ၵူၼ်းပၢႆႈၽေးသိုၵ်း တီႈဝဵင်းမိူင်းမွၵ်ႇ ၸႄႈမိူင်းၶၢင် တုၵ်းယွၼ်းႁႂ်ႈသိုၵ်းမၢၼ်ႈ ၵိုတ်းၵၢၼ်ႁွၼ်ႈထဝ်ႇ လေႃႇတိုၵ်းသေ ထွၼ်တပ်ႉဢွၵ်ႇပၼ်ၶိုၼ်းပိုၼ်ႉတီႈ ႁႂ်ႈၵူၼ်းဝၢၼ်ႈလႆႈပွၵ်ႈဝၢၼ်ႈယူႇသဝ်းႁဵတ်းၵၢၼ် ႁႃၵိၼ်လဵင်ႉတွင်ႉ။

တႄႇဢဝ် ႁၢင်လိူၼ်ဢွၵ်ႊထိူဝ်ႊပိူဝ်ႊၼၼ်ႉမႃး တေႃႇထိုင်ႁၢင်လိူၼ်တီႊသႅမ်ႊပိူဝ်ႊ 2022   သိုၵ်းမၢၼ်ႈ ထႅမ်ႁႅင်းသိုၵ်း ႁွၼ်ႈထဝ်ႇ တူင်ႉၼိုင် လူမ်ႇတိုၵ်း ၸုမ်းသိုၵ်းၶၢင် KIA  တင်းသိုၵ်းၵႅတ်ႇၶႄ ၵူၼ်းမိူင်း PDF တၢင်းသၼ်လွႆလူင်ၵျႃႇ ထုင်ႉၾၢႆႇဢွၵ်ႇ ၸႄႈဝဵင်းမိူင်းမွၵ်ႇ ၼပ်ႉပၢၵ်ႇလႆႈပၢႆႈ။ ယၢမ်းလဵဝ်ၵေႃႈ သိုၵ်းမၢၼ်ႈ ပၵ်းတပ်ႉတီႈႁူဝ်ဝၢၼ်ႈ လူင်ၵျႃႇၸုမ်းၼိုင်ႈ၊ ငႃးသိုၵ်းၸုမ်းၼိုင်ႈ ႁႅင်းသိုၵ်း မွၵ်ႈ 200 သမ်ႉ ႁွၼ်ႈထဝ်ႇၵႂႃႇ မႃးတူင်ႉၼိုင်ႈ ၸွမ်းသၼ်လွႆ – ႁဵတ်းႁႂ်ႈၵူၼ်းမိူင်း ဢမ်ႇႁတ်းမိူဝ်းယူႇၶိုၼ်းဝၢၼ်ႈ။

ၵူၼ်းပၢႆႈၽေးသိုၵ်း ဝဵင်းမိူင်းမွၵ်ႇ လၢတ်ႈတီႈၽူႈတွႆႇႁွၵ်ႈဝႃႈ – “ ႁဝ်းၶႃႈ တုၵ်းယွၼ်း ႁႂ်ႈထွၼ် ဢွၵ်ႇၼႂ်းပိုၼ်ႉ တီႈၼႆႉ ၵူဝ်ပဵၼ်ပၢင်တိုၵ်း၊ ပူၼ်ႉမႃး 3 ဝၼ်းၼႆႉ သိုၵ်းမၢၼ်ႈၶဝ် တေႃႉသူင်ႇၶဝ်ႈၼမ်ႉ တင်းၵိၼ်ၶဝ်မႃး ထႅင်ႈ။ ၵူဝ်ပဵၼ်ပၢင် တိုၵ်းထႅင်ႈလႄႈ ဢမ်ႇႁတ်းပွၵ်ႈဝၢၼ်ႈ မိူဝ်းႁိူၼ်းၶိုၼ်းၶႃႈ။ တပ်ႉတီႈႁိမ်းဝၢၼ်ႈႁဝ်းၶႃႈ ၸိူင်ႉ ၼႆၼႆႉ  ၵူႈပွၵ်ႈဢမ်ႇယၢမ်းမီးမႃးၶႃႈ။ ဢၼ်ၶဝ်မႃးတင်ႈတပ်ႉၼႆႉ ၸူဝ်ႈၶဝ်ပဵၼ် ပၢင်တိုၵ်းၵၼ်တင်း သိုၵ်းၶၢင် KIA, PDF ၼၼ်ႉမႃးၵူၺ်း” – ဝႃႈၼႆ။

