သိုၵ်းမၢၼ်ႈတီႉၺွပ်းၵူၼ်းမိူင်း ဝဵင်းလွႆၶေႃ မိူင်းယၢင်းလႅင်သေ သူင်ႇၾိုၵ်းၵၢၼ်သိုၵ်း ၊ ၵူၼ်းပၢႆႈၽေးသိုၵ်းၸိူဝ်းၸင်ႇႁႃပွၵ်ႈယူႇႁိူၼ်းၶိုၼ်းၼၼ်ႉ လႆႈဢွၼ်ၵၼ်ငိူင်ႉပၢႆႈထႅင်ႈၵမ်းၼိုင်ႈ။

ဢိင်ၼိူဝ်ပၢင်တိုၵ်းၽႅၼ်ယၼ်ႇသိုၵ်း 1111 ၼႂ်းမိူင်းယၢင်းလႅင်သေ ၵူၼ်းမိူင်းၼႂ်းၸႄႈဝဵင်းလွႆၶေႃ ဢိၵ်ႇဝဵင်းႁိမ်ႁွမ်းလႆႈပၢႆႈၽေးသိုၵ်းၶၢဝ်းတၢင်းပီပၢႆ။ ထိုင်တီႈသိုၵ်းမၢၼ်ႈ တေၸတ်း ပၢင်လိူၵ်ႈတင်ႈမႃး ၶိုၼ်းတဵၵ်းႁွင်ႉဢဝ် ၵူၼ်းပၢႆႈၽေးသိုၵ်း ပွၵ်ႈယူႇၶိုၼ်း ဝၢၼ်ႈၽႂ်မိူင်းမၼ်း –  ၵွၼ်ႇၼႃႈ လိူၼ်တီႊသႅမ်ႊပိူဝ်ႊ 2025 ၼႆႉႁႂ်ႈပွၵ်ႈယူႇၶိုၼ်းပိုၼ်ႉတီႈၽႂ်မၼ်း ႁႂ်ႈယဝ်ႉတူဝ်ႈဝႃႈၼႆ။  

ဝၢႆးပၢင်လိူၵ်ႈတင်ႈယဝ်ႉတူဝ်ႈသေ တႄႇဢဝ်ၼႂ်းလိူၼ် ၾႅပ်ႉပိဝ်ႊရီႊ ပီ 2026 ၼႆႉမႃး သိုၵ်းမၢၼ်ႈ တႄႇၵဵပ်းၵူၼ်းတႃႇၵႂႃႇၾိုၵ်းၵၢၼ်သိုၵ်း ၼိုင်ႈပွၵ်ႉၼႆႉ 2 ၵေႃႉ။

 တႄႇၼႂ်းလိူၼ်မၢတ်ႉၶျ် ၼႆႉမႃးတႄႉ သိုၵ်းမၢၼ်ႈလႄႇလမ်းႁႃတီႉၺွပ်း ၵူၼ်းၼုမ်ႇၵူၼ်းမိူင်းၸိူဝ်းဢွၵ်ႇၼွၵ်ႈႁိူၼ်းယၢမ်း ၵၢင်ၶမ်ႈၵၢင်ၶိုၼ်း ႁဵတ်းႁႂ်ႈၵူၼ်းမိူင်းဢမ်ႇမီးလွင်ႈႁူမ်ႇလူမ်ႈ  ။

ၼၢင်းယိင်းၵူၼ်းမိူင်းဝဵင်းလွႆၶေႃလၢတ်ႈၽူႈတွႆႇႁွၵ်ႈဝႃႈ -“ တႄႇႁွင်ႉၵူၼ်း ၵႂႃႇႁၢပ်ႇၵၢၼ်သိုၵ်းၼႆႉ တိုၵ်ႉမီးၼိုင်ႈလိူၼ်ၵူၺ်း ၊ ၵူၼ်းၸၢႆးဢႃယု 18 – 45 ၼိုင်ႈပွၵ်ႉၼႆႉ 2 ၵေႃႉ တေလႆႈၵႂႃႇၾိုၵ်း ၵၢၼ်သိုၵ်းၼႆ၊ ၼႂ်းလိူၼ်ၼႆႉတႄႉ ၼွၵ်ႈလိူဝ်ယွၼ်းယဝ်ႉၾၢႆႇၼိုင်ႈၵေႃႈ ၶဝ်တႄႇလမ်းတီႉၺွပ်းၵူၼ်းဢွၵ်ႇႁိူၼ်းယၢမ်း ၵၢင်ၶမ်ႈၵၢင်ၶိုၼ်း ၊ ၵွပ်ႈၼႆလႄႈ မီးၵၢၼ်လမ်ႇလွင်ႈၵႃႈႁိုဝ်ၵေႃႈ ပေႃးမိူင်းလပ်းသိင်ႇမႃးတႄႉ  ၽႂ်ၵေႃႈဢမ်ႇႁတ်းဢွၵ်ႇ ၼွၵ်ႈႁိူၼ်းယဝ်ႉ ၊ တီႈႁိူၼ်းႁဝ်းၵေႃႈ မီးလုၵ်ႈဢွၼ်ႇၸၢႆး တိုၵ်ႉႁဵၼ်းလိၵ်ႈဝႆႉၸၼ်ႉ G-12  လႄႈ လႆႈမႆႈၸႂ်ဝႆႉ”- ဝႃႈၼႆ ။

