ၵူၼ်းၼုမ်ႇ 16 ၵေႃ့ ၵႂႃႇႁဵတ်းၵၢၼ်တီႈဝဵင်းၵဝ်ႇ ၸႄႈဝဵင်းပၢင်သၢင်း ၺႃးလၢဝ်းပၢၼ်းၶႄႇ ၵုမ်းၶင်တူဝ် ၶၢႆတေႃႇထႅင်ႈ မႆႈၸႂ်ပႃးလွင်ႈသၢႆၸႂ်။
ၵူၼ်းၼုမ်ႇ 16 ၵေႃ့ ၼႂ်းၼၼ့် ပႃးၼၢင်းယိင်း 3 ၵေႃ့ ၵႂႃႇႁဵတ်းၵၢၼ် ၶွမ်ႊပၼီႊႁွႃထၢႆလူင်(ဟွာထိုင်လုံ) တီးဝဵင်းၵဝ်ႇ ၸႄႈဝဵင်းပၢင်သၢင်း ႁူမ်ႈလိၵ်ႈၵိၼ်ၵႅၼ်ႇတင်းၵၢၼ်လၢဝ်းပၢၼ်းၶႄႇ တႃႇၶၢဝ်းတၢင်း 6 လိူၼ် ၾၢႆႇလၢဝ်းပၢၼ်းၶႄႇသမ့် ဢမ်ႇၸွမ်းပိူင်လိၵ်ႈၵိၼ်ၵႅၼ်ႇသင်သေၵုမ်းၶင်တူဝ်ပေႃ့ထုပ့် ပႃးထႅင်ႈလႄႈပဵၼ်ဢၼ်လီလႆႈမႆႈၸႂ်သၢႆၸႂ် ၸုမ်းႁႅင်းၵၢၼ်ဝႆ့ ဝႃႈၼႆ။။
မိူဝ်ႈဝၼ်းတီႈ 11 လိူၼ် တီႊသိမ်ႊပိူဝ်ႊ ႁူဝ်ၶမ်ႈၼၼ့် ၽူႈၸတ်းၵၢၼ်(မၢၼ်ႇၼေႇၵျႃႇ)လၢဝ်းပၢၼ်းၵေႃ့ၼိုင်ႈ မႃးလၢတ်ႈၼႄ လွင်ႈ ၶွမ်ႊပၼီႊၶဝ် ပၢႆးမၢၵ်ႈမီးတေလူမ့်ၼႆသေ ႁႂ်ႈၵူၼ်းႁႅင်းၵၢၼ်ၶၢႆ့ႁဵတ်း ၶွမ်ႊပၼီႊထႅင်ႈဢၼ်ၼိုင်ႈ၊လွင်ႈငိုၼ်းလိူၼ်လႄႈ ၵၢၼ်ငၢၼ်း ဢမ်ႇၵပ်းၵၢႆႇသင်ၶဝ်ယဝ့်ၼႆသေ ဢမ်ႇၸွမ်းပိူင်လိၵ်ႈၵိၼ်ၵႅၼ်ႇ ထၢမ်ဢဝ်ႁႅင်းၵၢၼ်ၶၢႆတေႃႇ လၢဝ်းပၢၼ်းၶႄႇတၢင်ႇတီႈ ၾၢႆႁႅင်းၵၢၼ်ဢမ်ႇယွမ်းလႄႈ မီးလွင်ႈတွပ်ႇထဵင်တင်းသွင်ၾၢႆႇသေ မိူဝ်ႈလဵဝ် ႁႅင်းၵၢၼ်ၵူၼ်းၼုမ်ႇ 16 ၵေႃ့ ၺႃးၵုမ်းၶင်တူဝ်ဝႆ့ၼႆ ၾၢႆႇသိုဝ်ႇၶၢဝ်ႇ Wa News Agency ဢွၵ်ႇဝႆ့ၼင်ႇၼႆ။
မိူဝ်ႈဝၼ်းတီႈ 14 လိူၼ်တီႊသိမ်ႊပိူဝ်ႊ ၼၼ့် ၶွမ်ႊပၼီႊႁွႃထၢႆလူင် ဢဝ်ၵူၼ်းၼုမ်ႇ 16 ၵေႃ့ ထၢမ်ၶၢႆပၼ်လၢဝ်းပၢၼ်းတၢင်ႇၵေႃ့သေတႃ့ ယွၼ့်ဢမ်ႇမီးၵူၼ်းမေႃၵႂၢမ်းၶႄႇလႄႈ ဢမ်ႇသိုပ်ႇသိုဝ့်ဢဝ်ၶိုၼ်း။ထိုင်မႃး ဝၼ်းတီႈ 15 ယွၼ့်ၶၢႆတေႃႇ ဢမ်ႇလႆႈလႄႈ လၢဝ်းပၢၼ်းၶႄႇ (ၸဝ်ႈၶွင် ၶွမ်ႊပၼီႊ ႁွႃထၢႆလူင် )ဢွၵ်ႇတေႃသသေ တဵၵ်းလွၵ်ႇငိူတ်ႇယွၼ်းငိုၼ်းတီႈႁႅင်းၵၢၼ် ၼိုင်ႈၵေႃ့လႂ် 10000 ယႂၼ်ႊ ငိုၼ်းၶႄႇ ၽႂ်ဢမ်ႇပၼ်လႆႈ တၵ်းၺႃးၵုမ်းၶင်တူဝ်ဝႆ့ၼႆ သိုဝ်ႇၶၢဝ်ႇၼၼ့်ဢွၵ်ႇဝႆ့ထႅင်ႈ။
