ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA) လႄႈတင်းတပ်ႉသိုၵ်းတဢၢင်း (TNLA) ၶဝ်ၶပ်းၶိုင်ဝႆႉ တႃႇတေႁူပ်ႉထူပ်းၵၼ် ၼႂ်းႁၢင်လိူၼ်မၢတ်ႊၶျ်ၼႆႉ သေတႃႉၵေႃႈ ယွၼ်ႉပိူဝ်ႈပၢင်တိုၵ်း ၼႂ်းၵႄႈသွင်ၾၢႆႇလႄႈ ပႆႇၸၢင်ႈပဵၼ်ႁူပ်ႉထူပ်းၵၼ်ယဝ်ႉၼႆ- ၽူႈၶၢၼ်ပၢၵ်ႇ RCSS/SSA ၸဝ်ႈသိုၵ်းၸၢႆးဢူး လၢတ်ႈ။

“ႁဝ်းၶႃႈယင်းပႆႇလႆႈလၢတ်ႈၵၼ်၊ ဝၼ်းမၼ်းတေပဵၼ်ဝၼ်းလႂ်ပႆႇႁူႉ။ တေပဵၼ်ႁူပ်ႉၵၼ်ႁိုဝ် ဢမ်ႇပဵၼ်ႁူပ်ႉၵၼ် ႁိုဝ်ၼၼ်ႉ ႁဝ်းၶႃႈတေလႆႈဢုပ်ႇဢူဝ်းငူပ်ႉငီႉၵၼ်ထႅင်ႈၵမ်းၼိုင်ႈ။ ပေႃးဝႃႈတေပဵၼ်ပၢင်ႁူပ်ႉထူပ်းဢုပ်ႇၵုမ်ၵၼ် ၼႆၵေႃႈ တၵ်းတေလႆႈပဵၼ်ပၢင်ႁူပ်ႉထူပ်းၵၼ် ဢၼ်မီးလွၼ်ႉၵႅၼ်မၼ်း။ ပေႃးဝႃႈႁူပ်ႉထူပ်းၵၼ်ယဝ်ႉ ဢမ်ႇၽေႃႇၼမ်ႉၼႄတူဝ် သင်လႆႈၼႆၵေႃႈ မၼ်းဢမ်ႇလၢၵ်ႇလၢႆးသင်မႃး၊ မၼ်းဢမ်ႇမီးလွင်ႈသင်။ ပၢင်ႁူပ်ႉထူပ်းၵၼ်ဢၼ်ဝႃႈၼႆႉ တေလႆႈမႃးဢုပ်ႇၵုမ်ၵၼ် ငူပ်ႉငီႉၵၼ်၊ ၼင်ႇႁိုဝ်တင်းသွင်ပႃႈသွင်ၾၢႆႇ တေၶႅမ်ႉလႅပ်ႈ ၵူႈလွင်ႈ။ ၾၢႆႇၼိုင်ႈၵေႃႈ တေလႆႈၸွမ်းပၼ်ၵၢင်ၸႂ် ဢၼ်ထႅင်ႈၾၢႆႇၼိုင်ႈၶႂ်ႈပဵၼ်။ ထႅင်ႈၾၢႆႇၼိုင်ႈၵေႃႈ တေလႆႈတူၺ်းၵၢင်ၸႂ်ထႅင်ႈၾၢႆႇၼိုင်ႈ”- ၸဝ်ႈသိုၵ်းၸၢႆးဢူး လၢတ်ႈ။

“သင်ၸိူဝ်ႉဝႃႈႁဝ်းမႃးဢုပ်ႇဢူဝ်းငူပ်ႉငီႉၵၼ်လႄႈ ဢမ်ႇၶႅမ်ႉလႅပ်ႈၼႆၸိုင် ႁူပ်ႉထူပ်းၵၼ်ယူႇၵေႃႈမိူၼ်တင်း ႁဝ်းၶႃႈဢမ်ႇႁူပ်ႉထူပ်းၵၼ်ၵူၺ်း၊ မၼ်းဢမ်ႇမီးလွင်ႈသင်။ ၵွပ်ႈၼၼ် ၸူဝ်ႈပႆႇလႆႈႁူပ်ႉထူပ်းဢုပ်ႇဢူဝ်းၵၼ်ၼႆႉ တင်းသွင်ပႃႈသွင်ၾၢႆႇ ငဝ်းလၢႆးမီးဝႆႉၸိူင်ႉႁိုဝ် ႁဝ်းၶႃႈတေလႆႈမႃးငူပ်ႉငီႉၵၼ်ထႅင်ႈၵမ်းၼိုင်ႈယူႇ”- ၸဝ်ႈသိုၵ်းၸၢႆးဢူး လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈ ၼင်ႇၼႆ။

