ၵူၼ်းမိူင်း ၸိူဝ်းယူႇသဝ်းၵိၼ်သၢင်ႈ ႁိမ်းၶၢင်ႈတၢင်းရူတ်ႉၾႆး ၼႂ်းဝဵင်းသီႇပေႃႉ ၸိူဝ်းၼၼ်ႉ တေလႆႈၶၢႆႉၼပ်ႉႁူဝ်ပၢၵ်ႇလင် ယွၼ်ႉ ဢွင်ႈတီႈလိၼ် ၸိူဝ်းၼၼ်ႉ ပဵၼ်ၶွင်လူင်ပွင်ၸိုင်ႈ ဝႃႈၼႆ။

ႁိူၼ်းယေး ၵူၼ်းဝၢၼ်ႈ ဢၼ်ႁဵတ်းယူႇသဝ်း ၸွမ်းၶၢင်ႈတၢင်းရူတ်ႉၾႆး (မီးရထား) ၸိူဝ်းတေလႆႈၶၢႆႉၼၼ်ႉ တေပဵၼ် ၼႂ်းပွၵ်ႉပူဝ်ႇတႃႇလႄႈ ပွၵ်ႉမၢၼ်ႈၸၢတ်ႈ ၼႂ်းဝဵင်းသီႇပေႃႉ ၸႄႈတွၼ်ႈၵျွၵ်ႉမႄး လင်ႁိူၼ်းဢမ်ႇယွမ်းပၢၵ်ႇ တေလႆႈၶၢႆႉ ႁႃတီႈယူႇမႂ်ႇ ယွၼ်ႉပဵၼ်တီႈလိၼ်လူင်ပွင်ၸိုင်ႈလႄႈ ယူႇတီႈ ႁွင်ႈၵၢၼ်ၾၢႆႇတေႃႉသူင်ႇရူတ်ႉၾႆး တႂ်ႈသိုၵ်းမၢၼ်ႈ ၵုမ်းၵမ် ဢွၵ်ႇလိၵ်ႈၸႂ်ႉၶၢႆႉ ၼႆယဝ်ႉ။

ၵူၼ်းပိုၼ်ႉတီႈ ဝဵင်းသီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ – “လွင်ႈၶဝ် ဢွၵ်ႇလိၵ်ႈၸႂ်ႉၶၢႆႉၼႆႉ မီးမႃး 2-3 ပီၼႆႉယဝ်ႉ။ ၵူၺ်းၵႃႈ ယဵၼ်ၵႂႃႇၵမ်းၼိုင်ႈသေ ၸူဝ်ႈသိုၵ်းမၢၼ်ႈ ယိုတ်းမိူင်းမႃးၼႆႉ ၶဝ်တူင်ႉၼိုင်ၶိုၼ်ႈႁႅင်းလႄႈ ၸႂ်ႉၶၢႆႉၶႃႈယဝ်ႉ။ ဢွင်ႈတီႈလိၼ် ၵူၼ်း မိူင်းယူႇ ၸွမ်းၶၢင်ႈရူတ်ႉၾႆးၼႆႉ မိူဝ်ႈပၢၼ်ဢင်းၵိတ်းၼၼ်ႉ ပဵၼ်တီႈလိၼ်လူင်ပွင်ၸိုင်ႈၼႆဝႃႇ။ ဝၢႆး ၼၼ်ႉမႃး ၶုၼ်မိူင်းၼႆႉ ပၼ် ၶဝ်ယူႇမႃးသေ ယၢမ်းလဵဝ် ၶႂ်ႈဝႃႈပဵၼ်မူႇဝၢၼ်ႈယႂ်ႇမႃးယဝ်ႉ။ မၢင်ႁိူၼ်းပေႃးႁဵတ်းႁိူၼ်းယႂ်ႇ ယူႇမႃး ႁိုင် 60-70 ပီ ၸူဝ်ႈလုၵ်ႈ ပၢၼ်လၢၼ်ၶဝ်မႃးယဝ်ႉ”- ဝႃႈၼႆ။

