ဝၼ်းတီႈ 06/04/2025 ယၢမ်းႁူဝ်ၶမ်ႈမွၵ်ႈ 4 မူင်း ၾႆးမႆႈႁိူၼ်းလင်ၼိုင်ႈ ၾၢႆႇလင်ႁူင်းပလိၵ်ႈ မၢႆ 2 ၼႂ်းပွၵ်ႉမင်ႇၵလႃႇဢူး ဝဵင်းတူၼ်ႈတီး ၸိုင်ႈတႆးပွတ်းၸၢၼ်း။
ႁိူၼ်းလင်ၼၼ်ႉ ပဵၼ်ႁိူၼ်းသဝ်း ၶႃႈႁၢပ်ႇၵၢၼ်ၶုၼ် တေႃႇၵေႇတီႇ မီးဝႆႉၾၢႆႇလင် ႁူင်းပလိၵ်ႈ မၢႆ 2 ဝဵင်းတူၼ်ႈတီး။ ပဵၼ်ယွၼ်ႉၾႆးၾႃႉသျွတ်ႉသေ ၾႆးတႄႇလၢမ်းမႆႈၵႂႃႇတင်းလင် ဝႃႈၼႆ။
ဝၼ်းတီႈ 05/04/2025 ယၢမ်းၵၢင်ၼႂ်မွၵ်ႈ 10 မူင်း ၼၼ်ႉၵေႃႈ ၾႆးမႆႈႁိူၼ်း ၼၢႆးဢွင်ႇမိၼ်ႉ ဝၢၼ်ႈၵုၼ်လူင် ၸႄႈဝဵင်းၼမ်ႉၶမ်း ၸိုင်ႈတႆးပွတ်းႁွင်ႇ ၶူဝ်းႁိူၼ်းယေးဢမ်ႇတၼ်းလႆႈသင်၊ လွင်ႈၵူၼ်းမၢတ်ႇၸဵပ်းလူႉတၢႆ တႄႉဢမ်ႇမီး။ ၼၼ်ႉၵေႃႈ ပဵၼ်ယွၼ်ႉၾႆးၾႃႉသျွတ်ႉသေ ၾႆးလၢမ်းမႆႈၵႂႃႇတင်လင် ဝႃႈၼႆ။
မိူဝ်ႈဝၼ်းတီႈ 04/04/2025 ယၢမ်းၵၢင်ဝၼ်း 11 မူင်းၶိုင်ႈ ၼၼ်ႉၵေႃႈ ၾႆးမႆႈႁိူၼ်းယေးၵူၼ်းဝၢၼ်ႈ တီႈပွၵ်ႉ 5 ဝဵင်းၵူတ်ႉၶၢႆ ၸိုင်ႈတႆးပွတ်းႁွင်ႇ လင်ၼိုင်ႈ။
ၼႂ်းဝၼ်းတီႈ 03/04/2025 ယၢမ်းဝၢႆးဝၼ်း 2 မူင်း ၼၼ်ႉၵေႃႈ ႁူင်းႁႅမ်းၸိုဝ်ႈယႂ်ႇၼႂ်းၼွင်ႁၢႆးယႃႈ Myanmar Treasure Resort ဢၼ်မီးၾၢႆႇႁွင်ႇ မိူင်းသွၵ်ႇၼၼ်ႉ ယွၼ်ႉၾႆးမႆႈပႃႇလၢမ်းမႆႈသေ လူႉသုမ်းၵႂႃႇတင်းၼမ်။ ႁူင်းႁႅမ်းၼၼ်ႉ ၸဝ်ႈၶွင်ပဵၼ်ဢူးတေႇၸ ပဵၼ်ၽူႈမၢၵ်ႈမီးၸဝ်ႈငိုၼ်းသႃး ၸိုဝ်ႈသဵင်ယႂ်ႇၵေႃႉၼိုင်ႈ။
မိူဝ်ႈဝၼ်းတီႈ 01/04/2025 ၼၼ်ႉၵေႃႈ ၾႆးမႆႈႁၢၼ်ႉၶၢႆသၢင်ႇၵၢၼ်း ပရိၵ်ႈၶရႃႇ တီႈဝဵင်းပၢင်လူင် ၸိုင်ႈတႆးပွတ်းၸၢၼ်း၊ လူႉသုမ်းၶူဝ်းၶွင်းတင်းၼမ်သေဢမ်ႇၵႃး မီးၵူၼ်းလူႉတၢႆၸွမ်းထႅင်ႈ 4 ၵေႃႉ။
ယွၼ်ႉၼၼ် သင်တေဢွၵ်ႇႁိူၼ်းၵႂႃႇတၢင်းၼွၵ်ႈၼႆၸိုင် ထုၵ်ႇလီၾၢင်ႉ မုၵ်ႉၾႆး၊ ၾႆးတဵၼ်း၊ ၾႆးၾႃႉတင်း ၾႆးသႅင်လႅတ်ႇ ၸိူဝ်းၼၼ်ႉၵူႈဢၼ် ၼင်ႇႁိုဝ် တေလွတ်ႈၽေးၾႆး ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