ၵူၼ်းဝၢၼ်ႈ လူင်ၵျႃႇတင်း ဝၢၼ်ႈၼွင်ပဝ်း ဢၼ်ပၢႆႈၽေးသိုၵ်း မႃးသွၼ်ႈဝႆႉတီႈဝတ်ႉၶျၢၼ်းမျေႉယွင်ႇၶျီႇ၊ ဝတ်ႉလေႃးၵ မႃႇရၸဵင်ႇ ၼႂ်းဝဵင်းမိူင်းမွၵ်ႇ ၸႄႈတွၼ်ႈမၢၼ်ႈမေႃႇ ၸႄႈမိူင်းၶၢင်ၼၼ်ႉ ယၢမ်းလဵဝ် ၵိုတ်းဝႆႉ ႁူဝ်ၵူၼ်းမွၵ်ႈ 90 ၵေႃႉ ပႆႇႁတ်းပွၵ်ႈ ယွၼ်ႉသိုၵ်းမၢၼ်ႈတပ်ႉမ 88 တိုၵ်ႉပၵ်းတပ်ႉယူႇဝႆႉ ၼိူဝ်လွႆလူင်ၵျႃႇ တၢင်းဢွၵ်ႇ ဝၢၼ်ႈၼၼ်ႉၼၼ်ႉသေ ႁွၼ်ႈထဝ်ႇၵႂႃႇမႃး ပၵ်းပႂ်ႉၵူတ်ႇထတ်း ယူႇဝၼ်းဝၼ်းၶိုၼ်းၶိုၼ်း ၵူၼ်းဝၢၼ်ႈ တုၵ်းယွၼ်း ႁႂ်ႈၸုမ်းသိုၵ်းမၢၼ်ႈထွၼ် ဢဵၼ်ႁႅင်းဢွၵ်ႇ။

ၽူႈၸွႆႈထႅမ် ၵူၼ်းပၢႆႈၽေးသိုၵ်း တီႈဝဵင်းမိူင်းမွၵ်ႇ လၢတ်ႈတီႈၽူႈတွႆႇႁွၵ်ႈဝႃႈ – “တေႃႈလဵဝ် တႃႇလွင်ႈၵိၼ် ယႅမ်ႉ ၵူၼ်းဝၢၼ်ႈလူင်ၵျႃႇတင်း ၼွင်ပဝ်း ႁူဝ်ၵူၼ်း ႁိမ်း 100 ၼႆႉ လႆႈမႆႈၸႂ်မႃးၶႃႈဢေႃႈ။ ၸဝ်ႈတႃႇၼ ဢၼ်မႃးၸွႆႈႁဝ်းၶႃႈၼႆႉ လူတ်းယွမ်းၼမ်ၼႃႇယဝ်ႉ။ ႁဝ်းၶႃႈ လႆႈၽိမ်းၵိၼ်ၽိမ်းၸၢႆႇၵၼ်ၵူႈၸိူဝ်း ၵူႈမဵဝ်းၶႃႈဢေႃႈ ၊ ၵူၼ်းမိူင်း ၶႂ်ႈမိူဝ်းယူႇႁိူၼ်းၶိုၼ်း ၶႂ်ႈႁဵတ်းၵၢၼ် ႁႃၵိၼ်လဵင်ႉတွင်ႉ လူၺ်ႈဢမ်ႇၸႂ် ယႂ်ႇ ပိူၼ်ႈလဵင်ႉ ၼၼ်ႉလႄႈ သင်ၶႃႇၸဝ်ႈ ပႃးၸဵမ် ၵူၼ်းမိူင်း ၸင်ႇတုၵ်းယွၼ်း ႁႂ်ႈသိုၵ်းမၢၼ်ႈထွၼ် တပ်ႉပၼ်ၼၼ်ႉၶႃႈ”– ဝႃႈၼႆ။

ၸူဝ်ႈသိုၵ်းမၢၼ်ႈတင်း သိုၵ်းၶၢင် KIA, PDF ပဵၼ်ပၢင်တိုၵ်းၵၼ် ၼႂ်းဝဵင်းမိူင်းမွၵ်ႇ ၼႂ်းႁၢင်ပီၼႆႉမႃး ၸၢၵ်ႇမၢၵ်ႇတိူဝ်ႉသႂ်ႇ ၵူၼ်းဝၢၼ်ႈ ၼၢင်းယိင်း လူႉတၢႆ 2 ၵေႃႉ၊ မၢတ်ႇၸဵပ်း 5 ၵေႃႉ၊ ၼႂ်းၼၼ်ႉ ၽူႈယိင်း 4 ၵေႃႉလႄႈ ၽူႈၸၢႆး 1 ၵေႃႉ မၢတ်ႇၸဵပ်း။ ယွၼ်ႉပၢင်တိုၵ်းသေ ၾႆးမႆႈ ႁိူၼ်းယေး ၵူၼ်းဝၢၼ်ႈၶႃႇၼၢၼ် 2 လင်။ ၼႂ်းၸႄႈဝဵင်းမိူင်းမွၵ်ႇၼႆႉ တင်းမူတ်းမီးဝၢၼ်ႈတႆး ဢမ်ႇယွမ်း 80 ဝၢၼ်ႈ။ မီးၸၢဝ်းၶၢင်၊ ၸၢဝ်းမၢၼ်ႈလႄႈ ၶႄႇ၊ ၵြႃးၽွင်ႈသေတႃႉ ႁူဝ်ၵူၼ်း ပၢၵ်ႇဝၢၵ်ႈ ၼႆႉ 70 %  ပဵၼ်ၸိူဝ်ႉၶိူဝ်းတႆး။