မိူဝ်ႈၼႆႉ ဝၼ်းတီႈ 9/11/2022 ယၢမ်းၵၢင်ၼႂ်မွၵ်ႈ 9 မူင်း ၽူႈၸၢႆးၵေႃႉၼိုင်ႈ ထုၵ်ႇယိုဝ်းတၢႆ တီႈႁိမ်းၸၼ်ႉၸွမ် ၵဵင်းတုင် ဝၢၼ်ႈၼႃႈၶမ်း ဢိူင်ႇယၢင်းလေႃး ဝဵင်းၵဵင်းတုင် ၸိုင်ႈတႆးပွတ်းဢွၵ်ႇၶူင်း ၊ ပဵၼ်ယွၼ်ႉသင် ၼမ်ႉမိုဝ်းၽႂ် ၸိူဝ်း ၼႆႉ ပႆႇႁူႉ တူဝ်ၵူၼ်းႁၢႆႉၼၼ်ႉၵေႃႈ ပႆႇတီႉၺွပ်းလႆႈ။
ၵူၼ်းၼုမ်ႇ ပိုၼ်ႉတီႈ ဝဵင်းၵဵင်းတုင် လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ ၶဝ်ယိုဝ်းၵၼ်တၢႆ ပဵၼ်ယွၼ်ႉသင်လႄႈ ယိုဝ်း ၵၼ်တၢႆတႄႉ ဢမ်ႇႁူႉလွင်ႈတၢင်းႁူဝ်ယွႆႈမၼ်းၶႃႈ။ ပဵၼ်ၵူၼ်းယွင်ႇမဝ်းယႃႁိုဝ် ဢမ်ႇၼၼ် ၵူၼ်းၸင်းၵၼ်လႄႈ ႁဵတ်းတီႈ ၵၼ်ႁိုဝ် ဢမ်ႇႁူႉ ထိုင်တီႈပေႃးလႆႈဢဝ်ၵွင်ႈသတ်ႉယမ်းသေ ယိုဝ်းၵၼ်တၢႆ ၸိူင်ႉၼႆ”- ဝႃႈၼႆ။
ဝၢႆးသေ မီးလွင်ႈ ပိုတ်းယိုဝ်းၵၼ်တၢႆ ၸိူင်ႉၼႆယဝ်ႉ တီႈၵဵၵ်ႉၶဝ်ႈဢွၵ်ႇဝဵင်းၵဵင်းတုင် – တူၼ်ႈတီးၼၼ်ႉၵေႃႈ ယူႇတီႈ ပလိၵ်ႈ သိုၵ်းမၢၼ်ႈ ပိၵ်ႉဝႆႈၵမ်းၼိုင်ႈသေ ၵူတ်ႇထတ်းၸႅတ်ႈထၢမ် ၵူၼ်းၶဝ်ႈဢွၵ်ႇၵႂႃႇမႃး ႁၢဝ်ႈႁႅင်း။
“ ၸဵမ်ယေးသိုၵ်းမၢၼ်ႈ ၸိူဝ်းၼႆႉ ဢွၼ်ၵၼ်သွၵ်ႈတဝ် ႁႃတူဝ်ၵူၼ်းႁၢႆႉၼၼ်ႉ ယဝ်ႉၵေႃႈ ပိၵ်ႉၶူဝ်တီႈၵဵင်းၽွင်း တၢင်း ၵႂႃႇတူၼ်ႈတီးၼၼ်ႉသေ ၵူတ်ႇထတ်းၸႅတ်ႈထၢမ် ၵူၼ်းၵႂႃႇမႃးႁၢဝ်ႈႁႅင်း ၊မွၵ်ႈၵၢင်ၼႂ် 9 မူင်းၶိုင်ႈၼႆႉ တိုၵ်ႉပဵၼ် ၽွင်း သုၵ်ႉမၼ်းၶႃႈ”- ၵူၼ်းၼုမ်ႇ ပိုၼ်ႉတီႈ ဝဵင်းၵဵင်းတုင် သိုပ်ႇလၢတ်ႈၼႄၼင်ႇၼႆ။
ၵေႃႉမႃးယိုဝ်းၼၼ်ႉ ပဵၼ်ၽႂ်ၸုမ်းလႂ်တႄႉ တေႃႇထိုင်ယၢမ်းလဵဝ် ပႆႇႁူႉ ဝၢႆးယိုဝ်း ယဝ်ႉၵေႃႈမၼ်းၸၢႆးၶီႇရူတ်ႉၶိူင်ႈပၢႆႈၵမ်းလဵဝ် ဝႃႈၼႆ။
