ၾႆးမႆႈႁိူၼ်းယေး ၵူၼ်းဝၢၼ်ႈလင်ၼိုင်ႈ တီႈဝဵင်းၵဵင်းတုင် ယွၼ်ႉလုၵ်ႈဢွၼ်ႇလဵၼ်ႈၾႆးတဵၼ်း ၵူၼ်းပိုၼ်ႉတီႈလၢတ်ႈ။
မိူဝ်ႈဝႃး ဝၼ်းတီႈ 5/12/2023 ယၢမ်းၵၢင်ဝၼ်း 11:50 မူင်း ၾႆးမႆႈႁိူၼ်း ပႃႈလိုၼ်း တီႈဝၢၼ်ႈၵဵင်းလဵၵ်း ပွၵ်ႉ 4 ဝဵင်းၵဵင်းတုင် ၸိုင်ႈတႆးပွတ်းဢွၵ်ႇၶူင်း ထုၵ်ႇၾႆးမႆႈၶူဝ်းႁိူၼ်းယေးမူတ်း ဢမ်ႇတၼ်းလႆႈ လွင်ႈၵူၼ်းမၢတ်ႇၸဵပ်းလူႉတၢႆတႄႉ ဢမ်ႇမီး ဝႃႈၼႆ။
ၵူၼ်းပိုၼ်ႉတီႈ ဝဵင်းၵဵင်းတုင် လၢတ်ႈတီႈၽူႈတွႆႇႁွၵ်ႈဝႃႈ – “တီႈႁိူၼ်းၼၼ်ႉ မီးသွင်ၵေႃႉၼၢႆးလၢၼ် ၵေႃႉပဵၼ်လၢၼ်ၸၢႆး ဢႃယု 10 ၶူပ်ႇပၢႆ လဵၼ်ႈၾႆးတဵၼ်းသေ မႆႈၼႆၶႃႈဝႃႇ။ ၸဝ်ႈၶွင်ႁိူၼ်းတႄႉ ပဵၼ်ႁိူၼ်းပႃႈလိုၼ်းၶႃႈဢေႃႈ။ ႁိူၼ်းဢၼ်ထုၵ်ႇၾႆးမႆႈၵႂႃႇ ၼၼ်ႉ ပဵၼ်ႁိူၼ်းမႆႉ သွင်ၸၼ်ႉ။ ၶူဝ်းႁိူၼ်းယေး ၽိုၼ်ဝၢၼ်ႇ ၸိူဝ်းၼႆႉတႄႉ ဢမ်ႇတၼ်းလႆႈသင်သေဢိတ်းၶႃႈ။ တင်းမူတ်း လူႉသုမ်းၵႂႃႇၵႃႈႁိုဝ်တႄႉ ပႆႇႁူႉၶႃႈ”- ဝႃႈၼႆ။
ဢိင်ၼိူဝ် လွင်ႈၾႆးမႆႈၼႆႉသေ ယူႇတီႈ ၵူၼ်းဝၢၼ်ႈလႄႈ ၸဝ်ႈၼႃႈတီႈၾၢႆႇၶႄၾႆး ႁူမ်ႈၵၼ် ၸွႆႈၶႄမွတ်ႇ။ ၾၢႆႇၶႄၾႆးၶဝ် လႆႈ ဢဝ် ရူတ်ႉၵႃးမႃးႁူတ်းၸွႆႈ မွၵ်ႈ 3 လမ်း ၼႆယဝ်ႉ။
“ပီၼႃႈမႃး တီႈႁိူၼ်းပႃႈလိုၼ်းၼႆႉ တေၶၢမ်ႇသၢင်ႇလၢၼ်ၸၢႆးမၼ်းၶႃႈဢေႃႈ။ ပေႃးႁၢင်ႈႁႅၼ်းသိုဝ်ႉဝႆႉ ၶူဝ်းၶွင်တႃႇပွႆးၶၢမ်ႇသၢင်ႇ လၢၼ်ၸၢႆးမၼ်း ၵမ်ႈၽွင်ႈယဝ်ႉ။ မႃးဢဝ်ၾႆးမႆႈပႅတ်ႈၸိူင်ႉၼႆသေ တေႁဵတ်းႁိုဝ်ၼၼ်ႉ။ ႁိူၼ်းႁိမ်းႁွမ်းၸိူဝ်းၼၼ်ႉတႄႉ ဢမ်ႇ တၼ်းလၢမ်းမႆႈပႃးၶႃႈ လိူဝ်သေ မႆႈႁိူၼ်းပႃႈလိုၼ်းၼႆႉ လင်လဵဝ်”- ၵူၼ်းပိုၼ်ႉတီႈ ဝဵင်းၵဵင်းတုင် သိုပ်ႇလၢတ်ႈၼႄၼင်ႇၼႆ။
ပူၼ်ႉမႃး မိူဝ်ႈဝၼ်းတီႈ 30/8/2023 ယၢမ်းၵၢင်ၼႂ် မွၵ်ႈ 6 မူင်း ႁိူၼ်းပႃႈၼၢင်းၽူး ဢႃယု 68 ပီ ဝၢၼ်ႈၵဵင်းလဵၵ်း ပွၵ်ႉ 4 ၼၼ်ႉၵေႃႈ လူႉလႅဝ်ၵူၼ်ႇပင်းပႅတ်ႈတင်းလင် ယွၼ်ႉၾူၼ်တူၵ်းထပ်းၵၼ်ႁႅင်းလၢႆဝၼ်း။
