Tuesday, November 29, 2022

သိုၵ်းတဢၢင်း TNLA ၵဵပ်းၶွၼ်ႇၸဝ်ႈႁၢၼ်ႉပိုတ်ႇၵိုၵ်းႁိူၼ်းတီႈဝဵင်းမူႇၸေႊ

Must read

တီႈဝဵင်းမူႇၸေႊ ၸိုင်ႈတႆးပွတ်းႁွင်ႇၼၼ်ႉ ၸုမ်းသိုၵ်း TNLA ၵဵပ်းၶွၼ်ႇၸဝ်ႈႁၢၼ်ႉဢၼ်ပိုတ်ႇၵိုၵ်းႁိူၼ်း ၸွမ်းပွၵ်ႉယွမ်ႇ ႁၢၼ်ႉဢွၼ်ႇႁၢၼ်ႉလဵၵ်ႉၵေႃႈဢမ်ႇဝႆႉ ၸႅၵ်ႇပၼ်ၶႅပ်းဝႂ်ၵဵပ်းၶွၼ်ႇၵူႈႁၢၼ်ႉ။

မိူဝ်ႈၵွၼ်ႇတပ်ႉသိုၵ်း TNLA ၵဵပ်းၶွၼ်ႇတီႈယေးငိုၼ်း ၊ ၶွမ်ႊပၼီႊ၊ ၸဝ်ႈပၢႆးမၢၵ်ႈမီးၶဝ်ၵူၺ်းသေတႃႉ တင်ႈဢဝ်လိူၼ်ဢွၵ်ႊထူဝ်ႊပိူဝ်ႊ ၼူဝ်ႊဝႅမ်ႊပိူဝ်ႊၼႆႉမႃးတႄႉ ၸႅၵ်ႇဝႂ်ၵဵပ်းၶွၼ်ႇၸူးၵူႈႁၢၼ်ႉၵူႈႁွင်ႈ။ ဢိင်ၼိူဝ်ႁၢၼ်ႉလဵၵ်ႉ/ယႂ်ႇသေမၢင်ႁၢၼ်ႉၵေႃႈထုၵ်ႇယွၼ်း 10 သႅၼ် မၢင်ႁၢၼ်ႉၵေႃႈ 15 သႅၼ် -20 သႅၼ် တေႃႇပီ ၸိူဝ်းၼႆႉ။

Photo Tung Huay Li – ဝဵင်းမူႇၸေႊ

ၵူၼ်းမူႇၸေႊ ဢၼ်ပိုတ်ႇႁၢၼ်ႉၵိုၵ်းႁိူၼ်းၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ-“ ႁဝ်းၶႃႈပိုတ်ႇႁၢၼ်ႉၶၢႆၶူဝ်းယူႇၸိူင်ႉၼႆ တင်းပီၼႆႉ ၼမ်ႉတွၼ်းမၼ်းယင်းဢမ်ႇမီး 15 သႅၼ် 20 သႅၼ်ၶႃႈလူး။ ၶဝ်သမ်ႉမႃးယွၼ်းၸိူင်ႉၼၼ် ႁဝ်းၶႃႈၼႆႉ တေပၼ်ၵေႃႈဢမ်ႇမီး ဢမ်ႇပၼ်ၵေႃႈယၢပ်ႇၸႂ်။ ယူႇၵေႃႈဢမ်ႇမီးတၢင်းသိူဝ်းသေဢိတ်းယဝ်ႉၶႃႈ။ ယဝ်ႉၵေႃႈမိူၼ်ဢမ်ႇမီးလွင်ႈႁူမ်ႇလူမ်ႈဝႆႉဢေႃႈ ”- ဝႃႈၼႆ။

 ၸဝ်ႈႁၢၼ်ႉၶၢႆၶူဝ်းၼၼ်ႉလၢတ်ႈဝႃႈ ပိုတ်ႇႁၢၼ်ႉၶၢႆၶူဝ်းမႃးလႆႈမွၵ်ႈ 10 ပီယဝ်ႉသေတႃႉ ၸင်ႇႁႃၺႃးယွၼ်းၶွၼ်ႇပွၵ်ႈၼႆႉပဵၼ်ပွၵ်ႈၵမ်းႁႅၵ်ႈ။ ပီၼႆႉၸဝ်ႈႁၢၼ်ႉဢွၼ်ႇဢိတ်းၵေႃႈၺႃးယွၼ်းလႄႈလႆႈဝႃႈပဵၼ်ငဝ်းလၢႆးဢၼ်ႁၢဝ်ႈႁႅင်းတႄႉတႄႉ ဝႃႈၼႆ။

ၵဵဝ်ႇၵပ်းလွင်ႈၼႆႉၽူႈတွႆႇႁွၵ်ႈၶတ်းၸႂ်တိတ်းတေႃႇၸူး  ၵႅမ်ၸွမ်ႁၢၼ် တႃႉၽူင်းၵျေႃႇ ၽူႈၶၢၼ်ပၢၵ်ႇTNLA ယူႇၵေႃႈ ဢမ်ႇႁပ်ႉသၢႆၾူၼ်း။

 “ငဝ်းလၢႆးႁႃၵိၼ်လဵင်ႉတွင်ႉယၢပ်ႇၽိုတ်ႇၸိူင်ႉၼႆ ပၢႆးမၢၵ်ႈမီးတူၵ်းၸိူင်ႉၼႆ ၽႂ်ဢမ်ႇပၼ်လႆႈလေႃႇ 15 သႅၼ် 20 သႅၼ်။ ၶႂ်ႈတုၵ်းယွၼ်းၸုမ်းယိပ်းၵွင်ႈၵၢင်ႇၵူႈၸုမ်းၶႃႈဢေႃႈ ႁႂ်ႈႁၼ်ထိုင်ၵၢင်ၸႂ်ၵူၼ်းမိူင်းသေ ယႃႇပေၵဵပ်းပေႃးပဵၼ်ထၢၼ်ႇၼႆႉ ၼႆၶႃႈဢေႃႈ”- ၵူၼ်းၶၢႆၶူဝ်းတီႈမူႇၸေႊၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈၼင်ႇၼႆ။

 တီႈဝဵင်းမူႇၸေႊ ၸိုင်ႈတႆးပွတ်းႁွင်ႇၼႆႉ ၼွၵ်ႈလိူဝ်ၸုမ်းသိုၵ်းမၢၼ်ႈပလိၵ်ႈမၢၼ်ႈယဝ်ႉမီးၸုမ်းသိုၵ်းတဢၢင်း  TNLA သိုၵ်းၶၢင် KIA သိုၵ်း SSPP/SSA ဢိၵ်ႇၸုမ်းပျီႇတူႉၸိတ်ႉတင်းၼမ်တင်းလၢႆ။ ၵူၼ်းမိူင်းလႆႈပၼ်ၶွၼ်ႇတီႈၸုမ်းယိပ်းၵွင်ႈၵၢင်ႇၵူႈၸုမ်း။ ပီၼႆႉယိင်ႈၶႅၼ်းၼႃႇၸႂ်လိူဝ်ၵူႈပီ။ မၢင်ၸုမ်း ယွၼ်းပဵၼ် 2-3 ၵမ်း။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- SHAN's Apps -spot_img

ၶၢဝ်ႇလိုၼ်းသုတ်း