တႄႇၼႂ်းႁၢင်လိူၼ် ဢေႃးၵတ်ႉသ် ၼႆႉမႃး ၾူၼ်တူၵ်းဢမ်ႇထၢတ်ႇ ၾၢႆႇၼိုင်ႈ သိုၵ်းမၢၼ်ႈသမ်ႉပိုတ်ႇၾၢႆၼမ်ႉမိူင်းပၢႆးလႄႈႁဵတ်းႁႂ်ႉၼမ်ႉၽီလူး ၼွင်းလူၼ်ႉၾင်ႇ ၶဝ်ႈထူမ်ႈၼႂ်းဝဵင်းလွႆၶေႃ ၊ ၵူၼ်းမိူင်းၸိူဝ်းယူႇတီႈတႅမ်ႇတီႈယၢၼ်းလႆႈပၢႆႈၽေးၼမ်ႉ။
ၵူၼ်းဢၼ်လႆႈငိူင်ႉပၢႆႈၽေးၼမ်ႉမီး 100 ပၢႆ ပဵၼ် ၵူၼ်းပွၵ်ႉတေႃးၼၶူႇ ၊ တေႃးဢူႉၶူႇ ၊ သူၺ်ႇတွင်ႇ လႄႈပွၵ်ႉဢၼ် မီးတီႈတႅမ်ႇ ၸိူဝ်းၼႆႉ ။
ၼၢင်းယိင်းၵူၼ်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ ၼမ်ႉၶိုၼ်ႈသုင် ႁွတ်ႈထိုင်ပိုၼ်ႉၶူဝ်ၼႂ်းဝဵင်းယဝ်ႉ ၊ ၾူၼ်တႄႉၵိုတ်းယဝ်ႉၵူၺ်းၵႃႈ လႆႈငိၼ်းဝႃႈသိုၵ်းမၢၼ်ႈပိုတ်ႇၾၢႆၼမ်ႉမိူင်းပၢႆးၼႆ။ ၼမ်ႉထူမ်ႈၼႂ်းဝဵင်းလွႆၶေႃ ၺႃးယူႇ 3-4 ပွၵ်ႉ။ ပွၵ်ႉတေႃးၼၶူႇ ထူမ်ႈတၢင်းပွၵ်ႉ။ လႆႈဢွၼ်ၵၼ်ပၢႆႈၶိုၼ်ႈႁႃတီႈသုင်ဝႆႉ ”- ဝႃႈၼႆ ။
ၵူၼ်းပၢႆႈၽေးသိုၵ်း ၸိူဝ်းပွၵ်ႈမႃးယူႇၶိုၼ်းဝဵင်းလွႆၶေႃသမ်ႉၵမ်ႈၼမ် ပဵၼ်ၵူၼ်းထဝ်ႈ ၊ ၼမ်ႉထူမ်ႈၸိူင်ႉၼႆ ဢမ်ႇၸၢင်ႈပၢႆႈၵႂႃႇတၢင်းလႂ် လႄႈ လႆႈယူႇဝႆႉၼိူဝ်ႁိူၼ်းမီးတၢင်းၼမ်ဝႃႈၼႆ။
မၼ်းၼၢင်းသိုပ်ႇလၢတ်ႈထႅင်ႈဝႃႈ -“ပေႃးၼမ်ႉၶိုၼ်ႈၸိူင်ႉၼႆႉ ဢွၼ်ၵၼ် ပၢႆႈႁင်းၽႂ်မၼ်း ၊ ဢမ်ႇမီးၸုမ်းလႂ် မႃးၸွႆႈထႅမ်ပၼ် ၊ ၵူၼ်းဢၼ်ပွၵ်ႈမႃးယူႇၶိုၼ်းၵေႃႈ ဢမ်ႇပႃးၵူၼ်းၼုမ်ႇ ပဵၼ်ၵူၼ်းထဝ်ႈၵမ်ႈၼမ် ယွၼ်ႉၼၼ် ပေႃးၼမ်ႉၶိုၼ်ႈ ပေႃးဢမ်ႇၸၢင်ႈပၢႆႈၵႂႃႇတင်းလႂ်ၵေႃႈ ဢွၼ်ၵၼ် ယူႇၼိူဝ် ႁိူၼ်းၸိူဝ်းၼၼ်ႉၵူၺ်းဢေႃႈ လူဝ်တၢင်းၸွႆႈထႅမ် ၶဝ်ႈၼမ်ႉတၢင်းၵိၼ်တႃႇၶဝ်ပႃးဢေႃႈ”- ဝႃႈၼႆ ။
ဢမ်ႇပွင်ႇၶၢဝ်ႇသေ ၵိုင်ႉၵၢင်ႉပိုတ်ႇၾၢႆၼမ်ႉမိူင်းပၢႆးၸိူင်ႉၼႆ ၵူၼ်းၼႂ်းပိုၼ်ႉတီႈ ဢမ်ႇတၼ်းလႆႈ ႁၢင်ႈႁႅၼ်းတူဝ် ၊ ဢမ်ႇတၼ်းၶၢႆႉပၢႆႈ။ ၵွပ်ႈၼႆလႄႈ ပေႃးတေပိုတ်ႇၾၢႆၼမ်ႉမိူင်းပၢႆးၼႆ ၶႂ်ႈႁႂ်ႈ ၽူႈမီးပုၼ်ႈၽွၼ်းၸိူဝ်းၵဵဝ်ၶွင်ႈ ပၼ်ၾၢင်ႉၼႂ်းၵူၼ်းပိုၼ်ႉတီႈ ၸိူဝ်းယူႇတီႈတႅမ်ႇ ၸိူဝ်းၼၼ်ႉၵွၼ်ႇ – ၵူၼ်းပိုၼ်ႉတီႈလၢတ်ႈၼင်ႇၼႆ ။
ယၢမ်းလဵဝ် တီႈဝဵင်းလွႆၶေႃ ၵူၼ်းပၢႆႈၽေးဢၼ်ပွၵ်ႈၶိုၼ်းႁိူၼ်း ပဵၼ်ၵူၼ်းထဝ်ႈၵူၼ်းၵႄႇ ၵမ်ႈၼမ်လႄႈ ယၢပ်ႇၽိုတ်ႇတႃႇႁႃၵိၼ်လဵင်ႉတွင်ႉဝႆႉ – ဝႃႈၼႆ ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