တပ်ႉသိုၵ်း RCSS တင်း TNLA တႄႇပဵၼ်ပၢင်တိုၵ်းၵၼ်မႃးထႅင်ႈႁၢဝ်ႈႁႅင်း ၽွင်းႁူဝ်လိူၼ်မၢတ်ႊၶျ် 2018 တီႈၼႂ်းဢိူင်ႇၼႃးသၢႆး ၸႄႈဝဵင်းၼမ်ႉတူႈ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ။ လိူဝ်သေၼၼ်ႉ RCSS တင်း TNLA သွင်ၸုမ်းၼႆႉ ယင်းပဵၼ်ပၢင်တိုၵ်းၵၼ်တင်း သိုၵ်းလူင်ပွင်ၸိုင်ႈမၢၼ်ႈ တပ်ႉမတေႃႇထႅင်ႈ။ ပၢင်တိုၵ်းတိုၵ်ႉႁႃယဵၼ်ၵႂႃႇ ၼႂ်းၶၢဝ်းတၢင်း 2-3 ဝၼ်းၼႆႉၵူၺ်း။ ၾၢႆႇတၢင်းလူင်ပွင်ၸိုင်ႈၵေႃႈ ၸႂ်ႉႁိူဝ်းဝိၼ် တိုၵ်းသိုၵ်း ယိုဝ်းၸုမ်းသိုၵ်း သွင်ၸုမ်းၼႆႉလႄႈ ႁဵတ်းႁႂ်ႈၵူၼ်းဝၢၼ်ႈၼႂ်းဢိူင်ႇၼႃးသၢႆး ၼႂ်းၸႄႈဝဵင်းၼမ်ႉတူႈ လႆႈပၢႆႈၽေးသိုၵ်း မႃးယူႇတၢင်းဢိူင်ႇ မၢၼ်ႈၸၢမ်၊ ၶဝ်ႈယူႇၼႂ်းဝဵင်းၼမ်ႉတူႈ ၸိူဝ်းၼႆႉ။ မိူဝ်ႈလဵဝ် လႆႈမႃးၶၢဝ်းတၢင်းၽၢၵ်ႇလိူၼ်ၼိုင်ႈယဝ်ႉၵေႃႈ ယင်းပႆႇၸၢင်ႈပွၵ်ႈႁိူၼ်းၶိုၼ်း။

လိူဝ်သေၼၼ်ႉ ၸဝ်ႈသိုၵ်းၸၢႆးဢူး ယင်းလၢတ်ႈဝႃႈ- ၼႂ်းၸူဝ်ႈၸႃႈဝူင်ႈဝၢင်ႈ 2-3 ဝၼ်းၼႆႉ ပၢင်တိုၵ်း ဝူင်ႈၵၢင် RCSS တင်း TNLA တႄႉယဵၼ်ၵႂႃႇယဝ်ႉ၊ ဢမ်ႇပဵၼ်ယဝ်ႉ။ ၵွပ်ႈၼႆလႄႈ ၼႂ်းဝၼ်းတီႈ 30 လိူၼ်မၢတ်ႊၶျ်ၼႆႉ ၵူၼ်းပၢႆႈၽေးသိုၵ်း ဢၼ်မႃးမီးတၢင်းမၢၼ်ႈၸၢမ် ၼမ်ႉတူႈၸိူဝ်းၼႆႉၵေႃႈ ၶိုင်ဢၢင်ႈတေပွၵ်ႈမိူဝ်းႁိူၼ်းၶိုၼ်းယူႇ- ဝႃႈၼႆ။

TNLA တင်း RCSS ၼႆႉ တႄႇပဵၼ်ပၢင်တိုၵ်းၵၼ် ဝၢႆးလင် RCSS လူင်းလၢႆးမိုဝ်းလိၵ်ႈႁူမ်ႈမၢႆၵိုတ်းတိုၵ်း တူဝ်ႈမိူင်း NCA သေ ၶဝ်ႈႁူမ်ႈပၢင်ၵုမ်ႁူဝ်ပၢၵ်ႇပီ 21 ပၢင်လူင်။ သွင်ၾၢႆႇတႄႇပဵၼ်ပၢင်တိုၵ်းၵၼ်မႃးမိူဝ်ႈ ဝၼ်းတီႈ 27 လိူၼ်ၼူဝ်ႊဝႅမ်ႊၿိူဝ်ႊ 2015 မႃးတေႃႇထိုင်ဝၼ်းမိူဝ်ႈၼႆႉ။ သွင်ပႃႈသွင်ၾၢႆႇၼႆႉ ႁႃတၢင်းတႃႇတေ ဢုပ်ႇဢူဝ်းၵၼ် ပိူဝ်ႈတႃႇၵႄႈလိတ်ႈပၼ်ႁႃသေတႃႉ တေႃႇထိုင်ဝၼ်းမိူဝ်ႈၼႆႉၵေႃႈ ပႆႇပဵၼ်လႆႈ။