ၼုမ်ႇၸၢႆးဢႃယု  28 ပီ ယူႇပွၵ်ႉၵျွင်းၵျီးသူႉ ဝဵင်းတူၼ်ႈတီး ၸိုင်ႈတႆးပွတ်းၸၢၼ်း ႁၢႆဝႆႉ ႁိုင်ၶၢဝ်းတၢင်း 10 ဝၼ်း ထိုင်ဝၼ်းမိူဝ်ႈၼႆႉ ပႆႇပွၵ်ႈမႃးႁိူၼ်းၶိုၼ်း ၵူၼ်းႁိူၼ်းမႆႈၸႂ်  ။ 

မၼ်းၸၢႆးၸိုဝ်ႈ-  ၵူဝ်ႇယေးတူႇရဢွင်ႇ ႁွင်ႉ ဢၵူး ႁဵတ်းၵၢၼ်သွၼ်လိၵ်ႈၼိူဝ်ဢွၼ်ႊလၢႆႊသေ ႁႃလဵင်ႉၵူၼ်းတီႈႁိူၼ်းဝႆႉ ။ မၼ်းၸၢႆးလၢတ်ႈၵူၼ်းတီႈႁိူၼ်းဝႃႈ တေၵႂႃႇတၢင်းၼွၵ်ႈၵမ်းၼိုင်ႈၼႆသေ ႁၢႆၵႂႃႇမိူဝ်ႈဝၼ်းတီႈ 12/10 /2025 ယၢမ်းၵၢင်ၼႂ် 11 မူင်း     ။

ၵူၼ်းၸမ်ၸႂ် ၵူဝ်ႇယေးတူႇရဢွင်ႇလၢတ်ႈၽူႈတွႆႇႁွၵ်ႈဝႃႈ –“ ၸွမ်းႁႃလၢႆးပေႃးၸေးယဝ်ႉ ၊ တီႈႁူင်းပလိၵ်ႈ ၊ CCTV ၼႂ်းပွၵ်ႉၸိူဝ်းၼႆႉၵေႃႈႁႃတူၺ်းယူႇ ၊ ဢမ်ႇလႆႈႁူႉၸွမ်းသင်ထိုင်မိူဝ်ႈၼႆႉ ၊ ဢွၵ်ႇႁိူၼ်းၵႂႃႇသေ ႁၢႆၵႂႃႇၸိူင်ႉၼၼ်ၵူၺ်း၊ တၢင်းတီႈႁိူၼ်းၵေႃႈဢမ်ႇမီးပၼ်ႁႃသင် ဢမ်ႇၽိတ်းမေႃးသင်ၵၼ်။  ပေႃးတေဝႃႈ မၼ်းတင်ႈၸႂ်ပၢႆႈၼႆ ၸိုင်သမ်ႉဢမ်ႇဢဝ်ၶူဝ်းၶွင်ငိုၼ်းၶမ်းၸိူဝ်းၼႆႉၵႂႃႇသင်သေမဵဝ်း ”– ဝႃႈၼႆ ။

 ၵူၼ်းႁိူၼ်းၸွမ်းႁႃ မိူၼ်ၼင်ႇ တီႈၵျွင်းသွၼ်လိၵ်ႈ ပရႁိတ ၊ ၵျွင်းမုၼ်ၸဝ်ႈ လႄႈ ႁိမ်းႁွမ်း တူၼ်ႈတီးၸိူဝ်းၼႆႉၵေႃႈ  ဢမ်ႇထူပ်းႁၼ်။  ၵူၼ်းႁိူၼ်းပဵၼ်ဢၼ်မႆႈၸႂ် တၢႆႁိုဝ်လိပ်းၶီးဢမ်ႇလႆႈႁူႉၶၢဝ်ႇငၢဝ်း၊ ပိူင်လူင်ၵူဝ်ၺႃးတီႉၵႂႃႇၾိုၵ်းၵၢၼ်သိုၵ်းသေ ၸႂ်ႉၶိုၼ်ႈၼႃႈသိုၵ်းၵမ်းလဵဝ်ၸိူဝ်းၼႆႉၵူၺ်းယဝ်ႉဝႃႈၼႆ။  

