(ၸဝ်ႈတူၼ်ၶူးၽူႈလႆႈႁပ်ႉၵၢၼ်ယုၵ်ႉယွင်ႈတီႈၸဝ်ႈမုၼ်ယႂ်ႇၶုၼ်ႁေႃၶမ်း)

ၸုမ်းသိုၵ်းမိူင်းလႃး NDAA လူႇတၢၼ်းၸုမ်ႈၶူးပၼ် ၸဝ်ႈသိလ်ထမ်းၶူးဝႃးဝုၼ်းၸုမ်ႉ ဢၼ်မီးၸိုဝ်ႈဝႃႈ “သူမ်ႊတဵတ်ႊပႃႇ” (ပွင်ႇဝႃႈ-ၸဝ်ႈၽူႈမီးၸၼ်ႉထၢၼ်ႈသုင်သုတ်း ဢၼ်ထုၵ်ႇၸဝ်ႈမုၼ်ယႂ်ႇၶုၼ်ႁေႃၶမ်းယုၵ်ႉယွင်ႈဢဝ်မုၼ်ဝႆႉ) ။

ပၢင်ယွင်ႈၵုင်ႇ မွပ်ႈဢၢပ်ႈၸုမ်ႈၶူး လူႇတၢၼ်းထိုင်ၸဝ်ႈသိၼ်ထမ်းၶူးဝႃးဝုၼ်းၸုမ်ႉၼႆႉ ၸတ်းႁဵတ်းၼႂ်းဝၼ်းတီႈ 8 ထိုင် ဝၼ်းတီႈ 12 လိူၼ် October ပီ 2025 တီႈဝဵင်းမိူင်းလႃး မီးၵူၼ်းမႃးဝႆႈသႃ ၵိုၼ်းၶွၼ်ႈ ။

ၸဝ်ႈတူၼ်ၶူးၺႃၼသီရိ ႁူဝ်ပဝ်ႈငဝ်ႈငုၼ်းသင်ၶၸိုင်ႈတႆးပွတ်းဢွၵ်ႇၶူင်းလၢတ်ႈတီႈၽူႈတွႆႇႁွၵ်ႈဝႃႈ-
“ဝၼ်းတီႈ 10 ၼႆႉ ၶူးဝႃးပေႃႈ ႁေႃးတြႃးတီႈမိူင်းလႃး။ ဝၼ်းတီႈ 11 ထိုင် 12 ၼႆႉၵေႃႈ ၸဝ်ႈတေမီးတီႈမိူင်းလႃး ။ ၸွမ်းၼင်ႇတၵ်ႉၵႃႇမွၵ်ႇဝႆႉ လႅပ်ႈတေပဵၼ်မိူဝ်းၼွၼ်းတီႈ ႁိူၼ်းၸဝ်ႈႁူဝ်ပဝ်ႈမိူင်းလႃး။ တေလုၵ်ႉတီႈႁိူၼ်းႁူဝ်ပဝ်ႈလူင်သေ မႃးတီႈပၢင်ယွင်ႈယေႃးတီႈထၢတ်ႈလူင်မိူင်းလႃး၊ ဝၼ်းတီႈ 12 ၼႆႉ မီးပၢင်ယုၵ်ႉယွင်ႈယေႃးထိုင်ၶူးဝႃးပေႃႈသိလ်ထမ်းဝုၼ်းၸုမ်ႉ တီႈမိူင်းလႃး။”

ၽွင်းၶူးဝႃးၸဝ်ႈယေႃးမုၼ်မႃးတီႈထၢတ်ႈလူင်မိူင်းလႃးၼၼ်ႉ ၼင်ႇႁိုဝ်ၵူၼ်းမိူင်းတေၸၢင်ႈပႂ်ႉဝႆႈသႃႁပ်ႉတွၼ်ႈၼၼ်ႉ ၸဝ်ႈၼႃႈတီႈ တီႈမိူင်းလႃး ၶပ်းၶိုင်ဝႆႉပၼ်သဵၼ်ႈတၢင်းလႄႈ ႁၢင်ႈၶိူင်ႈဝႆႉပၼ်- လႆႈႁူႉၼင်ႇၼႆ။

ဝၢႆးပၢင်ယွင်ႈၵုင်ႇမွပ်ႈဢၢပ်ႈၸုမ်းၶူးၼၼ်ႉ ၶူးဝႃးၸဝ်ႈ တေသိုပ်ႇႁေႃးထမ်းတီႈဝဵင်းၵဵင်းတုင်ယဝ်ႉ ၸင်ႇတေပွၵ်ႈၶိုၼ်း တီႈမိူင်းၽူင်း ဝဵင်းတႃႈၶီႈလဵၵ်း ။ ဝၢႆးၼၼ်ႉ တေမီးၶၢဝ်းတၢင်းတီႈလႂ်ထႅင်ႈၼႆၼၼ်ႉ ယင်းပႆႇႁူႉတႅတ်ႈတေႃး ဝႃႈၼႆ။

