တႄႇဢဝ်ပီ 2021-2022 မႃးၼႆ့ တီႈဝဵင်းၵဵင်းတုင် ၾၢႆႇၾႆးၾႃ့လႄႈ ၶွမ်ႊပၼီႊ ဢိၼ်ႊတၼႅတ်ႉ ဝၢႆႊၾၢႆႊ  ၽႅၼ်သၢႆဝၢႆႊယႃႊ သၢႆၶေႊပႄႊလ်(cable)ၸွမ်းလၵ်းၾႆး ၸွမ်းသဵၼ်ႈတႃႈသၢႆတၢင်းၵၢင်ဝဵင်း၊ ၽႅၼ်ဝႆႉတႅမ်ႇၼႃႇလႄႈ ရူတ်ႉၵႃး ရူတ်ႉၶိူင်ႈၵႂႃႇမႃးယၢပ်ႇ ၸၢင်ႈပဵၼ်ၽေးတေႃႇၵူၼ်းမိူင်း၊ ပေႃးပဵၼ်ရူတ်ႉယႂ်ႇယိင်ႈၶႅၼ်းဢမ်ႇၸၢင်ႈၵႂႃႇမႃးၶဝ်ႈဢွၵ်ႇၸွမ်းၵိဝ်ႇၸွမ်းပွၵ်ႉ  ။

ၵူၼ်း ၵဵင်းတုင်ၵေႃ့ၼိုင်ႈလၢတ်ႈတီႈ ၽူႈတွႆႇႁွၵ်ႈဝႃႈ-“ ၸႂ်ႈဢေႃႈ သဝ်ၾႆးၾႃ့ၵေႃႈ ပေႃးတႅမ်ႇဝႆ့ ယူႇယဝ့်ၼႃႇၼေႃႈ။ သၢႆဝၢႆႊၾၢႆႊသမ့်မႃးၽႅၼ်ၸွမ်းထႅင်ႈ ယၢၼ်းတိူင့်ၵိူင့်တၢင့်ၵၢင့်လူင်ႁေ မၢင်ပွၵ်ႈ ယွၼ်ႇတူၵ်းပေႃးထိုင်ၸွမ်းလိၼ် ။ ၾၢႆႇၵဵဝ်ႇၶွင်ႈဢမ်ႇ ၵဵပ်းမႃးသိမ်း  ။တေၵႂႃႇဢဝ်ပႅတ်ႈႁင်းၵူၺ်းႁဝ်းၵေႃႈ ၵူဝ်ၾႆးသွတ့်။ပေႃးပဵၼ်ၵႃးလူင်တၢင်ႇၵုၼ်ႇၼႆႉယိင်ႈၶႅၼ်းၵႂႃႇမႃးယၢပ်ႇ။ လႆႈပႃးမႆႉယၢဝ်းလူင်သေ ယုၵ်ႉသၢႆၾႆးၸိူဝ်းၼၼ်ႉယဝ်ႉၸင်ႇၵႂႃႇမႃးလႆႈဢေႃႈ။ ပေႃးၵႂႃႇမႃး ယၢမ်းၵၢင်ၶမ်ႈၵၢင်ၶိုၼ်းႁိုဝ်ႉ ၸိူဝ်းၼႆႉဢမ်ႇႁၼ်လီလီတႄႉ ၸၢင်ႈပဵၼ်ၽေးတေႃႇၵူၼ်းဝၢၼ်ႈၵွၼ်ႇဢေႃႈၼၼ်ႉ။  ၸဝ်ႈဝၢႆႊၾၢႆႊၶဝ်ၸိူဝ်းၼၼ့်ၵေႃႈ ပေႃးပိူၼ်ႈဢမ်ႇၸၢႆႇငိုၼ်းၶဝ်ၼႆ ၶဝ်သမ့်မႃးတတ်းပႅတ်ႈ သၢႆပိူၼ်ႈပေႃးယုင်ႈယၢင်ဝႆ့ဢေႃႈ တတ်းယဝ်ႉသမ်ႉဢမ်ႇၵဵပ်းသိမ်းပၼ်ပႃးၼၼ်ႉၶႃႈၼႃႇ”- ဝႃႈၼႆ။

ၶွမ်ႊပၼီႊဝၢႆႊၾၢႆႊ ဢၼ် မႃးတင်ႈဝႆ့တီႈဝဵင်းၵဵင်းတုင်ၼႆႉ မီးလၢႆလၢႆဢၼ် မိူၼ်ၼင်ႇ MPT , GGH , I’m Net , My Tel ၸိူဝ်းၼႆႉ။ ၼႂ်းၼၼ့် ၶွမ်ႊပၼီႊ ဝၢႆႊၾၢႆႊ GGH လႄႈ I’m Net  ၵူၼ်းမိူင်း ၸႂ်ႉၼမ်လိူဝ်တၢင်ႇဢၼ်။မၢင်ႁိူၼ်းၸႂ်ႉ ဝၢႆႊၾၢႆႊယဝ့်သေ ပေႃးဢမ်ႇတၼ်းၵႂႃႇၸၢႆႇၵႃႈမၼ်း မႅၼ်ႈၸွမ်းၶၢဝ်းယၢမ်းၸိုင် ၾၢႆႇၶွမ်ႊပၼီႊၶဝ် ၵႅတ်းပႅတ်ႈသၢႆတေႃႇၸူးႁိူၼ်းၸိူဝ်းၼၼ့်သေ ယုင်ႈယၢင်ႈဝႆ့ၵေႃႈမီးတင်းၼမ်။