မိူဝ်ႈဝၼ်းတီႈ14/10/2025 ၼၼ်ႉၵေႃႈ ၸၢႆးၼုမ်ႇဢွၼ်ႇဢႃယုတိုၵ်ႉလႆႈ 20 ပၢႆ လုၵ်ႉဝဵင်းၵဵင်းတုင်ၸိုင်ႈတႆးပွတ်းဢွၵ်ႇသေ ဢၢၼ်းတေပွၵ်ႈၶိုၼ်းႁိူၼ်းဢၼ်မီးတီႈဝဵင်းမႂ်ႇဢေးတႃႇယႃႇ မိူင်းတႆးပွတ်းၸၢၼ်း။မၼ်းၸၢႆးႁၢႆၵႂႃႇၽွင်းႁွတ်ႈထိုင် ၼႂ်းၵႄႈ ဝဵင်းၼမ်ႉၸၢင် – လွႆလႅမ်  ထိုင်ဝၼ်းမိူဝ်ႈၼႆႉ ဢမ်ႇပႆႇထူပ်းႁၼ်တူဝ်ၶိုၼ်း  ။

ငဝ်းလၢႆးဝၢၼ်ႈမိူင်းဢမ်ႇလီၸိူင်ႉၼႆႉ လုၵ်ႈဢွၼ်ႇၸၢႆး လုၵ်ႈဢွၼ်ႇယိင်းၵေႃႈ မီးၽေးၼမ်၊ ၵႆႉႁၢႆၼႃႇ၊ ၽေးၵၢၼ်လၵ်ႉၵူၼ်း ၵႃႉၶၢႆၵူၼ်း ႁူၺ်းႁွင်ႉၵႂႃႇႁဵတ်းၵၢၼ်ၵျႃႊၽျႅၼ်ႉ၊ တီႉၺွပ်းၵႂႃႇၾိုၵ်းၵၢၼ်သိုၵ်း ၸဵမ် ၸိူဝ်းၼႆႉ။ ၵွပ်ႈၼႆ  ယူႇတီႈပေႃႈမႄႈၽူႈၵုမ်းတူၺ်းသေ ႁႂ်ႈၾၢင်ႉတူၺ်းလုၵ်ႈၽႂ်လၢင်းမၼ်းလီလီ ၼႆယဝ်ႉ။

ၵဵဝ်ၵပ်းလွင်ႈၼႆႉ ၼၢင်းယိင်းၸွႆႈထႅမ် သုၼ်ႇလႆႈသုၼ်ႇပဵၼ်ၵူၼ်းလၢတ်ႈၽူႈတွႆႇႁွၵ်ႈဝႃႈ – “လႆႈႁၼ်ၸႅင်ႈလႅင်းလီဝႃႈ ငဝ်းလၢႆးပိုၼ်ႉတီႈၼႆႉ ဢမ်ႇမီးလွင်ႈႁူမ်ႇလူမ်ႈ တွၼ်ႈတႃႇ ၵူၼ်းမိူင်းတင်းသဵင်ႈ ။ ဢမ်ႇဝႃႈ လဵၵ်ႉယႂ်ႇၼုမ်ႇထဝ်ႈယိင်းၸၢႆးတင်းသဵင်ႈ တေပဵၼ်ယွၼ်ႉလွင်ႈသိုၵ်းလွင်ႈသိူဝ် ဢမ်ႇၼၼ် ငဝ်းလၢႆးပၢႆးမၢၵ်ႈမီး ၊ ဢမ်ႇၼၼ် ယႃႈမဝ်းၵမ် ၊ တေၸၢင်ႈၵဵဝ်ၶွင်ႈၵၼ်တင်းသဵင်ႈ ”– ဝႃႈၼႆ ။

ၽွင်းငဝ်းလၢႆးဝၢၼ်ႈမိူင်းဢမ်ႇၼိမ်ၼႆႉ ယႃႈမဝ်းၵမ်လိူင်ႇၼမ် KTV ႁၢၼ်ႉၵိၼ်ၵျေႃႇၵေႃႈလိူင်ႇၼမ် ၵၢၼ်လွၵ်ႇလႅၼ်ၵိၼ်ၵၼ် ၵျႃႊၽျႅၼ်ႉ ၵေႃႈလိူင်ႇၼမ်။ ၵူၼ်းၼုမ်ႇ လုၵ်ႈဢွၼ်ႇမိူင်းတႆး ၵႆႉႁၢႆ ၵမ်ႈၽွင်ႈထုၵ်ႇဢဝ်ၵႂႃႇၶၢႆၵိၼ် ၵမ်ႈၽွင်ႈၵႂႃႇႁဵတ်းၵၢၼ်တီႈပၢင်တေႃႇလွင်း ၸွမ်းဝဵင်းယႂ်ႇဝဵင်းလူင် မၢင်ၵေႃႉၵေႃႈႁၼ်ၶိုၼ်း မၢင်ၵေႃႉၵေႃႈဢမ်ႇႁၼ်ၶိုၼ်း။