မၢၵ်ႇတႅၵ်ႇၵၢင်ဝဵင်းပၢင်သၢင်း မီးၵူၼ်းမၢတ်ႇၸဵပ်းလူႉတၢႆၼမ်၊ ဢၼ်မၢတ်ႇၸဵပ်းပႃး တင်းမႄႈမၢၼ်းလႄႈၵူၼ်းထဝ်ႈ။
ဝၼ်းတီႈ 30/11/2022 မိူဝ်ႈၼႆႉယၢမ်းၵၢင်ၼႂ် မၢၵ်ႇဢၼ်ႁၢင်ႈၵၢင်ဝႆႉၼႂ်းရူတ်ႉၵႃး လမ်းၼိုင်ႈ ဢၼ်ၵိုတ်းၸွတ်ႇဝႆႉတီႈတႃႈရူတ်ႉ ၊ ၼႃႈလၢၼ်ႉၶဝ်ႈသွႆး ၼၼ်ႉတႅၵ်ႇ ။ ႁႅင်းတႅၵ်ႇႁၢဝ်ႈႁႅင်းလႄႈ တိူဝ်ႉသႂ်ႇၵူၼ်းၸိူဝ်းမီးႁိမ်းႁွမ်း မၢတ်ႇၸဵပ်းလူႉတၢႆ ဢမ်ႇယွမ်း 30 ၵေႃႉ ။
ၵူၼ်းမၢတ်ႇၸဵပ်းၼၼ်ႉ ပႃးတင်းၼၢင်းယိင်း ၵူၼ်းထဝ်ႈလႄႈမႄႈမၢၼ်းၸိူဝ်းၼႆႉ။ တူဝ်ၵူၼ်းမၢတ်ႇၸဵပ်းၵေႃႈ ဢဝ်သူင်ႇႁူင်းယႃဝႆႉမူတ်းယဝ်ႉသေ ၵူၼ်းၸိူဝ်းတၢႆၼၼ်ႉ ပဵၼ်ၽႂ်လၢႆလၢႆၼႆၸဝ်ႈၼႃႈတီႈUWSA တိုၵ်ႉၵူတ်ႇထတ်းတူၺ်းယူႇ ၵူၼ်းပိုၼ်ႉတီႈ ဢၼ်ယူႇဝဵင်းပၢင်သၢင်း ပွင်ႇၶၢဝ်ႇမႃးၼင်ႇၼႆ။
လွင်ႈၼႆႉ ယူႇတီႈၽူႈတွႆႇႁွၵ်ႈ ၶတ်းၸႂ်ၵပ်းသိုပ်ႇတီႈၽူႈၶၢၼ်ပၢၵ်ႇ UWSA ၵေႃႈဢမ်ႇလႆႈလႄႈ ဢမ်ႇၸၢင်ႈႁူႉလႆႈႁူဝ်ယွႆႈတႅတ်ႈတေႃး။
မၢၵ်ႇၼႆႉပဵၼ်ၽႂ်ႁၢင်ႈၵၢင်တေႃႇၽႂ်တႄႉဢမ်ႇႁူႉ ။ ၵူၺ်းၵႃႈ ဢၼ်တႅၵ်ႇၼႆႉပဵၼ်တၢင်းၼႃႈလုမ်း TNLA သမ်ႉပဵၼ်တီႈၵူၼ်းၵိုၼ်းလႄႈႁဵတ်းႁႂ်ႈတိူဝ်ႉၵူၼ်းမိူင်းၵူၺ်း ဝႃႈၼႆ။
ဢိင်ၼိူဝ်မၢၵ်ႇတႅၵ်ႇၼႆႉသေ သိုၵ်း UWSA သူင်ႇႁႅင်းသိုၵ်းဢဝ်ႁူမ်ႇလူမ်ႈဝႆႉတူဝ်ႈဝဵင်းပၢင်သၢင်းဝႆႉ ၵူၼ်းပိုၼ်ႉတီႈလၢတ်ႈၼင်ႇၼႆ။
