ၽွင်းဝၢၼ်ႈမိူင်းသုၵ်ႉသၵ်ႉ ၵၢၼ်ႁႃၵိၼ်လဵင်ႉတွင်ႉယၢပ်ႇၽိုတ်ႇမႃးၼႆႉ ၼႂ်းၶၢဝ်းတၢင်း ဝူင်ႈလဵဝ် ၵူၼ်းၸၢႆး ၸိုင်ႈတႆးပွတ်းၸၢၼ်း သွင်ၵေႃႉ ထုၵ်ႇႁဵတ်းႁၢႆႉၶႃႈႁႅမ်တၢႆ   ။

ၼႂ်းဝၼ်းတီႈ  14/02/2026  ယၢမ်းၵၢင်ၼႂ်ၸဝ်ႉ မီးၵူၼ်းၸၢႆးၵေႃႉၼိုင်ႈၵပ်းသိုပ်ႇလၢတ်ႈဝႃႈ ၶႂ်ႈတူၺ်းၵႃးၼႆသေ ႁွင်ႉႁူၺ်းဢဝ်ၸၢႆးသွင်ပီႈၼွင်ႉ (ၵူၼ်းၵႃႉၶၢႆၵႃး) တီႈဝဵင်းဢွင်ႇပၢၼ်း ၸိုင်ႈတႆးပွတ်းၸၢၼ်း ။ ၽွင်းသွင်ပီႈၼွင်ႉ ဢဝ်ၵႃးၵႂႃႇၼႄၼၼ်ႉ ၽူႈႁူၺ်းႁွင်ႉၼၼ်ႉ ဢဝ်မိတ်ႈတႅင်းတၢႆၵေႃႉၼိုင်ႈ ၸိုဝ်ႈႁွင်ႉ ၵူဝ်ႇတႅတ်ႉမေႃႇထူး ဢႃယု 21 ပီ   ။

တႆးၵေႃႉၵူဝ်ႇတႅတ်ႉမေႃႇထူး လၢတ်ႈၽူႈတွႆႇႁွၵ်ႈဝႃႈ -“ၵေႃႉႁဵတ်းႁၢႆႉၼၼ်ႉ မႃးၵေႃႉလဵဝ်ၵူၺ်း ၊ လၢတ်ႈဝႃႈ လႆႈၸႂ်ၵႃးဢၼ်ၶဝ်ၶၢႆၼၼ်ႉ ၊ ႁႂ်ႈဢဝ်မႃးၼႄ။ ၽိူဝ်ႇဢဝ်မႃးၼႄယဝ်ႉသမ်ႉဝႃႈ တေမိူဝ်းၸၢႆႇငိုၼ်းတီႈႁၢႆးဝူဝ်း ႁႂ်ႈၸွမ်းမိူဝ်းဢဝ်ငိုၼ်း။   ၽိူဝ်ႇမိူဝ်းထိုင်ၵၢင်တၢင်း ၺႃးၵူၼ်းႁၢႆႉ ၼၼ်ႉ တႅင်းတႅတ်ႉမေႃႇထူး  တၢႆထင်တီႈ။  ပီႈဢၢႆႈတႅတ်ႉမေႃႇထူးတႄႉ ၺႃးတႅင်းတီႈၼႃႈဢူၵ်းမၢတ်ႇၸဵပ်း ၺႃးယဵပ်ႉ 5 ၵမ်း ယၢမ်းလဵဝ်ယူတ်းယႃတူဝ်ဝႆႉတီႈႁူင်းယႃ”- ဝႃႈၼႆ ။

ၼႂ်းဝၼ်းတီႈ 14 ၼၼ်ႉၵမ်းလဵဝ် ယူႇတီႈပလိၵ်ႈၸိူဝ်းၵဵဝ်ႇၶွင်ႈ တီႉၺွပ်းလႆႈ ၵေႃႉဢဝ်မိတ်ႈတႅင်း ဝႆႉဝႃႈၼႆသေတႃႉ ထုၵ်ႇၵုမ်းတီႈလႂ်ဝႆႉဢၼ်ဝႃႈၼၼ်ႉတႄႉ ဢမ်ႇပႆႇမီးၽႂ်ယိုၼ်ယၼ် ။     

