ၵူၼ်းဝၢၼ်ႈၼႃးယွင်း ဢွၵ်ႇၸႂ်ယွင်ႇမႃႈ ၽၼ်းၵူၼ်းဝၢၼ်ႈလဵဝ်ၵၼ် 2 မႄႈလုၵ်ႈ ၵေႃႉပဵၼ်လုၵ်ႈၸၢႆး ဢႃယု 5 ၶူပ်ႇတၢႆထင်တီႈ ၵေႃႉပဵၼ်မႄႈ မၢတ်ႇၸဵပ်းလိူဝ်ႁႅင်း။
မိူဝ်ႈဝၼ်းတီႈ 7/1/2023 ၵၢင်ၶမ်ႈ 9 မူင်းၶိုင်ႈၼၼ့် ၵူၼ်းၸၢႆးၵေႃ့ၼိုင်ႈ ယူႇဝၢၼ်ႈယၢၼ်ႇဢွင်ႇ ဢိူင်ႇၼႃးယွင်း ဝဵင်းတႃႈလိူဝ်ႇ ၸႄႈတွၼ်ႈတႃႈၶီႈလဵၵ်း ဢွၵ်ႇၸႂ်ယွင်ႇမႃႈ ပႃးၽႃႉမိတ်ႈဢွၵ်ႇႁိူၼ်းမႃးၽၼ်း သွင်မႄႈလုၵ်ႈဢၼ်ၼင်ႈဢွမ်ႇၾႆးယူႇၵၢင်ဝၢင်းႁိူၼ်းၶဝ်ၼၼ်ႉ။
ၽူႈၶဝ်ႈၸုမ်းၸွႆႈ တူင်ႇဝူင်းၵူၼ်းတႃႈလိူဝ်ႇ(လေႃးၵပႃႇလ)လၢတ်ႈတီႈၽူႈတွႆႇႁွၵ်ႈဝႃႈ –“ၸႂ်ႈဢေႃႈ၊ ၵူၼ်းၵိၼ်ယႃႈ ယွင်ႈယႃႈသေ ၽၼ်းသွင်ၵေႃ့မႄႈလုၵ်ႈ ဢၼ်မႃးလႄႇ တီႈႁိူၼ်းၶဝ်ၼၼ့်ဢေႃႈ ။ ပဵၼ်တေႃႇၼႃႈမေးမၼ်းဢေႃႈ ။ မေးမၼ်းၵေႃႈ မႃးႁၢမ်ႈယူႇ ။ ပေႃးဢမ်ႇမီးၵူၼ်းႁၢမ်ႈတႄ့ ၶႅၼ်းတေႁၢင်ႈႁၢႆႉလိူဝ်ၼၼ်ႉထႅင်ႈ။ ၽူႈယိင်းၵေႃႉၺႃးၽၼ်းၼၼ်ႉ မၢတ်ႇၸဵပ်းတီႈၶႅၼ်ၾၢႆႇသၢႆ့လႄႈ ႁူဝ်မၼ်းဢေႃႈ။လုၵ်ႈၸၢႆးမၼ်းသမ့် ၺႃးၽၼ်းတီႈႁူဝ်မၼ်းႁၢဝ်ႈႁႅင်းသေတၢႆပႅတ်ႈဢေႃႈ။ ” – ဝႃႈၼႆ။
မႄႈလုၵ်ႈဢွၼ်ႇၵေႃႉၺႃးၽၼ်းၼၼ်ႉ မီး ဢႃယု 25 ပီ လႄႈ လုၵ်ႈၸၢႆးဢွၼ်ႇ မၼ်းဢၼ်တၢႆၵႂႃႇၼၼ်ႉ ဢႃယု 5 ၶူပ်ႇ။ ၶႃမႄႈလုၵ်ႈ ယူႇဝၢၼ်ႈယၢၼ်ႇဢွင်ႇ ဢိူင်ႇၼႃးယွင်း ဝဵင်းတႃႈလိူဝ်ႇ ၸႄႈတွၼ်ႈတႃႈၶီႈလဵၵ်း။ ၾၢႆႇၸုမ်းၸွႆႈတူင်ႇဝူင်းၵူၼ်းလေႃးၵပႃႇလ ၸွႆႈသူင်ႇယူတ်းယႃထိုင် ႁူင်းယႃလူင်ၵဵင်းတုင်။ လုၵ်ႈဢွၼ်ႇတႄ့ မၢတ်ႇၸဵပ်းလိူတ်ႈတူၵ်း ႁၢဝ်ႈႁႅင်းလႄႈတၢႆတီႈႁူင်းယႃလူင်ၵဵင်းတုင်။
ၵူၼ်းၸၢႆးဢၼ်ၽၼ်းသွင်ၵေႃႉမႄႈလုၵ်ႈၼႆ့ ၸိုဝ်ႈ ၵူဝ်ႇယေႃးၼ ဢႃယု 36 ပီ၊မိူဝ်ႈလဵဝ် ၾၢႆႇပလိၵ်ႈမၢၼ်ႈတိၺွပ်းၵုမ်းၶင်ဝႆ့ တီႈတႃႈလိူဝ်ႇ တႃႈၶီႈလဵၵ်း ။
ဝၢႆးသေ သိုၵ်းမၢၼ်ႈယိုတ်းမိူင်းမႃးၼႆ့ ၵူၼ်းမိူင်းဢမ်ႇမီးလွင်ႈႁူမ်ႇလူမ်ႈ၊ဝၢၼ်ႈမိူင်းၵေႃႈ ဢမ်ႇမီးပၵ်းမီးပိူင်၊ၽူႈလၵ့်ၸၵ့်ၶုတ်ႈလႄႈ ၵူၼ်းသူႇသမ်းၵိၼ်ယႃႈ ၼႂ်းဝၢၼ်ႈၼႂ်းမိူင်းၵေႃႈလိူင်ႇၼမ်မႃး။
ဢိင်ၼိူဝ်လွင်ႈၼႆ့သေ ၵူၼ်းတႃႈလိူဝ်ႇလၢတ်ႈတီႈၽူႈတွႆႇႁွၵ်ႈဝႃႈ – “ ၵူၼ်းၵိၼ်ယႃႈၵိၼ်ၾိၼ်ႇၼႆ့ ၶႂ်ႈမီးၵူႈပွၵ့်ၵူႈယွမ်ႇယဝ့်ၶႃႈ။ၸဵမ်ၼုမ်ႇၸဵမ်ထဝ်ႈ ဢေႃႈ။ၾၢႆႇၽူႈမီးပုၼ်ႈၽွၼ်းၶဝ်ၵေႃႈ ဢမ်ႇႁၢမ်ႈဢမ်ႇသီးသင်။ပၢင်တေႃႇပၢင်လွင်း သမ့်ပၢႆလိူင်ႇၼမ်ထႅင်ႈ” – ဝႃႈၼႆ။
ဝဵင်းတႃႈလိူဝ်ႇၼႆ့ ပေႃးဢဝ် သဵၼ်ႈမၢႆႁူဝ်ၵူၼ်း ပီ 2019 လိူၼ် သႅပ်ႊထိမ်ႊပိူဝ်ႊ ဝႃႈၸိုင် ႁူဝ်ၵူၼ်း မီးႁိမ်း 30000 ။ၵႆၵၼ်တင်း တႃႈၶီႈလဵၵ်း 27 လၵ်း။ ပဵၼ်ႁိမ်းလႅၼ်လိၼ်ထႆး လႄႈ ၵူၼ်းယူႇသဝ်းၵႃႉၶၢႆၵေႃႈမီးၸွတ်ႇၸေး လွတ်ႈလႅဝ်း။
