ၾႆးမႆႈႁိူၼ်းယေး ၵူၼ်းဝၢၼ်ႈႁူးသူၼ် ၸႄႈဝဵင်းၵျွၵ်ႉမႄး တင်းမူတ်း 13 လင် ၶူဝ်းႁိူၼ်းယေး ဢမ်ႇတၼ်းလႆႈသင် မီးလွင်ႈလူႉယႂ်ႇသုမ်းၼမ် လွင်ႈၵူၼ်းလူႉတၢႆမၢတ်ႇၸဵပ်းတႄႉ ဢမ်ႇမီး။

ပူၼ်ႉမႃး ဝၼ်းတီႈ 19/03/2025 ယၢမ်းဝၢႆးဝၼ်း 2 မူင်းၶိုင်ႈ ၾႆးမႆႉႁိူၼ်းယေး ၵူၼ်းဝၢၼ်ႈႁူးသူၼ် ၼႂ်းၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ ယွၼ်ႉၾႆးၽိုၼ်းဢၼ်ၵိုတ်းဝႆႉ တီႈမုၵ်ႉ ၾႆးပႆႇမွတ်ႇလႄႈ လၢမ်းမႆႈႁိူၼ်းယေး လူႉသုမ်း 13 လင် ၼႆယဝ်ႉ။

ၵူၼ်းပိုၼ်ႉတီႈ ဝဵင်းၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ – “ၵူၼ်းဝၢၼ်ႈသမ်ႉ သႂ်ႇၾႆးၽိုၼ်း တုမ်ႈႁုင်ၵိၼ်ၶဝ်ႈၽၵ်းသေ ဢွၵ်ႇၵႂႃႇႁဵတ်းၵၢၼ် ၾႆးၽိုၼ်း ဢၼ်ၵိုတ်းဝႆႉတီႈ မုၵ်ႉၾႆး ၼၼ်ႉသမ်ႉ ဢမ်ႇမွတ်ႇလီ လူမ်းထွင်းသေ ႁဵတ်းႁႂ်ႈၾႆးၼၼ်ႉ လၢမ်းမႆႈႁိူၼ်းယေးၵူၼ်းဝၢၼ်ႈ တင်းမူတ်း 13 လင်။ ၶူဝ်းႁိူၼ်းယေးတႄႉ ဢမ်ႇတၼ်းလႆႈသင် မႆႈၸွမ်းၾႆးမူတ်း ၶႃႈ”- ဝႃႈၼႆ။

ၸဵင်ႇႁွင်ႇဝၼ်းတူၵ်း ယၢၼ်ဝဵင်းမွၵ်ႈ 12 လၵ်း ၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ ယွၼ်ႉၾႆးၽိုၼ်း ဢၼ်ၵိုတ်းဝႆႉ တီႈမူၵ်းၾႆးၼၼ်ႉ ပႆႇမွတ်ႇလႄႈ လၢမ်းမႆႈ ႁိူၼ်းယေး လူႉသုမ်း 13 လင် ၼႆယဝ်ႉ။

ဢိင်ၼိူဝ် လွင်ႈၾႆးမႆႈသေ လွင်ႈလူႉသုမ်း တင်းမူတ်း မီးၵႃႈႁိုဝ်ၼႆ ပႆႇလႆႈႁူႉႁူဝ်ယွႆႈမၼ်း တႅတ်ႈတေႃး။ ဝၢၼ်ႈႁူးသူၼ်ၼႆႉ ယၢၼ်ၵႆဝဵင်း 13 လၵ်း မီးၸဵင်ႇႁွင်ႇဝၼ်းတူၵ်းဝဵင်းၵျွၵ်ႉမႄး။ ယၢမ်းလဵဝ် တၢင်းပွတ်းတွၼ်ႈၼၼ်ႉသမ်ႉ ပဵၼ်ၼႂ်းပိုၼ်ႉတီႈ SSPP ၵုမ်းၵမ်ဝႆႉ ဝႃႈၼႆ။

ၵဵဝ်ႇၵပ်းလွင်ႈၼႆႉ ယူႇတီႈ Shan State Channel တႄႉ ဢွၵ်ႇဝႆႉဝႃႈ – လွင်ႈၾႆးလၢမ်းမႆႈၼႆႉ တႄႇမႃးတီႈ ႁိူၼ်းလုင်းၵျွင်းၶမ်း ယွၼ်ႉၾႆးၽိုၼ်း ဢၼ်တူမ်ႈႁုင်ၶဝ်ႈၽၵ်းဝႆႉၼၼ်ႉ ဢမ်ႇမွတ်ႈလီလႄႈ ၺႃးလူမ်းထွင်းႁႅင်းသေ တႄႇမႆႈမႃးတီႈႁိူၼ်းလင်ၼၼ်ႉယဝ်ႉ ၸင်ႇလၢမ်းမႆႈႁိူၼ်းယေး ၸိူဝ်းယူႇႁိမ်းႁွမ်းၼၼ်ႉမႃး ဝႃႈၼႆ။