မိူၼ်ၼင်ႇၼႆ ၵူၼ်းၸၢႆးၵေႃႉၼိုင်ႈ ယူႇတီႈဝဵင်းၵၢတ်ႇလေႃႉ ၸိုင်ႈတႆးပွတ်းၸၢၼ်း ထုၵ်ႇႁဵတ်းႁၢႆႉႁႅမ်တၢႆ၊ ထိုင်ဝၼ်းမိူဝ်ႈၼႆႉ ပလိၵ်ႈသိုၵ်းမၢၼ်ႈ ဢမ်ႇဢဝ်ပုၼ်ႈၽွၼ်း ၵူတ်ႇထတ်းတီႉၺွပ်း ႁဵတ်းႁႂ်ႈၵူၼ်းပိုၼ်ႉတီႈ ဢွၼ်ၵၼ်မႆႈၸႂ်လွင်ႈႁူမ်ႇလူမ်ႈဝႆႉဝႃႈၼႆ ။

ၼႂ်းလိူၼ် ၾႅပ်ႉပိဝ်ႊရီႊ ဝၼ်းတီႈ 8 ယၢမ်းႁူဝ်ၶမ်ႈ 7 မူင်း လုင်းႁၢၼ်ႇမိၼ်းၺုၼ်ႉ( ႁွင်ႉ)တႃးၵျီး  ဢႃယု 46 ပီ ယူႇပွၵ်ႉ6 ဝဵင်းၵၢတ်ႇလေႃႉ ထုၵ်ႇတီႉၺွပ်းၶႃႈႁႅမ်တၢႆ ။ မၼ်းၸၢႆး ထုၵ်ႇႁဵတ်းႁၢႆႉႁႅမ်တၢႆ ၼႂ်းသူၼ်မၢၵ်ႇၸွၵ်း ႁိမ်းဝၢၼ်ႈယေႇယႃး တၢင်းၶိုၼ်ႈဝဵင်းၵၢတ်ႇလေႃႉ ဝႃႈၼႆ။

ၼၢင်းယိင်းယူႇပွၵ်ႉ 6 ဝဵင်းၵၢတ်ႇလေႃႉ လၢတ်ႈၽူႈတွႆႇႁွၵ်ႈဝႃႈ -“ ၵေႃႉဢၼ်တၢႆၵႂႃႇၼၼ်ႉပဵၼ်ၵူၼ်းၼႂ်းပွၵ်ႉႁဝ်းဢေႃႈ ၊ ၽွင်းၵႂႃႇႁၼ်တူဝ်တၢႆ မၼ်း တီႈသူၼ်မၢၵ်ႇၸွၵ်းၼၼ်ႉ တီႈၶေႃးၼၼ်ႉမီးႁွႆးမိတ်ႈတႅင်းပွင်ႇဝႆႉ ၊ မိုဝ်းၼိဝ်ႉၵွႆႈၵေႃႈပုတ်း ၊ တီႈငွၵ်းသွၵ်ႇၵေႃႈ မီးႁွႆးၽႃႉၽၼ်းဝႆႉ ၊ တီႈတိၼ်ဝႃႇၸိူဝ်းၼႆႉ ပဵၼ်ႁွႆးၽၼ်းဝႆႉ တင်းၼမ် ႁၢင်ႈႁၢႆႉၼႃႇ မိူၼ်ၼင်ႇ ထုၵ်ႇၺႃးႁဵတ်းႁၢႆႉတေႃႇပေႃးတၢႆဝႆႉၼႆဢေႃႈ မီးပၼ်ႁႃၵၼ်သင်လႄႈ ထိုင်တီႈလႆႈႁဵတ်းႁၢႆႉၶႃႈႁႅမ်ဢၼ်ဝႃႈၼၼ်ႉတႄႉ ၽႂ်ၵေႃႈဢမ်ႇႁူႉ”-ဝႃႈၼႆ ။

