တီႈပၢင်တိုၵ်းဝဵင်းလွႆၶေႃ မိူင်းယၢင်းလႅင်ၼၼ်ႉ ၼႂ်းၶၢဝ်းတၢင်းလိူၼ်လဵဝ် ႁိူၼ်းယေးၵူၼ်းမိူင်း ၺႃးၽဝ် မီးၵႂႃႇ 60 ပၢႆၼႆ ၸုမ်းၵႅတ်ႇၶႄၸိူဝ်ႉၸၢတ်ႈယၢင်းလႅင် KNDF ပိုၼ်ၽၢဝ်ႇ မိူဝ်ႈဝၼ်းတီႈ 27 လိူၼ်ၵျူႊလၢႆႊ ၼႆႉၼင်ႇၼႆ။
KNDF လၢတ်ႈဝႃႈ – ပၢင်တိုၵ်းဢမ်ႇမီးသေတႃႉ သိုၵ်းမၢၼ်ႈ လၢမ်းလိမ်းယိုဝ်းၵွင်ႈလူင်သေ ၽဝ်ဝၢၼ်ႈ သူၼ်ႁိူၼ်းယေးၵူၼ်းဝၢၼ်ႈ ၼႂ်းဝၢၼ်ႈၼႂ်းဢိူင်ႇ ၼႂ်းၸႄႈဝဵင်းလွႆၶေႃ။ ဢၼ်မီးလွင်ႈပိုတ်းယိုဝ်းၵၼ်ၼႆႉ တေပဵၼ်တၢင်းဝၢၼ်ႈမိူင်းလူင် ဝၢၼ်ႈထူႊၻူႊငၢၼ်ႇသ ၊ ၸၼ်ႉၸွမ် ၼီးပၺ်ႇၺႃႇဝဵင်းလွႆၶေႃ ၸိူဝ်းၼႆႉ။
သိုၵ်းမၢၼ်ႈတႄႉ ပိုၼ်ၽၢဝ်ႇဝႃႈ ၶိုၼ်းၵုမ်းလႆႈဝဵင်းလွႆၶေႃသေ ၶိုၼ်းပူၵ်းပွင်ဝႆႉယူႇယဝ်ႉၼႆသေ ၶိုၼ်းႁွင်ႉ ၵူၼ်းမိူင်း ၸိူဝ်းပၢႆႈၽေးသိုၵ်း မႃးယူႇၶိုၼ်းႁိူၼ်းယေးၼႆသေတႃႉ ဢမ်ႇမီးၽႂ်ႁတ်းမႃးယူႇသဝ်းၶိုၼ်း။ ၾၢႆႇၼိုင်ႈ တၢင်းၼိုင်ႈ သိုၵ်းယၢင်းလႅင်ၶဝ်ၵေႃႈ ပၼ်ၾၢင်ႉၵူၼ်းမိူင်းဝႃႈ ႁႂ်ႈဝႆႉလွင်ႈႁူမ်ႇလူမ်ႈပဵၼ်လွင်ႈယႂ်ႇ ယႃႇၽူမ်ႉပွၵ်ႈၶိုၼ်းႁိူၼ်းယေး – သိုဝ်ႇၶၢဝ်ႇ RFA ဢွၵ်ႇဝႆႉၼင်ႇၼႆ။
