆၸႂ်။မၢင်တီႈၵေႃႈ ယွၼ့်ၾႆးၾႃ့သွတ့်သေ ၾႆးမႆႈႁိူၼ်းၵေႃႈမီး။

ၼႂ်းလိူၼ် ၼူဝ်ႊဝႅမ်ႊပိူဝ်ႊ ပီ 2022 ပူၼ့်မႃးၼႆ့ၵေႃႈ ၾႆးမႆႈႁိူၼ်းလင်ၼိုင်ႈ တီႈပွၵ့် 7 ၸႄႈဝဵင်းၵူတ့်ၶၢႆ ၸိုင်ႈတႆးပွတ်းႁွင်ႇ လုၵ်ႈဢွၼ်ႇၸၢႆးဢႃယု 12 ၶူပ်ႇၵေႃ့ၼိုင်ႈ တၢႆၸွမ်းၾႆး။