ပၢင်လိူၵ်ႈတင်ႈလူင်ႈၼႃႈၼႆႉ ၶွမ်ႊမသျိၼ်ႊၵမ်ၵၢၼ်ပၢင်လိူၵ်ႈတင်ႈ မိူင်းႁူမ်ႈတုမ် တႂ်ႈဢၢမ်းၼၢတ်ႈသိုၵ်းမၢၼ်ႈယိုတ်းမိူင်း ပိုၼ်ၽၢဝ်ႇၸတ်းႁဵတ်း တႄႇၵၢင်လိူၼ်တီႊသႅမ်ႊပိူဝ်ႊၼႆႉမႃး တေႃႇထိုင် ဝၼ်းတီႈ 27/12/2025 မိူဝ်ႈၼႆႉ။
ၼႂ်းၸႄႈဝဵင်းတူၼ်ႈတီး လႄႈ ၵၢတ်ႇလေႃႉတႄႉ ၸတ်းႁဵတ်းပၢင်လိူၵ်ႈတင်ႈလူင်ႈၼႃႈ မိူဝ်ႈဝၼ်းတီႈ 26/12/2025 ၼၼ်ႉသေ ပႃႇတီႇသၢင်ႇသီႈ (USDP) လႆႈၶႅပ်းမႄးၼမ်လိူဝ်ပိူၼ်ႈ သုတ်း ၼႆယဝ်ႉ။
ၽွၼ်းၵၢၼ်ပၢင်လိူၵ်ႈတင်ႈလူင်ႈၼႃႈ ၼႂ်းၸႄႈဝဵင်းတူၼ်ႈတီးၼႆႉ ၶႅပ်းမႄး (သဵင်ၵၢင်ၸႂ်) တႃႇသၽႃး ၵူၼ်းမိူင်း ပႃႇတီႇသၢင်ႇသီႈ USDP လႆႈၵႂႃႇ 2344 ၶႅပ်း ၊ ပႃႇတီႇသိူဝ်ၽိူၵ်ႇ (SNDP) 11 ၶႅပ်း၊ ပႃႇတီႇၸိူဝ်ႉၸၢတ်ႈပဢူဝ်း (PNO) လႆႈ 4 ၶႅပ်း။
ၶႅပ်းမႄး (သဵင်ၵၢင်ၸႂ်) တႃႇသၽႃးၸိူဝ်ႉၸၢတ်ႈ ပႃႇတီႇသၢင်ႇသီႈ လႆႈ 1336 ၶႅပ်း၊ ပႃႇတီႇသိူဝ်ၽိူၵ်ႇ လႆႈ 11 ၶႅပ်း၊ ပႃႇတီႇပဢူဝ်း လႆႈ 33 ၶႅပ်း လႄႈ ပႃႇတီႇၵူၼ်းမိူင်း လႆႈ 4 ၶႅပ်း။
ၶႅပ်းမႄး (သဵင်ၵၢင်ၸႂ်) တႃႇသၽႃးၸႄႈမိူင်းၼႆႉ ပႃႇတီႇသၢင်ႇသီႈ လႆႈ 2320 ၶႅပ်း၊ ပႃႇတီႇသိူဝ်ၽိူၵ်ႇ လႆႈ 11 ၶႅပ်း၊ ပႃႇတီႇပဢူဝ်း လႆႈ 14 ၶႅပ်း လႄႈ ပႃႇတီႇၵူၼ်းမိူင်း လႆႈ 6 ၶႅပ်း ၼႆ ယဝ်ႉ။
မိူၼ်ၼႆၼင်ႇၵဝ်ႇ တီႈၸႄႈဝဵင်းၵၢတ်ႇလေႃႉၵေႃႈ ၶႅပ်းမႄး (သဵင်ၵၢင်ၸႂ်) တႃႇသၽႃးၵူၼ်းမိူင်းၼႆႉ ပႃႇတီႇသၢင်ႇသီႈ လႆႈၵႂႃႇ 2078 ၶႅပ်း၊ ပႃႇတီႇသိူဝ်ၽိူၵ်ႇ လႆႈ 8 ၶႅပ်း၊ ပႃႇတီႇပဢူဝ်း လႆႈ 19 ၶႅပ်း၊ ပႃႇတီႇၵူၼ်းမိူင်း (PPP) လႆႈ 4 ၶႅပ်း၊ ပႃႇတီႇႁုၼ်ႈမုၼ်းၸဝ်ႈႁႆႈၸဝ်ႈၼႃး လႆႈ 7 ၶႅပ်း။
