မိူဝ်ႈဝၼ်းတီႈ 9 လိူၼ်ၼူဝ်ႊဝႅမ်ႊပိူဝ်ႊ ယၢမ်းဝၢႆးဝၼ်း ၵႃးဢွၼ်ႇလမ်းၼိုင်ႈ ဢၼ်တၢင်ႇၵူၼ်းၵႂႃႇလႄႇပွႆးလိူၼ်သိပ်းသွင်မူၼ်း (ပွႆးႁူင်းၾႆးမိၼ်) တီႈဝဵင်းတူၼ်ႈတီးသေပွၵ်ႈၶိုၼ်းဝဵင်း လိူဝ်ႇ (မၢၼ်းတလေး) ၼၼ်ႉ ပဵၼ်ၽေးၵိုင်ႉၵၢင်ႉ ပိၼ်ႈတူၵ်းႁူၺ်ႈၵႂႃႇ ၼႂ်းၸႄႈဝဵင်းၵၢတ်ႇလေႃႉ မီးၵူၼ်းလူႉတၢႆၵႂႃႇၸွမ်း 3 ၵေႃႉ ။
ၼႂ်းၵႃးလမ်းၼၼ်ႉ တၢင်ႇၵူၼ်းၵႂႃႇပွႆးမႃး 17 ၵေႃႉ ဢၢၼ်းပွၵ်ႈၶိုၼ်း တၢင်းဝဵင်းလိူဝ်ႇ (မၢၼ်းတလေး) ပရိၵ်ႈၵႃးၵိုင်ႉၵၢင်ႉၶၢတ်ႇၵႂႃႇသေတူၵ်းႁူၺ်ႈၵႂႃႇၼႆ ၸုမ်းၸွႆႈထႅမ်ၾၢႆႇတူင်ႇဝူင်း ၵူၼ်း လၢတ်ႈၼႄၼင်ႇၼႆ။
“ၵူၼ်းၸိူဝ်းမၢတ်ႇၸဵပ်း တႃႇ 14 ၵေႃႉၼၼ်ႉ လႆႈသူင်ႇယူတ်းယႃတူဝ်ဝႆႉတီႈ ႁူင်းယႃလူင်ဝဵင်းၵၢတ်ႇလေႃႉ။ တႃႇ 3 ၵေႃႉသမ်ႉ မၢတ်ႇၸဵပ်းႁႅင်းဝႆႉလႄႈ လႆႈမႆႈၸႂ်ဝႆႉတေႉတေႉ။ တႃႇ 3 ၵေႃႉတႄႉ တၢႆထင်တီႈ ၵမ်းလဵဝ်ယဝ်ႉဢေႃႈ။”
လႆႈႁူႉဝႃႈ ၵူၼ်းၸိူဝ်းတၢႆၵႂႃႇ 3 ၵေႃႉၼၼ်ႉ ပဵၼ်ၼၢင်းယိင်း 2 ၵေႃႉ လႄႈ ၵူၼ်းၸၢႆး ၵေႃႉၼိုင်ႈ။ ၼႂ်းဢၼ်တၢႆၼၼ်ႉပႃးလုၵ်ႈဢွၼ်ႇ ဢႃႇယု 5 ၶူပ်ႇ ၵေႃႉၼိုင်ႈ လႆႈႁူႉၼင်ႇၼႆ။
ဢွင်ႈတီႈၵႃးပိၼ်ႈၵႂႃႇၼၼ်ႉ ပဵၼ်တီႈမၢႆလၵ်း 56 ၊ ႁိမ်းႁူင်းၾႆးၾႃႉမၵူၺ်ႇ ၵႄႈၵၢင်ဝၢၼ်ႈမၵူၺ်ႇ (မဂွေ) လႄႈဝၢၼ်ႈ (ဝက်ဖြူရေ) ၸႄႈဝဵင်းၵၢတ်ႇလေႃႉ။ ၵႃးဢၼ်ပိၼ်ႈၼႆႉ ပဵၼ်သႅၼ်းၵႃးဢွၼ်ႇ JINBEI လုၵ်ႉတၢင်းဝဵင်းတူၼ်ႈတီး ၵႂႃႇတၢင်းဝဵင်းလိူဝ်ႇ လႄႈ မဵၵ်ႉထီႇလႃႇ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