သိုၵ်းထႆးပႂ်ႉႁူမ်ႇလူမ်ႈလႅၼ်လိၼ် မိူင်းၾၢင် ၵဵင်းမႆႇလႄႈ တင်းၸုမ်းၵူၼ်းၸၢႆးမွၵ်ႈ 20 ၵေႃႉ ယိုဝ်းၵၼ်တီႈဢိူင်ႇမွၼ်ႉပိၼ်ႇ ဝဵင်းမိူင်းၾၢင် ၾၢႆႇၸုမ်းၵူၼ်းၸၢႆးၼၼ်ႉတၢႆ 15 ၵေႃႉဝႃႈၼႆ။
ဝၼ်းတီႈ 8/12/2022 ၵၢင်ၼႂ်ၸဝ်ႉ ၸဝ်ႈၼႃႈတီႈႁူမ်ႇလူမ်ႈလႅၼ်လိၼ်ထႆး တီႈဢိူင်ႇမွၼ်ႉပိၼ်ႇ မိူင်းၾၢင် (ဢၼ်တေႃႇၼႃႈ ၵိင်ႇၸႄႈဝဵင်းပုင်ႇပႃႇၶႅမ် ၸႄႈဝဵင်းမိူင်းတူၼ် မိူင်းတႆး) ႁၼ်ၵူၼ်းၸၢႆးၸုမ်းၼိုင်ႈဢဵၼ်ႁႅင်းမွၵ်ႈ 20 ၵေႃႉ ပႃးထူင်ပိူဝ်ႉႁင်းၽႂ်မၼ်းသေ လတ်းထိူၼ်ႇမႃး ။
သိုၵ်းထႆးႁႄႉၵိုတ်းတႃႇၵူတ်ႇထတ်း ၸုမ်းၶဝ်ဢမ်ႇၵိုတ်းသေဢမ်ႇၵႃး ၶိုၼ်းယိုဝ်းသိုၵ်းထႆးလႄႈ လႆႈပိုတ်းယိုဝ်းၵၼ်ႁိုင်မွၵ်ႈ 10 မိၼိတ်ႉ ။ ၾၢႆႇၵူၼ်းၸုမ်းၼၼ်ႉ တၢႆ 15 ၵေႃႉ။ သိုၵ်းထႆးယိုတ်းလႆႈ ထူင်ပိူဝ်ႉ 29 လုၵ်ႈ ဢၼ်မီးယႃႈမဝ်းၵမ် ယႃႈဢၢႆႉသ် လႄႈ ၵွင်ႈၵၢင်ႇမၢၵ်ႇမိုဝ်ႈၸိုၼ်းယၢမ်းတင်းၼမ် သိုၵ်းထႆးပိုၼ်ၽၢဝ်ႇဝႆႉၼင်ႇၼႆ။
ၵူၼ်းၼႂ်းၸုမ်း ၸိူဝ်းဢၼ်ဢမ်ႇတၢႆသေပၢႆႈလွတ်ႈၵေႃႈလႅပ်ႈတေမီးထႅင်ႈလႄႈ ၾၢႆႇသိုၵ်းထႆးလႆႈထႅမ်ႁႅင်းသိုၵ်းသေ သိုပ်ႇသွၵ်ႈႁႃတူဝ် ဝႆႉယူႇ ၶၢဝ်ႇ Chiangmai News ပိုၼ်ၽၢဝ်ႇဝႆႉၼင်ႇၼႆ။
ၵူၼ်းၸုမ်းၼႆႉ သိုၵ်းထႆးဝႃႈ လုၵ်ႉတၢင်းမိူင်းတႆးလၵ်ႉၶၢမ်ႈလႅၼ်လိၼ် တေႃႉယႃႈမဝ်းၵမ်ဢၢၼ်းမႃးၶၢႆတၢင်းမိူင်းထႆး ဝႃႈၼႆသေတႃႉ ပဵၼ်ၵူၼ်းၽႂ်ၸုမ်းလႂ်ၼႆတႄႉဢမ်ႇပိုတ်ႇလၢတ်ႈဝႆႉတႅတ်ႈတေႃး။
