Tuesday, November 29, 2022

သိုၵ်းမၢၼ်ႈတင်း SSPP ယိုဝ်းၵၼ် တီႈဝဵင်းသီႇပေႃႉ သိုၵ်းမၢၼ်ႈတၢႆ 5 ၵေႃႉ

Must read

မိူဝ်ႈၼႆႉ ဝၼ်းတီႈ 25/11/2022 ယၢမ်းၵၢင်ၼႂ် 6 မူင်း သိုၵ်းမၢၼ်ႈဢဵၼ်ႁႅင်း မွၵ်ႈ 80 လေႃႇတိုၵ်း ပႃႇတီႇမႂ်ႇသုင်ၸိုင်ႈတႆး/ တပ်ႉ သိုၵ်းၸိုင်ႈတႆး SSPP/SSA တီႈဝၢၼ်ႈၵုင်းသႃႇ ယၢၼ်ဝဵင်းမွၵ်ႈ 30 လၵ်းပၢႆ ၼႂ်းၸႄႈဝဵင်းသီႇပေႃႉ ၸႄႈတွၼ်ႈၵျွၵ်ႉ မႄး ၸိုင်ႈတႆးပွတ်းႁွင်ႇ။

မၢၵ်ႇဢၼ်သိုၵ်းမၢၼ်ႈယိုဝ်းမႃးသေဢမ်ႇတႅၵ်ႇ တီႈသီႇပေႃႉ

ၽူႈၸၢႆး ဢႃယု 30 ပၢႆ ၵူၼ်းဝဵင်းသီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ – “သိုၵ်းမၢၼ်ႈ ဢၼ်ပၵ်းဝႆႉတီႈႁူဝ် ဝၢၼ်ႈၵုင်းသႃႇတင်း တပ်ႉ 23 သီႇပေႃႉ ႁူမ်ႈၵၼ် ဢဵၼ်ႁႅင်းမွၵ်ႈ 80 ၼႆႉ ၶဝ်ႈမႃးၼႂ်းဝၢၼ်ႈၵုင်းသႃႇသေ ယိုဝ်း SSPP ။ သွင်ၾၢႆႇ ယိုဝ်းၵၼ်ႁိုင်မွၵ်ႈ 30 မိၼိတ်ႉၼႆႉ။ ၾၢႆႇသိုၵ်းမၢၼ်ႈ  တၢႆ 5 ၵေႃႉ တီႈၼိူဝ်သဵၼ်ႈတၢင်းဝၢၼ်ႈၵုင်း သႃႇ – သီႇပေႃႉ”- ဝႃႈၼႆ။

ယၢမ်းလဵဝ် ၵူၼ်းဝၢၼ်ႈႁိမ်းႁွမ်းၼၼ်ႉမွၵ်ႈ 3 ဝၢၼ်ႈ လႆႈဢွၼ်ၵၼ်ပၢႆႈ ၵႂႃႇတၢင်းဝၢၼ်ႈလူင်ယူမ်းလႄႈ ဝဵင်းသီႇ ပေႃႉ ႁူဝ်ၵူၼ်းတေမီးမွၵ်ႈ 600  ။

“တေပဵၼ်ၵူၼ်းဝၢၼ်ႈၵုင်းသႃႇ၊ ဝၢၼ်ႈၼွင်ဢၢင်လႄႈ ဝၢၼ်ႈၵုင်းပိင် ၸိူဝ်းၼႆႉ။ၵမ်ႈၽွင်ႈ ဢွၼ်ၵၼ်ၽူင်ႉပၢႆႈၵႂႃႇသွၼ်ႈတၢင်း ဝဵင်းသီႇပေႃႉ၊ ဝၢၼ်ႈလူင်ယူမ်း တေမီးႁူဝ်ၵူၼ်းမွၵ်ႈ 600  ။ ယၢမ်းလဵဝ် သိုၵ်းမၢၼ်ႈၼႆႉ ဢဝ်တီႈယူႇဝႆႉ ၼႂ်းဝၢၼ်ႈၵုင်းသႃႇ မူတ်းယဝ်ႉ”- ၵူၼ်းပိုၼ်ႉတီႈ ဝဵင်းသီႇပေႃႉ သိုပ်ႇလၢတ်ႈၼႄၼင်ႇၼႆ။

လိူဝ်ၼၼ်ႉ သိုၵ်းမၢၼ်ႈ ဢၼ်ဢဝ်တီႈယူႇဝႆႉ ၼႂ်းဝၢၼ်ႈၵုင်းသႃႇၼၼ်ႉ လၢမ်းလိမ်းယိုဝ်းၵွင်ႈလူင် ၵႂႃႇၸွမ်းႁူၺ်ႈလွႆ ၸိူဝ်းၼႆႉ ထႅင်ႈ တင်းၼမ်။

“ယၢမ်းလဵဝ် သိုၵ်းမၢၼ်ႈၼႆႉ ၸွမ်းၼင်ႇၶဝ်ထၢင်ႇဝႃႈ SSPP ယူႇဝႆႉတၢင်းၼႆႉတၢင်းၼၼ်ႉၼႆသေ ယိုဝ်းၵွင်ႈ လူင်ၵႂႃႇၸွမ်းၼႂ်း ႁူၺ်ႈလွႆတင်းၼမ်။ ယဝ်ႉၵေႃႈ ယိုဝ်းၵႂႃႇတၢင်းဝၢၼ်ႈၶျွင်းသူင်ႇ တၢင်းပူၼ်ႉၵေႃႈၼမ် ၶႃႈ ဢေႃႈ။ တီႈဝၢၼ်ႈၵုင်းသႃႇၼႆႉ SSPP ၶဝ်မႃးပၵ်းယူႇဝႆႉႁိုင်ယဝ်ႉၶႃႈ။ မိူဝ်ႈဝႃးသမ်ႉ တီႈဝၢၼ်ႈၵုင်းသႃႇၼႆႉ ၸတ်းႁဵတ်းပၢင်ပွႆးႁူမ်ၸူမ်းႁပ်ႉတွၼ်ႈပီမႂ်ႇတႆးသေ ယူႇတီႈ SSPP ဢဝ်ႁူမ်ႇလူမ်ႈပၢင်ပွႆးပၼ်။ ၵွပ်ႈၼႆ လႄႈ ၶဝ်တေဢဝ်လွင်ႈၼႆႉသေ ၶဝ်ႈယိုဝ်းႁိုဝ် ဢမ်ႇႁူႉ”- ၵူၼ်းပိုၼ်ႉတီႈ သိုပ်ႇ လၢတ်ႈၼႄၼင်ႇၼႆ။

ယၢမ်းလဵဝ် တီႈၼႂ်းဝၢၼ်ႈၵုင်းသႃႇၼႆႉ သိုၵ်းမၢၼ်ႈ ဢဵၼ်ႁႅင်းမွၵ်ႈ 80 ဢဝ်တီႈယူႇပၵ်းဝႆႉ ၼႂ်းဝၢၼ်ႈမူတ်း ယဝ်ႉ ဝႃႈၼႆ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- SHAN's Apps -spot_img

ၶၢဝ်ႇလိုၼ်းသုတ်း