ၼႂ်းလိူၼ်မၢတ်ႊၶျ်ၼႆႉၵူၺ်း ၾႆးမႆႈႁိူၼ်းယေး၊ ႁၢၼ်ႉၶၢႆၵုၼ်ႇ၊ ဢွင်ႈတီႈၵဵပ်းၶူဝ်းၵုၼ်ႇ ၸိူဝ်းၼႆႉမႃး ဢမ်ႇထၢတ်ႇ ၼႂ်းၸိုင်ႈတႆးပွတ်းႁွင်ႇ – ပွတ်းၸၢၼ်းၼႆႉ ဢမ်ႇယွမ်း 20 လင်ယဝ်ႉ။ မိူဝ်ႈဝၼ်းတီႈ 17/03/2025 ယၢမ်းၵၢင်ၼႂ် 10 မူင်းၶိုင်ႈ ၾႆးမႆႈ ႁၢၼ်ႉၶၢႆၶူဝ်းၵုၼ်ႇ 2 လင်၊ ဢွင်ႈတီႈၵဵပ်းၶူဝ်းၵုၼ်ႇ 4 လင်၊ ႁိူၼ်းယေး 2 လင် တီႈပွၵ်ႉ 5 ဝဵင်းၼမ်ႉၸၢင် ၸိုင်ႈတႆးပွတ်း ၸၢၼ်းၼၼ်ႉသမ်ႉ ယွၼ်ႉၾႆးတဵၼ်း။

မိူဝ်ႈဝၼ်းတီႈ 15/03/2025 ယၢမ်းၵၢင်ၼႂ်မွၵ်ႈ 11 မူင်း ၾႆးမႆႈႁိူၼ်းၵူၼ်းဝၢၼ်ႈ လင်ၼိုင်ႈ တီႈပွၵ်ႉၵၢတ်ႇလူင် ဝဵင်းႁူဝ်ပၢင်ႇ ၸိုင်ႈတႆးပွတ်းႁွင်ႇ။ ၼႂ်းဝၼ်းတီႈ 15 ၼၼ်ႉၵူၺ်း ယၢမ်း ၵၢင်ဝၼ်း ၾႆးမႆႈႁိူၼ်း ၵူၼ်းဝၢၼ်ႈ လင်ၼိုင်ႈ တီႈပွၵ်ႉရတၼႃႇ ဝဵင်းတူၼ်ႈတီး ၸိုင်ႈတႆးပွတ်းၸၢၼ်း ၼၼ်ႉသမ်ႉ ပဵၼ်ယွၼ်ႉၾႆးၾႃႉသျွတ်ႉ ဝႃႈၼႆ။

မိူဝ်ႈဝၼ်းတီႈ 10/03/2025 ယၢမ်းၵၢင်ၼႂ် 9 မူင်း ၾႆးမႆႈႁိူၼ်းယေးၵူၼ်းဝၢၼ်ႈ လင်ၼိုင်ႈ ၼႂ်းဢိူင်ႇပၢင်ႁၢင်ႇ ၸႄႈဝဵင်းၼမ်ႉၶမ်း ၼၼ်ႉၵေႃႈ ယွၼ်ႉၾႆးၾႃႉသျွတ်ႉ ၼႆယဝ်ႉ။

ယွၼ်ႉၼၼ် သင်တေဢွၵ်ႇႁိူၼ်း ၵႂႃႇတၢင်းၼွၵ်ႈၼႆၸိုင် ထုၵ်ႇလီၵူတ်ႇထတ်းတူၺ်း မုၵ်ႉၽိုၼ်းမုၵ်ႉၾႆး ၾႆးတဵၼ်းၼိူဝ်ၶဵင်ႇၽြႃးၸိူဝ်းၼႆႉ လီလီ။ ပေႃးပဵၼ်ၾႆးၾႃႉၵေႃႈ ထုၵ်ႇလီပိၵ်ႉဢိုတ်းဝႆႉ မဵင်းၾႆးၸိူဝ်းၼႆႉသေ ၸင်ႇဢွၵ်ႇတၢင်းၼွၵ်ႈၸိုင် တေၸၢင်ႈလွတ်ႈၽေး လွင်ႈၾႆးမႆႈႁိူၼ်းမႆႈယေး ၼႆယဝ်ႉ။