ဝၢႆးသေသိုၵ်းမၢၼ်ႈ ယိုတ်းမိူင်းမႃးၼႆႉ ၸုမ်းသိုဝ်ႇၶၢဝ်ႇၸၢဝ်းၶိူဝ်း ၼႂ်းမိူင်းႁူမ်ႈတုမ်ႁၢႆၵႂႃႇ ၸမ် 10 ၸုမ်းယဝ်ႉဝႃႈၼႆ။
ၵဵဝ်ႇၵပ်းလွင်ႈၼႆႉ မိူဝ်ႈဝၼ်းတီႈ 30/12/2022 ၸုမ်းၶၢဝ်ႇ BNI ၸတ်းပၢင်သပ်းၸႅင်ႈၶၢဝ်ႇ သိုပ်ႇမိုတ်ႈပပ်ႉလိၵ်ႈ (စစ်အာဏာသိမ်းကာလအတွင်း တိုင်းရင်းသားမီဒီယာများကိုလေ့လာခြင်း ) လဵပ်ႈႁဵၼ်း သိုဝ်ႇၶၢဝ်ႇၸၢဝ်းၶိူဝ်း ၶၢဝ်းသိုၵ်းမၢၼ်ႈယိုတ်းမိူင်း တီႈလုမ်း BNI ဢၼ်မီးတီႈဝဵင်းၵဵင်းမႆႇ ၸိုင်ႈထႆး။
ဝၢႆးသိုၵ်းမၢၼ်ႈ ယိုတ်းမိူင်းမႃးၼႆႉ ၸိူဝ်းပဵၼ်သိုဝ်ႇၶၢဝ်ႇ ပတ်းပိုၼ်ႉမိူင်းႁူမ်ႈတုမ်လႄႈသင် ၼႂ်းမိူင်းတႆးလႄႈသင် ၺႃးယုၵ်ႉလိူၵ်ႈ ဝႂ်လၢႆႊသိၼ်ႊသေဢမ်ႇၵႃး ၵူၼ်းႁဵတ်းၵၢၼ်ၶၢဝ်ႇၵေႃႈ ၺႃးတီႉၺွပ်းလူၺ်ႈမတ့်တႃ 505 ၸိူဝ်းၼၼ့်ၵေႃႈ မီးတင်းၼမ် ဝႃႈၼႆ။
ၼႂ်းပၢင်သိုပ်ႇမိုတ်ႈပပ်ႉလိၵ်ႈၼၼ်ႉၸၢႆးမိူင်း ႁူဝ်ပဝ်ႈၸုမ်း BNI လၢတ်ႈဝႃႈ -“ သိုၵ်းမၢၼ်ႈ ယိုတ်းမိူင်း ႁၢမ်ႈ သိုဝ်ႇၶၢဝ်ႇတင်းသဵင်ႈ တႅမ်ႈၶၢဝ်ႇ လွင်ႈ ပူၼ့်ပႅၼ်သုၼ်ႇလႆႈ သုၼ်ႇပဵၼ်ၵူၼ်း၊ သိုဝ်ႇၸိူဝ်းၶဝ်ႁၢမ်ႈဢမ်ႇလႆႈၼၼ့်ၵေႃႈ ၶဝ်ဢဝ်လိူင်ႈၸွႆးတြႃး၊ သိုဝ်ႇၶၢဝ်ႇမၢင်ဢၼ် တႃႇၽူႈသိုဝ်ႇၶၢဝ်ႇၶဝ်တေယူႇလွတ်ႈၼၼ်ႉ ႁွင်ႈၵၢၼ်ၶၢဝ်ႇလႆႈဢွၵ်ႇလိၵ်ႈ ဢွၵ်ႇၵၢၼ်ပၼ်ၵေႃႈမီး ။ ယွၼ့်ငဝ်းလၢႆးလၢႆလၢႆလွင်ႈသေ သိုဝ်ႇၶၢဝ်ႇဢၼ်ဢမ်ႇၸၢင်ႈ သိုပ်ႇတႅမ်ႈ ၶၢဝ်ႇ လႆႈၵိုတ်းၶမ်ႈၵႂႃႇပႅတ်ႈၼႆ့ တေမီးယူႇ 10 ၸုမ်းၸမ်ၸမ်ယဝ့်”- ဝႃႈၼႆ။