ၵူၼ်းႁေႃႈၵႃးလူင်ၵေႃ့ၼိုင်ႈလၢတ်ႈဝႃႈ – “ ၸႂ်ႈဢေႃႈ သၢႆၾႆးသၢႆဢီႈသင်ဢီႈသိင်ၵေႃႈ ဢမ်ႇႁူ့ယဝ့် မၼ်းၼမ်မႃးၼႃႇ ၵဵင်းတုင်ၼႆ့။ ၶႂ်ႈဝႃႈ ပေႃးမီးႁိူၼ်းၵူၼ်း ၸွမ်းၶႅပ်ႇတၢင်း မၼ်းတိုၼ်းမီးသၢႆယုင်ဝႆ့ယူႇယဝ့် ။ ပေႃးပဵၼ်လႆႈတႄ့ ၶႂ်ႈႁႂ်ႈသဝ်ၾႆးသုင်လိူဝ်ၼႆ့ ၼၼ့်ၼႃႇၼေႃႈ။မိူဝ်ႈလဵဝ်သမ့် တႃႇသၢႆၾႆးၾႃ့တႄ့လွတ်ႈယူႇၼႆသေတႃ့ၵေႃႈ မၢင်တီႈသၢႆဝၢႆႊၾၢႆႊသမ့် ဢမ်ႇလွတ်ႈ၊ မၢင်တီႈသမ့် သၢႆၾႆးသၢႆဝၢႆႊၾၢႆႊပေႃး ထူင်ႇလူင်ဝႆ့ၵေႃႈမီးယဝ့် ၊ယၢပ်ႇၼႃႇ တႃႇတေလတ်းၵႂႃႇမႃးၼႆ့။မၼ်းဢမ်ႇၸႂ်ႈႁဝ်းၵူၺ်း ၸဝ်ႈၵႃးတၢင်ႇၵေႃ့ၵေႃႈ ပွင့်ဝႃႈပွင့်ယဝ့်ၼၼ့်။ပေႃးလူဝ်ႇၶဝ်ႈၵိဝ်ႇဢွၵ်ႇၵိဝ်ႇ ၵႂႃႇသူင်ႇၶွင်ၸွမ်းလၢၼ့်ၸွမ်းသႅင်ႇ မၼ်းတိုၼ်းလႆႈ ပႃးမႆ့သၢဝ်ႈတဝ့်သေ ၵႂႃႇယူႇယဝ့် ”- ဝႃႈၼႆ။

မိူဝ်ႈလဵဝ်ၼႂ်းဝဵင်းၵဵင်းတုင် ႁိူၼ်း၊ ႁၢၼ့်၊ ႁူင်းႁဵၼ်း၊ ဝတ့် ဢွၼ်ၵၼ်ၸႂ်ႉသၢႆဝၢႆႊၾၢႆႊ ဢိၼ်ႊတၼႅတ်ႉ   ပေႃးၸွတ်ႇတင်းမိူင်း။သဵၼ်ႈတၢင်းဢၼ်သၢႆၾႆးၾႃ့၊သၢႆဝၢႆႊၾၢႆႊ ယုင်ႈယၢင်ႈလႄႈ တႅမ်ႇၼႆ့ ပဵၼ် သဵၼ်ႈတၢင်းလူင် ဢၼ်မီးၼႂ်း ပွၵ့်ၼွင်ၶမ်း၊ပွၵ့် သၢဝ်းပႅတ်ႇ လႄႈ သဵၼ်ႈတၢင်းလူင် ၾၢႆႇၼႃႈလႄႈၾၢႆႇလင်ၵၢတ်ႇလူင်ဝဵင်းၵဵင်းတုင် ၸိူဝ်းၼႆ့။

ဢိင်ၼိူဝ်လွင်ႈၼႆ့သေ ၼင်ႇႁိုဝ်ၵႃးတၢင်ႇၵုၼ်ႇၶဝ်ပေႃးတေၵႂႃႇမႃးလႆႈလီၼၼ့်သေဢမ်ႇၵႃး ၼင်ႇႁိုဝ်တေလွတ်ႈၽေးၾႆးသွတ့်ၸိူဝ်းၼႆ့ သၢႆဝႃႊယႃႊ ၸိူဝ်းမီးၸွမ်းၶႅပ်ႇ သဵၼ်ႈတၢင်းလူင်လႄႈသင် သဵၼ်ႈတၢင်းၼႂ်းပွၵ့်ၼႂ်းယွမ်ႇလႄႈသင် ႁႂ်ႈၽူႈမီးပုၼ်ႈၽွၼ်းၶဝ် ၸတ်းႁဵတ်းပၼ် ႁႂ်ႈၶႅမ့်လႅပ်ႈတေတိူဝ်းလီၼႆ ၵူၼ်းပိုၼ့်တီႈ လၢတ်ႈၼႄတၢင်းႁၼ်ထိုင်ၼင်ႇၼႆ။