ၶႅပ်းမႄး (သဵင်ၵၢင်ၸႂ်) တႃႇသၽႃးၸိူဝ်ႉၸၢတ်ႈ ပႃႇတီႇသၢင်ႇသီႈ လႆႈ 2078 ၶႅပ်း၊ ပႃႇတီႇၸၢဝ်းၶိူဝ်းထၼူႉ လႆႈ 16 ၶႅပ်း၊ ပႃႇတီႇသိူဝ်ၽိူၵ်ႇ လႆႈ 4 ၶႅပ်း၊ ပႃႇတီႇပဢူဝ်း လႆႈ 12 ၶႅပ်း လႄႈ ပႃႇတီႇၵူၼ်းမိူင်းလႆႈ 4 ၶႅပ်း။
ၶႅပ်းမႄး (သဵင်ၵၢင်ၸႂ်) တႃႇသၽႃးၸႄႈမိူင်း ပႃႇတီႇသၢင်ႇသီႈ လႆႈ 2068 ၶႅပ်း၊ ပႃႇတီႇၸၢဝ်းၶိူဝ်းထၼူႉ လႆႈ 22 ၶႅပ်း၊ ပႃႇတီႇသိူဝ်ၽိူၵ်ႇ လႆႈ 6 ၶႅပ်း၊ ပႃႇတီႇပဢူဝ်းလႆႈ 10 ၶႅပ်း လႄႈ ပႃႇတီႇၵူၼ်းမိူင်း (PPP) လႆႈ 5 ၶႅပ်း ၼႆယဝ်ႉ။
ၵူၼ်းၸိူဝ်းၵႂႃႇပၼ်သဵင်ၵၢင်ၸႂ်လူင်ႈၼႃႈၼႆႉ ၵမ်ႈၼမ် ပဵၼ်ၵူၼ်းသိုၵ်းမၢၼ်ႈ၊ ၶႃႈႁၢပ်ႇၵၢၼ်ၶုၼ် တႂ်ႈသိုၵ်းမၢၼ်ႈ လႄႈ ၵူၼ်းၸိူဝ်းလူဝ်ႇဢွၵ်ႇတႃႈဢွၵ်ႇတၢင်း တင်း ၵူၼ်းထဝ်ႈၵူၼ်း ၵႄႇ ၵႂႃႇမႃးယၢပ်ႇႁႅင်း ၸိူဝ်းၼႆႉ။
ပၢင်လိူၵ်ႈတင်ႈပွၵ်ႈၼႆႉ ၵူၼ်းမိူင်းၼႂ်းပိုၼ်ႉတီႈ ၼႂ်းမိူင်းႁူမ်ႈတုမ်ပတ်းပိုၼ်ႉတူဝ်ႈမိူင်း လႄႈ လူင်ပွင်ၸိုင်ႈမိူင်းၼွၵ်ႈ ၼႂ်းၸိုင်ႈမိူင်းဢႃႊသီႊယႅၼ်ႊ ၵမ်ႈၼမ် ဢွၼ်ၵၼ်ထတ်းသၢင်လၢတ်ႈဝႃႈ ပၢင်လိူၵ်ႈတင်ႈပွၵ်ႈၼႆႉ ပႃႇတီႇၵၢၼ်မိူင်း၊ ၸုမ်းတူင်ႇဝူင်းၵူၼ်း၊ သိုဝ်ႇၶၢဝ်ႇလွတ်ႈလႅဝ်း ၵူႈၸုမ်းၸုမ်း ဢမ်ႇမီးသုၼ်ႇလႆႈၶဝ်ႈႁူမ်ႈၸွမ်းလႄႈ ဢမ်ႇထုၵ်ႇမႅၼ်ႈ တၢင်းၵၢၼ် ၼႆသေ သၢၼ်ၶတ်းတေႃႇ ပၢင်လိူၵ်ႈတင်ႈဢၼ်သိုၵ်းမၢၼ်ႈယိုတ်းမိူင်းတေၼမ်းၸတ်းႁဵတ်းၵႂႃႇ 3 ၶၵ်ႉတွၼ်ႈၼႆႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