ၸဝ်ႈၶူးၺႃၼသီရိ ႁူဝ်ပဝ်ႈငဝ်ႈငုၼ်းသင်ၶၸိုင်ႈတႆးပွတ်းဢွၵ်ႇၶူင်းလၢတ်ႈထႅင်ႈဝႃႈ – “ပွၵ်ႈၼႆႉ ၶူးဝႃးပေႃႈ ဢွၵ်ႇထမ်ႈမႃးၵေႃႈ မၼ်းယူႇလီဢိူဝ်ႈ။ ဢမ်ႇပဵၼ်သင်သေ ၶႅမ်ႉလႅပ်ႈလီငၢမ်းယူႇ။ မိူဝ်ႈဝၼ်းၶူးဝႃးၸဝ်ႈဢွၵ်ႇထမ်ႈ ဝၼ်းတီႈ 7 ၼၼ်ႉ ၸဝ်ႈႁဝ်းဝႃႈ ဝၼ်းတီႈ 12 ၼႆႉ တေယူႇတီႈပၢင်ယွင်ႈယေႃးတီႈမိူင်းလႃးတေႃႇပေႃးၶမ်ႈ ။ ပေႃးဝၼ်းတီႈ 13 ၼႆႉတႄႉ တေသိုပ်ႇၶၢဝ်းတၢင်းၵႂႃႇတၢင်းဝဵင်းၵဵင်းတုင်။ ဝၢႆးၼၼ်ႉတေမဵတ်ႉတႃႇ ထမ်ႇမတြႃးပၼ် ၵူၼ်းမိူင်းသေ ပေႃးဝၼ်းတီႈ 14 တႄႉ တေယေႃးမုၼ်မိူဝ်းၶိုၼ်း မိူင်းၽူင်းၶိုၼ်းၼႆ – မီးဝႆႉမၢႆၶပ်ႉမၼ်းၸိူင်ႉၼႆ။ ၶူးဝႃးၸဝ်ႈတႄႉ လၢတ်ႈဝႆႉၶၢဝ်းတၢင်းတေႃႇပေႃးထိုင်မိူင်းၽူင်းၵူၺ်း ၶၢဝ်းတၢင်းၾၢႆႇၼႃႈတႄႉ ပေႃးထိုင်မိူင်းၽူင်းယဝ်ႉ ၸင်ႇတေလၢတ်ႈထႅင်ႈၼၼ်ႉၼႃႇ။”

ၸဝ်ႈသိလ်ထမ်းၶူးဝႃးဝုၼ်းၸုမ်ႉၼႆႉ ပဵၼ်ၸဝ်ႈဢၼ် ၶဝ်ႈတိုဝ်းၵမ်သိလ်ထမ်းၼႂ်းထမ်ႈ ၽွင်းၶၢဝ်းၼႂ်းဝႃႇသႃ ၸဵမ်မိူဝ်ႈၽွင်းဢႃယုၸဝ်ႈတိုၵ်ႉလဵၵ်ႉ။ တေႃႇမႃးထိုင်ပီၼႆႉ ၸဝ်ႈလႆႈၶဝ်ႈတိုဝ်းၵမ်သိလ်ထမ်းၼႂ်းထမ်ႈ ဢမ်ႇယွမ်း 40 ပွၵ်ႈယဝ်ႉ။

မိူဝ်ႈဝၼ်းတီႈ 31 လိူၼ်ၵျူႊလၢႆႊ ပီ 2022 ၼၼ်ႉၵေႃႈ ၶူးဝႃးၸဝ်ႈၸင်ႇႁႃဢွၵ်ႇထမ်ႈမိူင်းၵႅတ်ႇ ၸႄႈဝဵင်းမိူင်းသၢတ်ႇ – ဝၢႆးလင်တိုဝ်းၵမ်သိလ်ထမ်း 3 ပီ 3 လိူၼ် 3 ဝၼ်း ။ ဝၢႆးၼၼ်ႉပၢႆးယူႇလီၸဝ်ႈ ဢမ်ႇတဵမ်ထူၼ်ႈ လႄႈ ၵႆႉလႆႈၵႂႃႇယူတ်းယႃတူဝ် တီႈမိူင်းထႆးလၢႆပွၵ်ႈ။