သိုဝ်ႇၶၢဝ်ႇၸၢဝ်းၶိူဝ်း ဢၼ်သိုၵ်းမၢၼ်ႈယိုတ်းမိူင်း သင်ပိၵ်ႉဝႂ်လၢႆႊသိၼ်ႊ ၸဝ့်ၸဵဝ်းၼၼ့် တေမီး မိူၼ်ၼင်ႇ သိုဝ်ႇၶၢဝ်ႇ မျိတ့်ၵျီးၼႃးၵျႃႇၼႄႇ(မြစ်ကြီးနားဂျာနယ်)၊ The 71 Media လႄႈ Tachileik News Agancy ၸဵမ်ၸိူဝ်းၼႆ့။
ၽူႈၶူၼ့်ၶႂႃ့ လွင်ႈငမ်းယဵၼ်(Peace Coordinator) ၼႂ်းၸုမ်း သိုဝ်ႇၶၢဝ်ႇ BNI လၢတ်ႈဝႃႈ-“ သိုၵ်းမၢၼ်ႈသင်ႇၵိုတ်းဝႂ်လၢႆႊသိၼ်ႊ သင်ႇသိုဝ်ႇၶၢဝ်ႇၵိုတ်းၵၢၼ်ငၢၼ်းသေ ဢမ်ႇၵႃး ႁႃလွၵ်ႇငိုတ်းတီႉၺွပ်းၵုမ်းၶင် ၽူႈတူင့်ၼိုင်ၼႂ်းၸုမ်းသိုဝ်ႇၶၢဝ်ႇၸၢဝ်းၶိူဝ်းမႃးႁၢဝ်ႈႁႅင်း ႁဵတ်းႁႂ်ႈ ပၢႆးတူဝ်ပၢႆးၸႂ် ၽူႈႁဵတ်းၵၢၼ်ၶၢဝ်ႇၶဝ် ဢမ်ႇမီးလွင်ႈႁူမ်ႇလူမ်ႈ”- ဝႃႈၼႆ။
ၼႂ်းၶၢဝ်းတၢင်းသိုၵ်းမၢၼ်ႈယိုတ်းမိူင်းမႃး ပၢၼ်သိုပ်ႇပၢၼ်ၼႆ့ ယွၼ့်မီးလွင်ႈၶီႇၼဵၵ်း တဵၵ်းတဵင်လႄႈသင် ယွၼ့်လွင်ႈ ႁႅင်းၵမ့်ထႅမ်ဢမ်ႇပဵင်း သိုဝ်ႇၶၢဝ်ႇယႂ်ႇ Mainstream Media လႄႈသင် တႃႇသိုဝ်ႇၶၢဝ်ႇၸၢဝ်းၶိူဝ်းတေၸုၵ်းမၼ်ႈၵႂႃႇလႆႈၶၢဝ်းႁိုင်ၼၼ့် ယၢပ်ႇယဵၼ်းဝႆ့။
ၽူႈၶူၼ့်ၶႂႃ့ လွင်ႈငမ်းယဵၼ်(Peace Coordinator) ၼႂ်းၸုမ်း သိုဝ်ႇၶၢဝ်ႇ BNI သိုပ်ႇလၢတ်ႈဝႃႈ -“
လွင်ႈၵမ့်ထႅမ် သိုဝ်ႇၶၢဝ်ႇၸၢဝ်းၶိူဝ်းလႄႈ Mainstream Media ဢမ်ႇဝႃႈလႆႈမႃးတီႈ ၸိုင်ႈမိူင်းလႂ်ၵေႃႈယဝ့် လႆႈမႃးတီႈၸုမ်းလႂ်ၵေႃႈယဝ့် မၼ်းတိုၼ်းပႅၵ်ႇပိူင်ႈၵၼ်ဝႆ့ယူႇ။လွင်ႈၼႆ့ ပဵၼ်ယွၼ့်သိုၵ်းမၢၼ်ႈယိုတ်းမိူင်း သိမ်းဢႃႇၼႃႇယဝ့်။တႃႇသိုဝ်ႇၸၢဝ်းၶိူဝ်းတေ သိုပ်ႇမီးၵႂႃႇလႆႈၶၢဝ်းယၢဝ်းၼၼ့် တေယၢပ်ႇ။ၸိူဝ်းဢၼ် လႆႈၵိုတ်းယင့်ၵေႃႈ မီးမႃးၼမ် ၸိူဝ်းဢၼ်သိုပ်ႇႁဵတ်းယူႇၸိူဝ်းၼႆ့ၵေႃႈ ဢဵၼ်ႁႅင်းၵူႈၸိူဝ့်ၵူႈလွင်ႈ ယူပ်ႈယွမ်းမႃးလွႆးလွႆးလႄႈ ထုၵ်ႇလီပၼ်ႁႅင်း သိုဝ်ႇၸၢဝ်းၶိူဝ်း မိူၼ်ၼင်ႇပၼ်ႁႅင်း သိုဝ်ႇၸၼ့်မိူင်းႁူမ်ႈတုမ်ၼၼ့်ယူႇ ”-ဝႃႈၼႆ။
မိူဝ်ႈလဵဝ် ယွၼ့်သိုၵ်းမၢၼ်ႈယိုတ်းမိူင်းသေ သိုဝ်ႇၶၢဝ်ႇဢၼ်မီးၼႂ်းမိူင်းၶျၢင်း 16 ၸုမ်းၼၼ့် လႆႈၵိုတ်းလိုဝ်ႈၵႂႃႇ 6 ၸုမ်း။သိုဝ်ႇၶၢဝ်ႇ ဢၼ်မီးၼႂ်းမိူင်းတႆးၵေႃႈ ၺႃးသင်ႇၵိုတ်းဝႆ့ 2 ၸုမ်း ၼႆယဝ့်။
သိုဝ်ႇၶၢဝ်ႇၸၢဝ်းၶိူဝ်းၸိူဝ်းပဵၼ်လုၵ်ႈၸုမ်းသိုဝ်ႇၶၢဝ်ႇ BNI ၼႆႉတေမီး 15 ၸုမ်း။ မိူၼ်ၼင်ႇ ၸုမ်းၶၢဝ်ႇၽူႈတွႆႇႁွၵ်ႈ SHAN ၸွမ်းၶၢဝ်ႇၶၢင် Kachin News Group ၸုမ်းၶၢဝ်ႇယၢင်းလႅင် Kantarawaddy Time ၸုမ်းၶၢဝ်ႇယၢင်းၽိူၵ်ႇ Karan Information Center ၸုမ်းၶၢဝ်ႇမွၼ်း Independent Mon News Agency ၸုမ်းၶၢဝ်ႇၶျၢင်း Chin World လႄႈ Khonumthung News ၸုမ်းၶၢဝ်ႇ ရၶႅင်ႇ Narinjara ၊ ၶၢဝ်ႇ Kaladan Press ၸုမ်းၶၢဝ်ႇ တႆးလႅင် The Voice of Shan Ni လိူဝ်ၼၼ်ႉ မိူၼ်ၼင်ႇၸုမ်းၶၢဝ်ႇ Development Media Group ၊ Mizzima ၊ Network Media Group၊ Than Lwin Time၊ Myitkyina Journal ၸိူဝ်းၼႆႉ။