ၵမ်ႈၼမ် ႁိူၼ်းယေး ဢၼ်ယူႇၸွမ်းၶၢင်ႈတၢင်းရူတ်ႉၾႆးသေ တေလႆႈၶၢႆႉၼၼ်ႉ တေမီးမွၵ်ႈ 400 လင်ၼႆႉ။ ၵူၺ်းၵႃႈ တေလႆႈ ၶၢႆႉဝၼ်းလႂ်၊ လိူၼ်လႂ်လႄႈ တေၵႂႃႇယူႇတီႈလႂ် ၸိူဝ်းၼႆႉတႄႉ ပႆႇႁူႉ။

“ႁိူၼ်းယေး ၵူၼ်းဝၢၼ်ႈ ဢၼ်တေလႆႈၶၢႆႉၼႆႉ တေမီးမွၵ်ႈ 400 လင်ၼႆႉ လႆႈငိၼ်းဝႃႈ ၶဝ်တေပၼ်တီႈလိၼ် ၵႂႃႇယူႇ ၼႂ်းတပ်ႉၶဝ် ဢမ်ႇၼၼ် တၢင်းၼွၵ်ႈဝဵင်း ၼႆဝႃႇ။ ၵူၺ်းၵႃႈ တေလႆႈၶၢႆႉဝၼ်းလႂ် လိူၼ်လႂ် ၸိူဝ်းၼႆႉတႄႉ ဢမ်ႇႁူႉ။ ႁိူၼ်းယေး ဢၼ်ယူႇ ဝႆႉၸွမ်းၼၼ်ႉ တေပဵၼ်ႁိူၼ်းပီႈၼွင်ႉၸၢဝ်းမၢၼ်ႈ ဢၼ်လုၵ်ႉတၢင်းလိၼ်ထုင်ႉပဵင်းမႃးယူႇၵၼ်၊ ၶဝ်ၵေႃႈ ၶၢင်းပွင်ႉၵၼ်ဢေႃႈ ဢမ်ႇႁူႉတေၵႂႃႇယူႇတီႈလႂ်၊ ပဵၼ်ပၢၼ်သိုၵ်းမၢၼ်ႈၼႆႉ ႁႃၵိၼ်ယၢပ်ႇ ဢမ်ႇႁူႉဝႃႈ တေႁဵတ်း ႁိုဝ် ၼႆၸိူဝ်းၼႆႉ”- ၵူၼ်းပိုၼ်ႉတီႈ သိုပ်ႇလၢတ်ႈၼင်ႇၼႆ။

ႁိူၼ်းယေး ၵူၼ်းဝၢၼ်ႈ ဢၼ်ယူႇၸွမ်းၶၢင်ႈတၢင်းရူတ်ႉၾႆး ၼႂ်းဝဵင်းသီႇပေႃႉၼၼ်ႉ ၵမ်ႈၼမ် ပဵၼ်ၵူၼ်းမိူင်း ႁႃၸဝ်ႉ ၵိၼ်ၶမ်ႈ ၸွမ်းဝၼ်းလႂ် ဝၼ်းၼၼ်ႉ ပဵၼ်ၸၢဝ်းမၢၼ်ႈ လုၵ်ႉတၢင်းလိၼ်ထုင်ႉပဵင်းမႃးထၢင်ႈယူႇသဝ်း တင်းၼမ်သေ ႁၢၼ်ႉတေႃႇထိုင် ဝၼ်းလဵဝ် ၵမ်ႈၼမ် ပဵၼ်ႁိူၼ်းလဵၵ်ႉလဵၵ်ႉလွၵ်ႉလွၵ်ႉယူႇသဝ်းၵိၼ်းသၢင်ႈမႃး ယၢမ်းလဵဝ် ပဵၼ်မူႇဝၢၼ်ႈၵူၼ်းၵိုၼ်းၶွၼ်ႇၼမ် မႃးယဝ်ႉ ၵူၼ်းပိုၼ်ႉတီႈ ဝဵင်းသီႇပေႃႉလၢတ်ႈ။