တွၼ်ႈတႃႇၵမ်ႉထႅမ်ၵူၼ်းၵႂႃႇၾိုၵ်းၵၢၼ်သိုၵ်းၼၼ်ႉၼႆသေ ၵၢင်ႉၵႄႇၼႂ်းပွၵ်ႉ ၵဵပ်းငိုၼ်းၼိုင်ႈႁိူၼ်းၼႆႉ သၢမ်မိုၼ်ႇပျႃး ထိုင် 1 သႅၼ်ပျႃး၊ မၢင်လင်လႆႈပၼ်ထိုင်  2 သႅၼ်ပျႃး ။ တႃႇၸၢင်ႈၵူၼ်းၵႂႃႇၾိုၵ်းၵၢၼ်သိုၵ်းသမ်ႉ ၼိုင်ႈၵေႃႉ 100 သႅၼ်ပျႃး ၼႆယဝ်ႉ ။

ၼၢင်းယိင်းပၢႆႈၽေးသိုၵ်းလၢတ်ႈၽူႈတွႆႇႁွၵ်ႈဝႃႈ -“ၵူၼ်းဢၼ်ၵိၼ်ၸၢင်ႈ တႃႇၵႂႃႇၾိုၵ်း ၵၢၼ်သိုၵ်းၼၼ်ႉၵေႃႈၶဝ်ဢမ်ႇလႆႈတဵမ် ၊ မၢင်ၸိူဝ်းလႆႈ 60 – 50 သႅၼ် ၊ မၢင်ၸိူဝ်းတင်းလႆႈ 30 သႅၼ်ပျႃးၵူၺ်း ဢမ်ႇလႆႈတဵမ် ၊ ငိုၼ်းၵေႃႈၵဵပ်း ၊ ၵၢင်ၶမ်ႈၵၢင်ၶိုၼ်းၵေႃႈ သမ်ႉတီႉထႅင်ႈယူႇပေႃး ဢမ်ႇမီးလွင်ႈႁူမ်ႇလူမ်ႈယဝ်ႉ ၊ ၵူၼ်းပၢႆႈၽေးသိုၵ်းဢၼ်ပွၵ်ႈမႃးၼၼ်ႉၵေႃႈ မၢင်ၸိူဝ်းပေႃးပၢႆႈၶိုၼ်းယဝ်ႉ”-ဝႃႈၼႆ ။ 

ယၢမ်းလဵဝ် ယွၼ်ႉသိုၵ်းမၢၼ်ႈတီႉၺွပ်းတႃႇႁၢပ်ႇၵၢၼ်သိုၵ်းလႄႈ ႁဵတ်းႁႂ်ႈၵူၼ်းပၢႆႈၽေးသိုၵ်းဢွၼ်ၵၼ်လႆႈငိူင်ႉပၢႆႈထႅင်ႈၵမ်းၼိုင်ႈ ဝႃႈၼႆ ။

ၼၢင်းယိင်းၵူၼ်းမိူင်းဝဵင်းလွႆၶေႃ ပၢႆႈၽေးသိုၵ်းယူႇဝႆႉတီႈဝဵင်းတူၼ်ႈတီးလၢတ်ႈၽူႈတွႆႇႁွၵ်ႈဝႃႈ -“ ႁိူၼ်းဢၼ်မီးလုၵ်ႈၸၢႆးၵေႃႈယဝ်ႉ ၊ ဢမ်ႇမီးလုၵ်ႈၸၢႆး ၵိုတ်းၵူၼ်းထဝ်ႈၵူၺ်းၵေႃႈယဝ်ႉ  ၊ ႁိူၼ်း ဢမ်ႇမီးၵူၼ်းယူႇၵေႃႈယဝ်ႉ  လႆႈသႂ်ႇငိုၼ်းတႃႇႁၢပ်ႇၵၢၼ်သိုၵ်းၵူႈလိူၼ် မၼ်းတေပိူင်ႈၵၼ်ဢႄႇလႄႈ ၼမ်ၵူၺ်းၼႆ”- ဝႃႈၼႆ ။

မိူဝ်ႈလိူၼ်ၾႅပ်ႉပိဝ်ႊရီႊပီ 2024 ၼၼ်ႉ သိုၵ်းမၢၼ်ႈပိုၼ်ၽၢဝ်ႇ ပၵ်းပိူင်ဝႃႈၵူၼ်းမိူင်းၵူႈၵေႃႉၸိူဝ်းပဵၼ်ၵူၼ်းၼုမ်ႇ သႅၼ်းဢႃႇယု 18 ပီတေႃႇထိုင် 35 ပီတေလႆႈၶဝ်ႈႁၢပ်ႇၵၢၼ်သိုၵ်း။ ဝၢႆးၼၼ်ႉၼိုင်ႈလိူၼ် သိုၵ်းမၢၼ်ႈတႄႇၵဵပ်းၵူၼ်းၼုမ်ႇသေ သူင်ႇၵႂႃႇၾိုၵ်းၵၢၼ်သိုၵ်း။

ယၢမ်းလဵဝ် ပၢင်သွၼ် ၾိုၵ်းၵၢၼ်သိုၵ်း ဢၼ်သိုၵ်းမၢၼ်ႈၸတ်းႁဵတ်းယူႇၼႆႉ ထိုင်မႃးပွၵ်ႈၵမ်း 22 ယဝ်ႉသေတႃႉ တီႈဝဵင်းလွႆၶေႃၼႆႉ ပဵၼ်ပွၵ်ႈဢၼ်တၢင်းသုတ်းၼႆယဝ်ႉ ။