ၵူၼ်းပိုၼ်ႉတီႈ ဝဵင်းၵဵင်းတုင် လၢတ်ႈတီႈၽူႈတွႆႇႁွၵ်ႈဝႃႈ – “လွင်ႈယိုဝ်းၵၼ်တၢႆၼၼ်ႉ ယွၼ်ႉသင်လႄႈ ယိုဝ်းၵၼ်တၢႆ ဢၼ်ဝႃႈ ၼၼ်ႉ ၽႂ်ၵေႃႈ ပႆႇႁူႉငဝ်ႈႁၢၵ်ႈမၼ်း။ သင်ဝႃႈ ၶဝ်ၸင်းသေ ယိုဝ်းၵၼ်တႄႉ ပဵၼ်မဵဝ်းၼိုင်ႈ။ သင်ဝႃႈ မႃးၸူၼ်ၵၼ်သေ ထိုင် တီႈ ပေႃးလႆႈယိုဝ်းၵၼ်တၢႆ ၸိူင်ႉၼႆတႄႉ တႃႇႁဝ်းၶႃႈ ၵူၼ်းမိူင်းတႄႉ ပဵၼ်ဢၼ်လီမႆႈၸႂ် ဢမ်ႇမီးလွင်ႈႁူမ်ႇလူမ်ႈၼၼ်ႉၶႃႈယဝ်ႉ ”- ဝႃႈၼႆ။
တူဝ်ၵူၼ်းတၢႆၼၼ်ႉ ယူႇတီႈ ၸုမ်းၸွႆႈထႅမ် ဝဵင်းၵဵင်းတုင် လႆႈမႃးတေႃႉဢဝ်ၵႂႃႇသူင်ႇဝႆႉတီႈႁူင်းယႃလူင် ဝဵင်းၵဵင်းတုင် ဝႆႉယဝ်ႉ ဝႃႈၼႆ။
ဝၢႆးသိုၵ်းမၢၼ်ႈ ယိုတ်းမိူင်းမႃး ၸမ်ၶၢဝ်းတၢင်းသွင်ပီၼႆႉ ၼႂ်းၸႄႈဝဵင်းၵဵင်းတုင် မီးၽူႈလၵ်ႉၸၵ်ႉၶုတ်ႈ၊ ပၢင်တေႃႇလွင်း၊ ယႃႈ မဝ်းၵမ် ၸိူဝ်းၼႆႉ လိူင်ႇၼမ်ႁႅင်း ပူၼ်ႉမႃး မိူဝ်ႈလိူၼ်ဢွၵ်ႊထိူဝ်ႊပိူဝ်ႊၼၼ်ႉ ရူတ်ႉၶိူင်ႈၵူၼ်းမိူင်းပိုၼ်ႉတီႈႁၢႆ ဢမ်ႇယွမ်း 5 လမ်း ယဝ်ႉ ၵဵဝ်ႇၵပ်းလွင်ႈၼႆႉ ပလိၵ်ႈသိုၵ်းမၢၼ်ႈ ပႆႇတီႉၺွပ်းလႆႈ တူဝ်ၵူၼ်းႁၢႆႉ ၽူႈလၵ်ႉမႃးသေပွၵ်ႈ။
ပူၼ်ႉမႃး မိူဝ်ႈဝၼ်းတီႈ 17/11/2021 ၵူၼ်းဝၢၼ်ႈၵႂႃႇထူပ်းႁၼ်ၶၢပ်ႈတူဝ်တၢႆ ၼၢင်းယိင်းၵေႃႉၼိုင်ႈ ၸိုဝ်ႈလႆႈႁူႉဝႃႈ တေႃႇမီႇ ၸူး ဢႃယု 54 ပီ ထုၵ်ႇလုၵ်ႈၸၢႆးၸဝ်ႈၵဝ်ႇ ၶႃႈႁႅမ်တၢႆသေ လၢၵ်ႈၵႂႃႇပႅတ်ႈဝႆႉတီႈၼႂ်းတူင်ႈၼႃး ဢၼ်မီး ၼႂ်းၵႄႈဝၢၼ်ႈႁူၺ်ႈ လူင်ႇလႄႈ ဝၢၼ်ႈၵုင်းမႃႉ ဢိူင်ႇလွႆလူင် ၸႄႈဝဵင်းၵဵင်းတုင်။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