ႁႅင်းၵၢၼ်ၵူၼ်းၼုမ်ႇၵူႈၵေႃ့ ၵူဝ်လႆႈယူႇၼႂ်းၶွၵ်ႈ ဢၼ်လၢဝ်းပၢၼ်းၶႄႇၶဝ်ၵုမ်းၶင်ၼၼ့်ၼၵ်းၼႃ ၼႂ်းႁႅင်းၵၢၼ်ၵူၼ်းၼုမ်ႇ 16 ၵေႃ့ ၼၼ့် မီးၵူၼ်းပိုၼ့်တီႈဝဵင်းၵဝ်ႇ ဢၼ်မိုတ်ႈၵိုဝ်း ဢဝ်ငိုၼ်း 10000 ယႂၼ်ႊ မႃးထုတ်ႇတူဝ်ၵႂႃႇလႆႈ ၵေႃ့ၼိုင်ႈယဝ့် ဝႃႈၼႆ။
ဢၼ်ႁႅင်းၵၢၼ် 16 ၵေႃ့ မႃးထိုင်တီႈၶွမ်ႊပၼီႊ ႁွႃထၢႆလူင် ဝဵင်းၵဝ်ႇလႆႈၼႆ့ မီးၾၢႆႇႁႃၵၢၼ်ၼိူဝ်ဢွၼ်ႊလၢႆႊႁွင့်ဝႆ့ဝႃႈ တေလႆႈပဵၼ်ၵူၼ်းမေႃ လိၵ်ႈဢဵင်းၵလဵတ်ႈ လီလီ ၊ လိူဝ်ၼၼ့် တေလႆႈမေႃၸႂ့်ၶွမ်ႊဢိတ်းဢီႈ ဝႃႈၼႆသေ မႃး ၶဝ်ႈႁဵတ်းၵၢၼ် ၸဵမ်မိူဝ်ႊ လိူၼ်ဢွၵ်ႊထူဝ်ႊပိူဝ်ႊၼၼ့်သေတႃ့ ထိုင်မိူဝ်ႈလဵဝ် ငိုၼ်းလိူၼ်ၵေႃႈ ဢမ်ႇလႆႈ ပၢႆႁုပ်ႈသိမ်းၾူၼ်းသုၼ်ႇတူဝ်သေဢမ်ႇၵႃး ၵၢၼ်ၼၼ့်ၵေႃႈ ပဵၼ်ၵၢၼ်ႁႃလႅၼ်ၵိၼ်ငိုၼ်းၵူၼ်းၼိူဝ်ဢွၼ်ႊလၢႆႊ ။မိူဝ်ႈလဵဝ် ၺႃးတိၺွပ်းၵုမ်းၶင်တူဝ်ဝႆ့လႄႈ မီးလွင်ႈ ပေႃ့ထုပ့်သေဢမ်ႇၵႃး သမ့် ၺႃးလၢဝ်းပၢၼ်း ထၢမ်ၶၢႆပၼ်ၶွမ်ႊပၼီႊတၢင်ႇဢၼ်ထႅင်ႈလူးၵွၼ်ႇၼႆ လႆႈႁူ့ၼင်ႇၼႆ။
ၵဵဝ်ႇလူၺ်ႈလွင်ႈၵူၼ်းၼုမ်ႇၺႃးတိၺွပ်းၵုမ်းၶင်ၼႆ့ မီးမၢႆၾူၼ်းလပ့်ၸိုဝ်ႈဢၼ်ၼိုင်ႈ ၵပ်းသိုပ်ႇလၢတ်ႈမႃးတီႈ ၵူၼ်းႁိူၼ်း ၵူၼ်းၼုမ်ႇၸိူဝ်းၼၼ့်သေ ႁႂ်ႈၵႂႃႇထုတ်ႇတူဝ် ဝၢႆးၼၼ့် ၵူၼ်းႁူမ်ႈႁိူၼ်း ၸိူဝ်းၼၼ့်သမ့် ၵပ်းသိုပ်ႇယွၼ်းတၢင်းၸွႆႈထႅမ်ၸူး ၾၢႆႇသိုဝ်ႇၶၢဝ်ႇ Wa News Agency ၶဝ်ဝႆ့ ဝႃႈၼႆ။
မိူဝ်ႈလဵဝ် ၵူၼ်းၼုမ်ႇၵမ်ႈၼမ် ၶဝ်ႈႁႃႁဵတ်းၵၢၼ် ဢွၼ်ႊလၢႆႊ ၸွမ်းလႅၼ်လိၼ်ၶႄႇ လႅၼ်လိၼ်ထႆးသေ ၺႃးယွၵ်ႇလႅၼ်ၶၢႆၵိၼ်ၸိူဝ်းၼႆ့ မီးၼမ်မႃးၶိူဝ်းယႂ်း။ ပေႃးႁၼ်လိၵ်ႈ ပိုၼ်ႇၽၢဝ်ႇႁွင့်ၵၢၼ်ၼိူဝ်ဢွၼ်ႊလၢႆႊ ၼႆ ဢမ်ႇထုၵ်ႇလီ ယုမ်ႇငၢႆႈသေ ၵႂႃႇႁဵတ်း ၸၢင်ႈၺႃးၵုမ်းၶင်တူဝ် ႁဵတ်းၵၢၼ်ၽိတ်းပၵ်းပိူင်သေ ပၢႆဢမ်ႇလႆႈငိုၼ်းတွင်း။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