ၵေႃႉပူၼ်ႉပႅၼ်ႁႅမ်ၵူၼ်းတၢႆၼႆႉ ပဵၼ်ၵူၼ်းၼႂ်းၸုမ်း ဢၼ်ၵႆႉလႄႇႁႃႁဵတ်းႁၢႆႉ၊ လၵ်ႉၶူဝ်းၶွင် ၼႂ်းဝဵင်းၵၢတ်ႇလေႃႉ၊ ပဵၼ်ၸုမ်း ဢၼ်ႁူမ်ႈတင်း ပလိၵ်ႈသိုၵ်းမၢၼ်ႈဝႆႉ၊ ယၢမ်းလဵဝ် ပလိၵ်ႈ သိုၵ်းမၢၼ်ႈ ႁူႉလိူင်ႈၼႆႉလီလီယူႇသေတႃႉ ဢမ်ႇဢဝ်ပုၼ်ႈၽွၼ်း တီႉၺွပ်းၵႄႈလိတ်ႈပၼ်- ၵူၼ်းပိုၼ်ႉတီႈလၢတ်ႈၼင်ႇၼႆ ။   

ၼၢင်းယိင်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“လွင်ႈၼႆႉ ပဵၼ်ၽႂ်ၼႆၵေႃႈႁူႉယူႇ ၊ ပလိၵ်ႈသိုၵ်းမၢၼ်ႈ ဢမ်ႇၵူတ်ႇထတ်း တီႉၺွပ်းပၼ်ၶႃႈ ၊ ပဵၼ်ၸုမ်းဢၼ် ၵႆႉၶဝ်ႈလၵ်ႉ ရူတ်ႉၶိူင်ႈ ၸိူဝ်းၼၼ်ႉဢေႃႈ ၊ ၶဝ်ပဵၼ်ၸုမ်းဝႆႉ ပေႃးတီႉလႆႈၵေႃႈ ၶဝ်ႈၶွၵ်ႈၵမ်းၼိုင်ႈသေ ဢွၵ်ႇမႃးၶိုၼ်းသေ ႁဵတ်းၼႆတိၵ်းတိၵ်း ၊ မိူၼ်တင်း ႁူမ်ႈၵၼ်တင်းပလိၵ်ႈသိုၵ်းမၢၼ်ႈသေ ႁဵတ်းၵိၼ်ၵူၺ်း”- ဝႃႈၼႆ ။

ဝၢႆးလင်သိုၵ်းမၢၼ်ႈယိုတ်းမိူင်းမႃးၼႆႉ ၼွၵ်ႈလိူဝ်ဝဵင်းတူၼ်ႈတီး ၼႂ်းမိူင်းတႆးတၢင်ႇတီႈ တၢင်ႇဝဵင်း ၵေႃႈ မီးၽူႈလၵ်ႉၸၵ်ႉၶုတ်ႈ၊ ၵူၼ်းၸူၼ် လိူင်ႇၼမ်  ။ ယူႇတီႈ ၽူႈမီးပုၼ်ႈၽွၼ်း ပလိၵ်ႈ သိုၵ်းမၢၼ်ႈၵေႃႈ ဢမ်ႇဢဝ်ပုၼ်ႈၽွၼ်းၵႄႈလိတ်ႈပၼ်လႆႈႁႂ်ႈထိုင်တီႈ။

ဝဵင်းၵၢတ်ႇလေႃႉၼႆႉ ပဵၼ်ဝဵင်း ၶႅၵ်ႇဢႅဝ်ႇလႄႇတွင်ႈတဵဝ်းၼမ်ဝဵင်းၼိုင်ႈ ၼႂ်းၸိုင်ႈတႆးပွတ်းၸၢၼ်း၊ ယၢမ်းလဵဝ် ၵႆႉပဵၼ်လိူင်ႈႁဵတ်းႁၢႆႉႁႅမ်ၵူၼ်းတၢႆ၊ ၽူႈလၵ်ႉၸၵ်ႉၶုတ်ႈၼမ်လိူင်ႇ၊ ပလိၵ်ႈသိုၵ်းမၢၼ်ႈ ဢမ်ႇဢဝ်ပုၼ်ႈၽွၼ်းၵႄႈလိတ်ႈပၼ်လႆႈႁႂ်ႈထိုင်တီႈလႄႈ ႁဵတ်းႁႂ်ႈၵူၼ်းမိူင်း ဢွၼ်ၵၼ်မႆႈၸႂ် လွင်ႈႁူမ်ႇလူမ်ႈဝႆႉ။