မိူဝ်ႈၼႆႉ ဝၼ်းတီႈ 2 လိူၼ်ၾႅပ်ႉပိဝ်ႊရီႇ မိူင်းၶႄႇပိုၼ်ၽၢဝ်ႇဝႃႈ ပၼ်တၢမ်ႇတၢႆ လုၵ်ႈၸၢႆးႁူဝ်ပဝ်ႈၵဝ်ႇ ၸုမ်းသိုၵ်းၵဝ်ႈၵၢင်ႉ ပၢႆသဝ်ၶျိုင် လႄႈ ဢိၵ်ႇထႅင်ႈၵူၼ်းၼႂ်းၶိူဝ်းႁိူၼ်းၶဝ်ႁူမ်ႈသဵၼ်ႈ 4 ၵေႃႉ ပဵၼ်ၵူၼ်း ၸိူဝ်းၵဵဝ်ႇၶွင်ႈတင်း ၵၢၼ်ၵျႃႊၽျႅၼ်ႉသေ ၺႃးလုမ်းတြႃးမိူင်းၶႄႇ ပူင်တူတ်ႈတၢမ်ႇတၢႆဝႆႉ ၼႂ်းမိူင်းၶႄႇ တင်းသဵင်ႈ ၼႆယဝ်ႉ။
လုၵ်ႈၸၢႆးပၢႆသဝ်ၶျိုင် ပၢႆယိင်ၶျိုင် လႄႈ ယၢင်လီႇၶျၢင်ႊ Yang Liqiang ၊ ႁူသႅဝ်ၵျႅင်ႊ Hu Xiaojiang လႄႈ ၶျိူၼ်ၵႂၢင်ႊယိ Chen Guangyi ၶဝ်သီႇၵေႃႉၼႆႉ လုမ်းတြႃးမိူင်းၶႄႇ ၵူတ်ႇထတ်းသေ ပၼ်တူတ်ႈ တၢမ်ႇဝႆႉ ၸဵမ်မိူဝ်ႈလိူၼ်ၵျူႊလၢႆႊ ပီ 2025 ပူၼ်ႉမႃးၼၼ်ႉသေတႃႉ ၾၢႆႇမိူင်းၶႄႇ တိုၵ်ႉပိုၼ်ၽၢဝ်ႇဢွၵ်ႇ ၼႂ်းဝၼ်းတီႈ 2/2/2026 ၼႆႉဝႃႈ ၶႃႈႁႅမ်တၢႆၵႂႃႇယဝ်ႉတူဝ်ႈလီငၢမ်း ဝႃႈၼႆ။
ႁူဝ်ယွႆႈ လွင်ႈၵၢၼ်ၶႃႈႁႅမ်တၢႆပႅတ်ႈ ႁူဝ်ၼႃႈၸုမ်းၵျႃႊၽျႅၼ်ႉ သီႇၵေႃႉၼႆႉတႄႉ ၾၢႆႇမိူင်းၶႄႇၶဝ် ဢမ်ႇပိုၼ် ၽၢဝ်ႇဢွၵ်ႇဝႆႉႁႂ်ႈပႃးၶၢဝ်းယၢမ်း လႄႈ ဝၼ်းတီႈ တင်း ဢွင်ႈတီႈဢၼ်ၶႃႈ ႁႅမ်ၶဝ်တၢႆၼၼ်ႉဝႆႉ။
ၵူၺ်းပိုၼ်ၽၢဝ်ႇဢွၵ်ႇဝႆႉဝႃႈ “ ၶႃႈႁႅမ်တၢႆ လုၵ်ႈၸၢႆးပၢႆသဝ်ၶျိူင် ၵေႃႉပဵၼ် ပၢႆယိင်ၶျိုင်လႄႈ ထႅင်ႈသၢမ် ၵေႃႉယဝ်ႉတူဝ်ႈလီငၢမ်း။ ၵွၼ်ႇၼႃႈၶဝ်သီႇၵေႃႉ ပႆႇၺႃးၶႃႈႁႅမ်တၢႆၼၼ်ႉ ပၼ်သုၼ်ႇလႆႈ ၵူၼ်းၼႂ်း မုင်ႉႁေႃႁိူၼ်းၶဝ် ၵႂႃႇထူပ်းယူႇၵမ်းၼိုင်ႈ” ဝႃႈၼႆ။
ၵေႃႉပဵၼ်ႁူဝ်ပဝ်ႈၵဝ်ႇၸုမ်းသိုၵ်းၵဝ်ႈၵၢင်ႉ ပၢႆသဝ်ၶျိူင် Bai Suo cheng တႄႉ ၵိုင်ႉၵၢင်ႉလႆႈၶဝ်ႈ ႁူင်းယႃသေ လူႉတၢႆၵႂႃႇႁင်းၵူၺ်း ၼႂ်းလိူၼ်ၼူဝ်ႊဝႅမ်ႊပိူဝ်ႊ ပီ 2025 ဝၢႆးလင် လုမ်းတြႃးမိူင်းၶႄႇ ပူင်တူတ်ႈတၢမ်တၢႆ မွၵ်ႈ 1 ဝူင်ႈၼၼ်ႉၵူၺ်း ၼႆယဝ်ႉ။
ၶိူဝ်းႁိူၼ်းယႂ်ႇၶႄႇၵဝ်ႈၵၢင်ႉၼႂ်းမိူင်းမၢၼ်ႈ ဢၼ်ပဵၼ်ၶိူဝ်းႁိူၼ်း ပၢႆ၊ ဝေႇ၊ မိင် လႄႈ လဵဝ် တင်း 4 ဢၼ်ၼႆႉ ၺႃးမိူင်းၶႄႇလိုပ်ႈလမ်းတီႉၺွပ်းလူၺ်ႈတၢင်းၽိတ်းယႃႈမဝ်းၵမ် တၢင်း ၽိတ်းလွၵ်ႇလႅၼ်ၵိၼ်ငိုၼ်းၵျႃးၽျႅၼ်ႉ ၸိူဝ်းၼႆႉသေ ဢဝ်ၵႂႃႇၵုမ်းၶင်ဝႆႉတီႈမိူင်းၶႄႇတင်းၼမ်။ ယၢမ်းလဵဝ်ၵေႃႈ တိုၵ်ႉလႆႈၶိုၼ်ႈလုမ်းတြႃးဝႆႉယူႇ ၵေႃႈမီး။ ၵူၺ်းၵႃႈဢၼ်ပၼ်တူတ်ႈတၢမ်ႇတၢႆၵႂႃႇၵေႃႈမီးတင်းၼမ်။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