ၵူၼ်းၵိၼ်လဝ်ႈ ၵိၼ်ယႃႈဢူၼ်မေႃး ၽွင်းၵၢင်ၶမ်ႈၵၢင်ၶိုၼ်း တီႈဝၢၼ်ႈဝေႃႇၼဵင်ႈ (ဝေါ်နိမ်) ၼႂ်းပွၵ်ႉ 1 ဝဵင်းၵဵင်းတုင် ၸိုင်ႈတႆးပွတ်းဢွၵ်ႇ ဢမ်ႇမီးၸုမ်းလႂ် ၸွႆႈၵႄႈပၼ်လႄႈ ႁဵတ်းႁႂ်ႈ ၵူၼ်းပိုၼ်ႉတီႈ ဢမ်ႇၸၢင်ႈလိုဝ်ႈၸၢင်ႈၼွၼ်း လႄႈ ဢမ်ႇမီးလွင်ႈႁူမ်ႇလူမ်ႈ ၼႆယဝ်ႉ။
ၼၢင်းယိင်းၼႂ်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ – “ၼႂ်းပွၵ်ႉ1 ၼၼ်ႉ မီးၵူၼ်းၶၢႆယႃႈ လႄႈ ဢွၼ်ၵၼ်မႃးသိုဝ်ႉၵိၼ်ၵၼ် ၊ ပေႃးၵၢင်ၶမ်ႈၵၢင်ၶိုၼ်းၼႆႉ ၵိၼ်လဝ်ႈၵိၼ်ယႃႈ ဢူၼ်ဢၢၼ်မေႃးၵၼ်တင်းၶိုၼ်း ၵူၼ်းႁိမ်းႁွမ်း ဢမ်ႇလႆႈလပ်းလႆႈၼွၼ်း လွင်ႈၼႆႉၽႂ်ၵေႃႈဢမ်ႇႁၢမ်ႈလႄႈ ၼမ်မႃးၵူႈမိုဝ်ႉၵူႈဝၼ်း ၵူၼ်းၼႂ်းပွၵ်ႉၵေႃႈ မႆႈၸႂ်လွင်ႈႁူမ်ႇလူမ်ႈ ယွၼ်ႉၸုမ်းလႂ်ဢမ်ႇၵႄႈလိတ်ႈပၼ်သင်” – ဝႃႈၼႆ ။
ယၢမ်းလဵဝ် တီႈဝဵင်းၵဵင်းတုင် ယႃႈမဝ်းၵမ် လိူင်ႇၼမ်၊ ၽူႈလၵ်ႉၸၵ်ႉၶုတ်ႈ လိူင်ႇၼမ်၊ ၸၵ်ႉၸူၼ်ၵၼ်ၵေႃႈ လိူင်ႇၼမ်၊ ၵူၼ်းမိူင်း ဢမ်ႇမီးလွင်ႈႁူမ်ႇလူမ်ႈ။ ၶၢဝ်းတၢင်း သိုၵ်းမၢၼ်ႈ ယိုတ်းမိူင်းမႃး 4 ပီပၢႆၼႆႉ ၵူၼ်းမိူင်းၺႃးလၵ်ႉ ၺႃးၸူၼ်ယူႇၵူႈဝၼ်း ။ ၵူၼ်းပိုၼ်ႉတီႈလၢတ်ႈဝႃႈ ၶူဝ်းၶွင်ႁိူၼ်းယေးၵႆႉႁၢႆ။ ရူတ်ႉၶိူင်ႈၸၢၵ်ႈ- ဢိၵ်ႇၶူဝ်းၶွင်မီးၵႃႈၶၼ်တႄႉဢမ်ႇၵိုတ်းလႆႈ ဝႃႈၼႆ။
ၵူၼ်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ၶဝ်ဢူၼ်မေႃးယူႇၸိူင်ႉၼႆႉ မီးၸမ် 1 ပီယဝ်ႉၶႃႈ ၊ ၵူၼ်းဢၼ်ဢူၼ်မေႃးၼႂ်းပွၵ်ႉၼၼ်ႉ မီးမွၵ်ႈ 5 ၵေႃႉၼႆႉ ၸိူဝ်းၼၼ်ႉ ၶဝ်ယၢမ်ႈတူၵ်းၶွၵ်ႈလွင်ႈယႃႈၸိူဝ်းၼႆႉမႃးယဝ်ႉဢေႃႈ ပေႃးၽူႈမီးပုၼ်ႈၽွၼ်းမႃး ဢဝ်လိူင်ႈပၼ်လွင်ႈၼႆႉတႄႉလီဢေႃႈ ၵူၼ်းပိုၼ်ႉတီႈ ဢမ်ႇမီးလွင်ႈႁူမ်ႇလူမ်ႈၶႃႈ မိူဝ်ႈလဵဝ်”- ဝႃႈၼႆ ။
ဝၢႆးလင်သိုၵ်းမၢၼ်ႈယိုတ်းဢႃႇၼႃႇ ၸိုင်ႈမိူင်းၼႆႉ ၵူၼ်းမိူင်းႁဵတ်းၵၢၼ် ႁႃ ၵိၼ်လဵင်ႉတွင်ႉယၢပ်ႇ၊ မီးၵူၼ်းၸိူဝ်းၸူးငၢႆႈ ႁႃငိုၼ်းလူၺ်ႈဢမ်ႇထုၵ်ႇၸွမ်းမၢႆမီႈၼမ်မႃးတင်းၼမ်တင်းလၢႆ ။
ယွၼ်ႉၼၼ် ပေႃးဢွၵ်ႇတၢင်းၼွၵ်ႈ ယႃႇပေၵႂႃႇမႃးၵေႃႉလဵဝ် ၊ ယႃႇပေၵႂႃႇတီႈဢမ်ႇမီးၵူၼ်း၊ ၵူၼ်းၶၢတ်ႇ ၊ ၽွင်းၵႂႃႇၸွမ်းတၢင်း ပေႃးၵူၼ်းပႅၵ်ႇၼႃႈ ႁႄႉရူတ်ႉၵေႃႈ တိုၼ်းယႃႇပေၵိုတ်းပၼ် ၊ ႁႂ်ႈၾၢင်ႉၵၼ်ၵႂႃႇမႃးၼႆ -ၼၢင်းယိင်းၽူႈၸွႆႈထႅမ်ၼႂ်းဝၢၼ်ႈၼႂ်းၶူင်ႇ ပၼ်ၾၢင်ႉလၢတ်ႈၼင်ႇၼႆ ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