ၼႂ်းၶၢဝ်းတၢင်း 2 ဝၼ်း ၵူၼ်း 2 ၵေႃႉၺႃးၶႃႈႁႅမ်တၢႆ တီႈဝဵင်းတူၼ်ႈတီးလႄႈ ဝဵင်းဢွင်ႇပၢၼ်း ၸိုင်ႈတႆးပွတ်းၸၢၼ်း ဢမ်ႇႁူႉပဵၼ်ၼမ်ႉမိုဝ်းၽႂ်။  

ၼႂ်းဝၼ်းတီႈ 16/10/2025  ယၢမ်းၵၢင်ၶိုၼ်း ရူတ်ႉၵႃးဢွၼ်ႇသႅၼ်းႁွၼ်ႊတႃႊၾိတ်ႉလမ်းၼိုင်ႈ တၢင်ႇၶၢပ်ႈတူဝ်တၢႆၵူၼ်းၵေႃႉၼိုင်ႈမႃးပႅတ်ႈၼိူဝ်သဵၼ်ႈတၢင်းၸဝ်ႈၸၢမ်ႇထုၼ်း ၼႂ်းပွၵ်ႉမဵဝ်ႉမ   ဝဵင်းလူင်တူၼ်ႈတီး ။

ၵူၼ်းၸၢႆးပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ၵူၼ်းဢၼ်ထုၵ်ႇၶႃႈႁႅမ်ဝႆႉၼၼ်ႉ ပဵၼ်ၵူၼ်းၸၢႆး ဢႃယု ၼႂ်းၵႄႈ 30-40 ၊ တီႈတူဝ်မၼ်းၸၢႆးၼၼ်ႉပဵၼ်ႁွႆးမိတ်ႈတႅင်းဝႆႉ လီၵူဝ်ၼႃႇ ။ မီးပႃးႁွႆးဢဝ်ၾႆးႁုမ်းဝႆႉ ၊ ႁူၾၢႆႇၼိုင်ႈၵေႃႈပိတ်းၶၢတ်ႇႁၢႆဝႆႉ”- ဝႃႈၼႆ ။ 

ၶမ်ႈၼၼ်ႉၵူၺ်း  ပလိၵ်ႈတီႈႁူင်းပလိၵ်ႈမၢႆ 1 လႄႈမၢႆ 2 မႃးဢဝ်ၶၢပ်ႈတူဝ် မၼ်းၸၢႆးၵႂႃႇသူင်ႇဝႆႉတီႈ ႁွင်ႈယဵၼ်တီႈႁူင်းယႃ ၸဝ်ႈၸၢမ်ႇထုၼ်း ၊   ပလိၵ်ႈမၢၼ်ႈတႂ်ႈ သိုၵ်းမၢၼ်ႈလၢတ်ႈဝႃႈ ၼႂ်းထူင်ၽူႈတၢႆ မီးၾႆးၶိတ်ႇ- မီးၵေႃႇ ၸိူဝ်းၼႆႉပႃးလႄႈ ၸၢင်ႈပဵၼ်လႆႈၵူၼ်းၵိၼ်ယႃႈ- ၼႆ ၵူၼ်းပိုၼ်ႉတီႈလၢတ်ႈၼင်ႇၼႆ ။

 ဝၼ်းသုၵ်းၵၢင်ဝၼ်း ဝၼ်းမိူဝ်ႈၼႆႉ  ၽူႈမီးပုၼ်ႈၽွၼ်းၶဝ် တူၺ်းၸွမ်းၵွင်ႈထၢႆႇ CCTV လႄႈ လႆႈႁၼ်ရူတ်ႉၵႃးဢွၼ်ႇတၢင်ႇတူဝ်တၢႆႈၵူၼ်းမႃးပႅတ်ႈၼိူဝ်တၢင်းၼႆႉပဵၼ်ၶၢဝ်းယၢမ်းၵၢင်ၶိုၼ်းမွၵ်ႈ 11 မူင်း။  

မိူဝ်ႈၼႆႉဝၼ်းတီႈ 17/10/2025 ယၢမ်းၵၢင်ၼႂ်ၼႆႉၵေႃႈ ထူပ်းႁၼ်ၶၢပ်ႈတူဝ်တၢႆ ၵူၼ်းၸၢႆးမွၵ်ႈဢႃယု 25 ပီ တီႈတၢင်းၶဝ်ႈဝဵင်းဢွင်ႇပၢၼ်း ၼႂ်းၼွင် မင်ႇၵလႃႇ ၼင်ႇၵဝ်ႇဝႃႈၼႆ ။

တူဝ်တၢႆၽူႈၸၢႆးၵေႃႉၼၼ်ႉပဵၼ် ၵူဝ်ႇထႅတ်ႉၵျေႃႇ ( ကိုထက်ကျော် ) ယူႇပွၵ်ႉၺွင်ႇပိင်ႇထွင်ႇ ၼႂ်းၸႄႈ ဝဵင်းဢွင်ႇပၢၼ်း ။ ၵူဝ်ႇထႅတ်ႉၵျေႃႇၼႆႉ ႁၢႆၵႂႃႇလႆႈ 3 ဝၼ်းယဝ်ႉ။ ၸင်ႇထူပ်းႁၼ်တူဝ်တၢႆၶိုၼ်းဝၼ်းမိူဝ်ႈၼႆႉ။ ပဵၼ်ၽႂ်ဢဝ်တၢႆ ဢဝ်တၢႆယွၼ်ႉသင်ၼႆၼၼ်ႉတႄႉ ပႆႇလႆႈႁူႉလွင်ႈတၢင်းတႅတ်ႈတေႃး။

တီႈဝဵင်းလူင်တူၼ်ႈတီးဝဵင်းလူင်ၸိုင်ႈတႆးပွတ်းၸၢၼ်းၼႆႉ ၸူဝ်ႈၶၢဝ်း2-3 လိူၼ်မႃးၼႆႉ မီးၽူႈလၵ်ႉၸၵ်ႉၶုတ်ႈလိူင်ႇၼမ်မႃး။ ၸူဝ်ႈပၢင်ပွႆးလိူၼ်သိပ်းဢဵတ်းလႄႈ ၽွင်းၶိုင်ပွင်တႃႇပွႆးႁူင်းၾႆးမိၼ်လိူၼ်သိပ်းသွင်ၼႆႉ ယိင်ႈၶႅၼ်းလိူင်ႇၼမ်။