လုၵ်ႈဢွၼ်ႇယိင်းၵေႃႉၼိုင်ႈ ဢႃယု 16 ပီယူႇဝဵင်းၵၢတ်ႇလေႃႉၸိုင်ႈတႆးပွတ်းၸၢၼ်းလုၵ်ႉတီႈႁိူၼ်းၶဝ်သေ တေၵႂႃႇႁိူၼ်းၼၢႆးၶဝ်ၼႆသေႁၢႆပႅတ်ႈၵၢင်တၢင်း ၵူၼ်းႁိူၼ်းတိတ်းတေႃႇဢမ်ႇလႆႈ ပဵၼ်ဢၼ်မႆႈၸႂ်။
ဝၼ်းတီႈ 7 /9 / 2025 ယၢမ်းၵၢင်ဝၼ်း 2 မူင်း လုၵ်ႈဢွၼ်ႇယိင်း ၵူၼ်းပွၵ်ႉ 1 ဝဵင်းၵၢတ်ႇလေႃႉ ဢၢၼ်းတေ ၵႂႃႇ ႁိူၼ်းၼၢႆးၶဝ် ဢၼ်ယူႇတီႈပွၵ်ႉ 10 ။ ၵူၺ်းၵႃႈ ႁိူၼ်းၼၢႆးၶဝ်ၵေႃႈဢမ်ႇထိုင် ႁိူၼ်းၶဝ်ၵေႃႈ ဢမ်ႇပွၵ်ႈမႃး ထိုင်ၶိုၼ်း ႁၢႆဝႆႉ တိတ်းတေႃႇၵေႃႈဢမ်ႇလႆႈ ၵူၼ်းႁိူၼ်းမႆႈၸႂ် ၵူဝ်ၺႃး သိုၵ်းမၢၼ်ႈတီႉၵႂႃႇ ၾိုၵ်းၵၢၼ် သိုၵ်းဝႃႈၼႆ။
ၼုမ်ႇယိင်းဢၼ်ႁၢႆတူဝ်ၵႂႃႇၼၼ်ႉ ၸိုဝ်ႈႁွင်ႉ ယုၼ်းဢိထူၺ်း ( ယွန်းအိထွေး ) ပဵၼ်လုၵ်ႈယိင်း ၵူဝ်ႇၽႃႇရုတ်ႉ (ကိုဖာရွတ် ) လႄႈ မႁၼ်ႇၼီႇ (မဟန်နီ) ။ မၼ်းၼၢင်းႁၢႆၵႂႃႇၼႆႉ ပဵၼ်ၽွင်းပေႃႈမႄႈ ဢမ်ႇယူႇႁိူၼ်း၊ တိုၵ်ႉဢွၵ်ႇတၢင်းၵႂႃႇဝဵင်းတူၼ်ႈတီးယူႇ လႆႈႁူႉၼင်ႇၼႆ။
မႁၢၼ်ႇၼီႇၵေႃႉပဵၼ် မႄႈ ယုၼ်းဢိထူၺ်းလၢတ်ႈၽူႈတွႆႇႁွၵ်ႈဝႃႈ – “ လႆႈတၢင်းၵပ်းသိုပ်ႇၵၼ် ၵမ်းလိုၼ်း သုတ်း မိူဝ်ႈမၼ်းဢွၵ်ႇႁိူၼ်းၵႂႃႇၸူးၼၢႆးၶဝ်ၼၼ်ႉဢေႃႈ။ ဝၢႆးသေၼၼ်ႉ ၵေႃႈၵပ်းၾူၼ်းႁႃဢမ်ႇလႆႈ ယဝ်ႉ။ ၵႂႃႇထၢမ်တူၺ်းတီႈဢူၺ်းၵေႃႉမၼ်းၸိူဝ်းၼၼ်ႉၵေႃႈဢမ်ႇႁၼ်သေၵေႃႉ။ လုၵ်ႈၶႃႈတိုၵ်ႉမီး 16 ၶူပ်ႇၵူၺ်း။ ပၢႆႈၸွမ်းမၢဝ်ႇတႄႉဢမ်ႇပဵၼ်လႆႈၶႃႈယွၼ်ႉဝႃႈမၼ်းဢမ်ႇဢဝ်သင်ၵႂႃႇသေမဵဝ်း။ ပႃးၵႂႃႇမိုဝ်းထိုဝ်ၾူၼ်းလုၵ်ႈလဵဝ်ၵူၺ်း။ ၶႃႈမႆႈၸႂ် ၵူဝ်ပဵၼ်ၺႃးတီႉၵႂႃႇၾိုၵ်းၵၢၼ်သိုၵ်းႁႃႉသင်ႁႃႉၼၼ်ႉၵူၺ်း”- ဝႃႈၼႆ။
မႄႈမၼ်းၼၢင်းလၢတ်ႈဝႃႈ ယုၼ်းဢိထူၺ်းၼႆႉယူႇၵတ်းၵတ်းယဵၼ်ယဵၼ်ႁင်းမၼ်း။ ဢမ်ႇယၢမ်ႈမီးပၼ်ႁႃၵၼ်တင်းၽႂ် ။ တိုၵ်ႉႁဵၼ်းလိၵ်ႈဝႆႉတီႈ ၵျွင်းၽြႃးၶရိယၼ်ႇ Church ဝဵင်းၵၢတ်ႇလေႃႉ ။ မၼ်းၼၢင်းၵိုင်ႉၵၢင်ႉႁၢႆၵႂႃႇၼႆႉၵူဝ်ပဵၼ်ၽေးလၵ်ႉၵူၼ်း ၵႃႉၶၢႆၵူၼ်းလႄႈ ဢၼ်ပဵၼ်ပေႃႈမႄႈတႄႉ ၵႂႃႇၸႅင်ႈဝႆႉတီႈႁူင်းပလိၵ်ႈတီႈ ဝဵင်းၵၢတ်ႇလေႃႉလႄႈ ဢွင်ႇပၢၼ်း (ဢုမ်ႇပဝ်း) ဝႆႉယဝ်ႉ – လႆႈႁူႉၼင်ႇၼႆ။
ဢိင်ၼိူဝ် လွင်ႈၼႆႉသေ ၵူၼ်းႁိူၼ်းလုၵ်ႈဢွၼ်ႇယိင်းတႄႉလၢတ်ႈဝႃႈ – သင်ဝႃႈၽူႈလႂ်ၽႂ် ထူပ်းႁၼ်မႅၼ်ႈၸိုင် ၶႅၼ်းတေႃႈ ၵပ်းၸူးမၢႆၾူၼ်းမၢၼ်ႈ 09-428369824 လႄႈ 09-428315147 ၼႆႉသေၵမ်း ။
ၽွင်းငဝ်းလၢႆးဝၢၼ်ႈမိူင်းဢမ်ႇလီၸိူင်ႉၼႆႉ လုၵ်ႈဢွၼ်ႇၸၢႆး လုၵ်ႈဢွၼ်ႇယိင်းၵေႃႈ မီးၽေးၼမ်၊ ၵႆႉႁၢႆၼႃႇ၊ ၽေးၵၢၼ်လၵ်ႉၵူၼ်း ၵႃႉၶၢႆၵူၼ်း ႁူၺ်းႁွင်ႉၵႂႃႇႁဵတ်းၵၢၼ်ၵျႃႊၽျႅၼ်ႉ၊ တီႉၺွပ်းၵႂႃႇၾိုၵ်းၵၢၼ်သိုၵ်း ၸဵမ် ၸိူဝ်းၼႆႉ။ ၵွပ်ႈၼႆ ယူႇတီႈပေႃႈမႄႈၽူႈၵုမ်းတူၺ်းသေ ႁႂ်ႈၾၢင်ႉတူၺ်းလုၵ်ႈၽႂ်လၢင်းမၼ်း လီလီသေၵမ်း ၼႆ ၵူၼ်းမိူင်းဝဵင်းၵၢတ်ႇလေႃႉၵေႃႉၼိုင်ႈၵေႃႈ လၢတ်ႈၽူႈတွႆႇႁွၵ်ႈၼင်ႇၼႆ ။
“ယွၼ်ႉငဝ်းလၢႆးဝၢၼ်ႈမိူင်းဢမ်ႇလီ လုၵ်ႈဢွၼ်ၵေႃႈ ဢမ်ႇမီးလွင်ႈႁူမ်ႇလူမ်ႈ ၊ ဢမ်ႇၸႂ်ႈဝႃႈ လုၵ်ႈဢွၼ်ႇၵူၺ်း တေႃႈၼင်ႇ ၵူၼ်းလူင်ၵေႃႈ ဢမ်ႇမီးလွင်ႈႁူမ်ႇလူမ်ႈ ၊ လီၾၢင်ႉၵၼ်ၵႂႃႇမႃးတေႉတေႉ ၊ ပေႃးပဵၼ်သေၸိူဝ်ႉသေလွင်ႈဢမ်ႇမီးၽႂ်ဢဝ်ပုၼ်ႈၽွၼ်းၵႄႈလိတ်ႈပၼ် ၊ တလဵဝ်ၼႆႉ လႆႈယိၼ်းဝႃႈ မႄႈယိင်းၵေႃႈၺႃးၺွပ်းဢေႃႈ”- ဝႃႈၼႆ ။
ပီၵၢႆ လိူၼ်သႅပ်ႉထႅမ်ႊပိူဝ်ႊၵေႃႈ ၼုမ်ႇၸၢႆး ဢႃယု 25 ပီယူႇဝဵင်းသႅၼ်ဝီၵေႃႉၼိုင်ႈ လႄႈ ၼုမ်ႇၸၢႆး ဢႃယု 30 ပီယူႇဝဵင်းၵျွၵ်ႉမႄး ၵေႃႉၼိုင်ႈ ႁၢႆၵႂႃႇ ၼႂ်းၸႄႈဝဵင်းႁူဝ်ပူင်း ။ ထိုင်ဝၼ်းမိူဝ်ႈၼႆႉလႆႈမႃးၶၢဝ်းတၢင်းပီၼိုင်ႈယဝ်ႉ ၵူၼ်းတၢင်းႁိူၼ်းၵပ်းသိုပ်ႇဢမ်ႇလႆႈ ပဵၼ်ဢၼ်မႆႈၸႂ် ၊ ဢမ်ႇႁူႉဝႃႈတၢႆႁိုဝ်လိပ်းၶီး ၵႂႃႇမီးယူႇတီႈလႂ် ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