Tuesday, November 29, 2022

ၶူဝ်ႊဝိတ်ႉၶိုၼ်းၽႄႈ ဝဵင်းမိူင်းလႃး Lockdown မႃး ၶၢဝ်းတၢင်း လိူၼ်ပၢႆ ပႆႇၸၢင်ႈပိုတ်ႇ

Must read

ဝဵင်းမိူင်းလႃး ၼႃႈလိၼ်ၶိုၵ်ႉတွၼ်း မၢႆ 4 ၼၼ်ႉတၢင်းပဵၼ်ၶူဝ်ႊဝိတ်ႉလၢမ်းၽႄႈႁႅင်းလႄႈ လႆႈ  Lockdown ဝဵင်းမႃး  ၶၢဝ်းတၢင်း လိူၼ်ပၢႆယဝ်ႉ တေႃႇထိုင်ယၢမ်းလဵဝ် ပႆႇပိုတ်ႇ  ပၼ်ၶိုၼ်း ၵူၼ်းမိူင်းယၢပ်ႇၽိုတ်ႇတႃႇႁႃၵိၼ်လဵင်ႉတွင်ႉ။

Photo: strong Together – Mongla/ သိတ်းယႃႈၶႃႈၸိူဝ်ႉမႅင်းတၢင်းပဵၼ်ၶူဝ်ႊဝိတ်ႉ 19 ၼႂ်းၵိဝ်ႇၼႂ်းပွၵ်ႉ တီႈဝဵင်းမိူင်းလႃး

 ဝဵင်းမိူင်းလႃးၼႆႉ ၸဵမ်မိူဝ်ႈ ဝၼ်းတီႈ 16/9/2022  မႃး တေႃႇထိုင် ယၢမ်းလဵဝ်   ပိၵ်ႉဢိုတ်းမႃး ၶၢဝ်းတၢင်းလိူၼ်ပၢႆယဝ်ႉပႆႇၸၢင်ႈပိုတ်ႇ ပၼ်ၶိုၼ်း။   ၵူၼ်းဝၢၼ်ႈဢွၼ်ၵၼ်တိတ်းၸပ်း ၸိူဝ်ႉမႅင်း တၢင်းပဵၼ်ၶူဝ်ႊဝိတ်ႉ တင်းႁိူၼ်းတင်းယေး မၢင်ဝၢၼ်ႈ ပဵၼ်တင်းဝၢၼ်ႈ ၸိူဝ်းၼႆႉၵေႃႈ မီး ။

ၵူၼ်း  မိူင်းလႃး လၢတ်ႈတီႈၽူႈတွႆႇႁွၵ်ႈဝႃႈ – “လွင်ႈလွၵ်ႊတၢဝ်ႊၼႆႉလႅပ်ႈပႆႇပဵၼ်ပိုတ်ႇငၢႆႈငၢႆႈၶႃႈ။ ယၢမ်းလဵဝ် ၵူၼ်းမိူင်းၼႆႉ ၸပ်းၶူဝ်ႊဝိတ်ႉ ၼမ်ႁႅင်းၼႃႇယဝ်ႉ။ ပဵၼ်တင်းႁိူၼ်းတင်းယေး တင်းဝၢၼ်ႈ  ၶႃႈဢေႃႈ။ ဝၢၼ်ႈႁဝ်းၶႃႈၼႆႉ ပဵၼ်ဢမ်ႇယွမ်း 90 ၵေႃႉယဝ်ႉ။ ႁဝ်းၶႃႈ လႆႈၵၵ်းတူဝ်ယူႇႁိူၼ်းယေးၵၼ်သေ ပႂ်ႉယႃႈယႃ တီႈၼႂ်းလူင် (ၾၢႆႇၽွင်းငမ်း) ၸႅၵ်ႇပၼ် ၵူၺ်းၶႃႈ။ လွင်ႈၵူတ်ႇထတ်း ၼမ်ႉမုၵ်ႈ ၸိူဝ်းၼႆႉတႄႉ ၵူတ်ႇထတ်းယူႇ ၵူႈဝၼ်း။  ပိူင်ၾၢင်တၢင်းပဵၼ်တႄႉ ၵမ်ႈၼမ် တေပဵၼ် ႁူဝ်ၸဵပ်း၊ ၼၢဝ်၊ ၵူၼ်ႉမူၺ်ႈ ၸိူင်ႉၼႆ ”- ဝႃႈၼႆ။

ယၢမ်းလဵဝ် မီးၵူၼ်းပဵၼ်လၢႆၵေႃႉ တၢႆလၢႆၵေႃႉ ၸိူဝ်းၼႆႉတႄႉ ပႆႇလႆႈႁူႉသဵၼ်ႈမၢႆတႅတ်ႈတေႃး။ ၵူၼ်းဝၢၼ်ႈၵူၼ်းမိူင်း ၼႂ်းမိူင်းလႃးလၢတ်ႈဝႃႈ ၾၢႆႇၼိုင်ႈပဵၼ်ၽွင်းရႃႇသီႇလႅၵ်ႈလၢႆႈ ၶၢဝ်းပဵၼ်ဝတ်းပဵၼ်ဢၢၼ် လႄႈ ပေႃးၵူတ်ႇထတ်းတႄႉ  တိုၼ်းတေႁၼ်ၼမ်ယဝ်ႉဝႃႈၼႆ။

“  ဢမ်ႇလႆႈဢွၵ်ႇၵႂႃႇတၢင်းလႂ်လႄႈ လိူဝ် သေယူႇၼႂ်းႁိူၼ်းယေးၵၼ်ၵူၺ်း။ ၵူၼ်းတၢင်းၼွၵ်ႈၶဝ်ႈမႃး ဢမ်ႇလႆႈ ၵူၼ်းၼႂ်းဝၢၼ်ႈ ဢွၵ်ႇၵႂႃႇၵေႃႈ ဢမ်ႇလႆႈ ၸိူင်ႉၼႆၶႃႈ ဢေႃႈ။ ယဝ်ႉၵေႃႈ ၵူၼ်းၵႂႃႇႁဵတ်းၵၢၼ်တီႈပၢင်ၽၢႆႉပၢင်လွင်း ၸိူဝ်းၼႆႉၵေႃႈ ၵႂႃႇႁဵတ်းတီႈလႂ် တေလႆႈၵိၼ်ၼွၼ်းယူႇတီႈၼၼ်ႈ  ႁဵတ်း ၼၼ်”- ၵူၼ်းပိုၼ်ႉတီႈ မိူင်းလႃး သိုပ်ႇလၢတ်ႈၼႄၼင်ႇၼႆ။

ၽွင်းပိၵ်ႉဢိုတ်းဝဵင်းၼႆႉ  ၵူၼ်းဝၢၼ်ႈတႄႉ ၵမ်ႈၼမ် ထူပ်းတၢင်း ယၢပ်ႇ ၽိုတ်ႇႁႅင်း ။ ၸဝ်ႈသူၼ်  ၽၵ်းၶဵဝ် တႄႉ ဢမ်ႇၸၢင်ႈတေႃႉဢဝ်ၽၵ်းဢွၵ်ႇၶၢႆၸူးၵၢတ်ႇ။ ၵိၼ်ဢမ်ႇၶိုတ်း ၸႅၵ်ႇၼႂ်းဝၢၼ်ႈၵေႃႈဢမ်ႇမူတ်းသေ ဢဝ်ၽၵ်းၼဝ်ႈပႅတ်ႈၵေႃႈမီးၼမ်။

“ၼႂ်းလူင်တႄႉ မႃးသိုဝ်ႉဢဝ်ၵႂႃႇယူႇ ၽၵ်းၶဵဝ်ၼႆႉ ၵူၺ်းၵႃႈ မႃးသိုဝ်ႉဢမ်ႇၶိုတ်း ယွၼ်ႉၵူၼ်းဝၢၼ်ႈ ၽုၵ်ႇၼမ် ၊ ဢမ်ႇၸႂ်ႈဝႃႈ ဝၢၼ်ႈလဵဝ်ၵူၺ်း။ ၵွပ်ႈၼႆလႄႈ ၽၵ်းၶဵဝ်ၼႆႉ ၶၢႆဢမ်ႇၶိုတ်း ၵေႃႈပႃး၊ ယဝ်ႉၵေႃႈ ဢမ်ႇၸၢင်ႈတေႃႉၶၢႆတၢင်းၼွၵ်ႈဝၢၼ်ႈၵေႃႈပႃး လႄႈ ဢမ်ႇတၼ်းၵိၼ်ၶိုတ်းသေ လႆႈဢဝ်ၽၵ်းၶဵဝ် ၵႄႇပႅတ်ႈ ၸိူဝ်းၼႆႉၵေႃႈ မီးတင်းၼမ်”- ၵူၼ်းပိုၼ်ႉတီႈ မိူင်းလႃးလၢတ်ႈ။  

ၼႂ်းပီၼႆႉ ဝဵင်းမိူင်းလႃး လႆႈလွၵ်ႊတၢဝ်ႊဝဵင်း ယွၼ်ႉတၢင်းပဵၼ်ၶူဝ်ႊဝိတ်ႉၽႄႈလၢမ်းၼႆႉ 3 ပွၵ်ႈပႃးၼႆႉယဝ်ႉ လႆႈႁူႉၼင်ႇၼႆ။  

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- SHAN's Apps -spot_img

ၶၢဝ်ႇလိုၼ်းသုတ်း