ၵူၼ်းႁဵတ်း CDM ၼႂ်းဝဵင်းလႃႈသဵဝ်ႈ ဢွၼ်ၵၼ်ငိူင်ႉပၢႆႈ ၵႂႃႇမူၵ်းၸွမ်းဝၢၼ်ႈ ဢွင်ႈတီႈလွတ်ႈၽေးၽႂ်မၼ်း တင်းၼမ် ယွၼ်ႉသိုၵ်းမၢၼ်ႈ ၸွမ်းသွၵ်ႈတဝ် လမ်းတီႉၺွပ်းမႃးၶိူဝ်းယႂ်း ဢမ်ႇထၢတ်ႇ ။
တႄႇဢဝ် ႁူဝ်လိူၼ်ၵျႅၼ်ႊၼိဝ်ႊရီႊ 2023 ၼႆႉမႃး ၶွင်ႇသီႇသိုၵ်းမၢၼ်ႈ ယိုတ်းမိူင်း တႄႇသွၵ်ႈတဝ် လမ်းတီႉၺွပ်း ၵူၼ်းႁဵတ်း CDM ၸိူဝ်းပဵၼ်မေႃသွၼ်၊ ၽူႈႁၢပ်ႇၵၢၼ်လူင်ပွင်ၸိုင်ႈလႄႈ ၽူႈတူင်ႉၼိုင်ၵၢၼ်မိူင်း ၸိူဝ်းၼႆႉ ၼႂ်းဝဵင်းလႃႈသဵဝ်ႈ ၸိုင်ႈတႆး ပွတ်းႁွင်ႇ မႃးဢမ်ႇထၢတ်ႇ။
ၽူႈတူင်ႉၼိုင် ၼႂ်းတူင်ႇဝူင်းၵူၼ်း ဝဵင်းလႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ – “တေႃႈလဵဝ်ၼႆႉ သိုၵ်းမၢၼ်ႈ ပလိၵ်ႈမၢၼ်ႈ ၸွမ်း သွၵ်ႈႁႃ လမ်းတီႉၵူၼ်းၸိူဝ်းႁဵတ်း CDM ၸိူဝ်းၼႆႉမႃးၶိူဝ်းယႂ်းယဝ်ႉ။ တႄႇၼႂ်းလိူၼ်ၼႆႉမႃး ၶဝ်တႄႇတီႉၺွပ်း မႃးႁၢဝ်ႈႁႅင်း။ ၵမ်ႈၼမ် ၵူၼ်းၸိူဝ်းႁဵတ်း CDM ဢွၼ်ၵၼ်ပၢႆႈၵႂႃႇမူၵ်းသွၼ်ႈ ၸွမ်းဝၢၼ်ႈၼွၵ်ႈမႃးပၢင်ႇ တီႈလွတ်းၽေး တင်းၼမ်ယဝ်ႉ။ လႆႈႁူႉဝႃႈ ၼႂ်းလိူၼ်ၼႆႉ သိုၵ်းမၢၼ်ႈ ဢၢၼ်းတေတီႉၺွပ်းၵူၼ်း 500 ၵေႃႉ” – ဝႃႈၼႆ။
ပိူင်လူင် သိုၵ်းမၢၼ်ႈလိုပ်ႈလမ်းတီႉၺွပ်းၵူၼ်း CDM ၸိူဝ်းပၢႆႈၵႂႃႇယူႇသဝ်းတၢင်ႇတီႈသီႇလႅၼ်သေ ၶိုၼ်းပွၵ်ႈမႃးယူႇၶိုၼ်းႁိူၼ်းယေးဝၢၼ်ႈဢိူင်ႇၸိူဝ်းၼၼ်ႉ ။ ၶၢဝ်းသိုၵ်းမၢၼ်ႈမႃးသွၵ်ႈမႃးထၢမ်သမ်ႉပဵၼ်ၶၢဝ်းယၢမ်းၵၢင်ၶိုၼ်း ၽွင်းပိူၼ်ႈၼွၼ်းယဵၼ် ၊ တႃႇတေမႃးၵူတ်ႇထတ်းၼၼ်ႉၵေႃႈဢမ်ႇပၼ်ၶၢဝ်ႇႁူဝ်ႈ ဢမ်ႇတၼ်းပၼ်ၵူၼ်းမိူင်းႁူႉတူဝ် ၵူၼ်းၼုမ်ႇလႃႈသဵဝ်ႈလၢတ်ႈၼင်ႇၼႆ။
ပူၼ်ႉမႃး မိူဝ်ႈဝၼ်းတီႈ 9/1/2023 ၼၼ်ႉ မေႃသွၼ် CDM 4 ၵေႃႉလႄႈ ၵူၼ်းၼုမ်ႇတူင်ႉၼိုင်ၼႂ်းၵၢၼ်မိူင်း 2 ၵေႃႉ ယူႇပွၵ်ႉ 10 ဝဵင်းလႃႈသဵဝ်ႈ ထုၵ်ႇသိုၵ်းမၢၼ်ႈ ယိုတ်းမိူင်း တီႉၺွပ်း ယဵတ်ႈၶွၵ်ႈ။
မိူဝ်ႈဝၼ်းတီႈ 15 ၼၼ်ႉၵေႃႈ သိုၵ်းမၢၼ်ႈ တီႉၺွပ်းမေႃသွၼ် CDM 2 ၵေႃႉ တီႈဝဵင်းၵျွၵ်ႉမႄး လိူဝ်ၼၼ်ႉ ၼႂ်းၸႄႈဝဵင်းသီႇ ပေႃႉ မေႃသွၼ် CDM 4 ၵေႃႉလႄႈ ၵူၼ်းၼုမ်ႇ 7 ၵေႃႉ။
တႄႇဢဝ် ဝၼ်းတီႈ 1/2/2021 ၼၼ်ႉမႃး တေႃႇထိုင်ယၢမ်းလဵဝ် သိုၵ်းမၢၼ်ႈ ယိုတ်းဢႃႇၼႃႇၸိုင်ႈမိူင်း ၶိၼ်ႁဵတ်းၶုၼ် မီးၶၢဝ်းတၢင်း 723 ဝၼ်း ။ ၵူၼ်းမိူင်းၸိူဝ်းထုၵ်ႇၶႃႈႁႅမ်တၢႆမီး 2,826 ၵေႃႉ၊ ထုၵ်ႇတီႉၺွပ်း ယဵတ်ႈၶွၵ်ႈ 17,438 ၵေႃႉ ၸုမ်းၸွႆႈထႅမ် ၵူၼ်း တူၵ်းၶွၵ်ႈၵၢၼ်မိူင်း မိူင်းမၢၼ်ႈ AAPP ဢွၵ်ႇဝႆႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