ရူတ်ႉၵႃး ၸိူဝ်းတၢင်ႇဢဝ် တႅင်ၸမ်ႇပူႇ လႄႈ တႅင်ႁွမ် တၢင်းမိူင်းမၢၼ်ႈ၊ မိူင်းတႆး တေႃႉၵႂႃႇသူင်ႇၶၢႆတၢင်းမိူင်းၶႄႇၼၼ်ႉ ယၢမ်းလဵဝ် လႆႈၵႂႃႇၵိုတ်းၶမ်ဝႆႉ တီႈၵဵတ်ႉလၢၼ်ႇ တႃႈလေႃႉ မိူင်းလႃး ၼပ်ႉႁူဝ်ပၢၵ်ႇလမ်းယူႇ ၼႆယဝ်ႉ။

ၵူၼ်းႁပ်ႉသိုဝ်ႉတႅင်ၼႂ်းမိူင်းၶႄႇ ဢေႇလူင်းၵႂႃႇႁႅင်းသေဢမ်ႇၵႃး တီႈၵဵတ်ႉလၢၼ်ႇၾၢႆႇမိူင်းၶႄႇၵေႃႈ ၵူတ်ႇထတ်းရူတ်ႉၵႃး ၸိူဝ်းလုၵ်ႉတၢင်းမိူင်းမၢၼ်ႈၵႂႃႇႁၢဝ်ႈႁႅင်းသေ ၼိုင်ႈဝၼ်းလႂ် ပၼ်ၵႃးတၢင်ႇမၢၵ်ႇမႆႉမၢၵ်ႇတွၵ်ႈ ၶဝ်ႈၼႂ်းမိူင်းၶႄႇဢိတ်းဢီႈၵူၺ်း ဝႃႈၼႆ။

ၵူၼ်းၵႃႉၵုၼ်ႇၵေႃႉတေႃႉဢဝ်တႅင်မိူင်းတႆး၊ မိူင်းမၢၼ်ႈ ၵႂႃႇသူင်ႇၶၢႆမိူင်းၶႄႇ လၢတ်ႈၼႄဝႃႈ “ၶၢဝ်းတၢင်းလုၵ်ႉမိူင်းတႆး၊ မိူင်းမၢၼ်ႈၵႂႃႇတီႈလႅၼ်လိၼ်ၵူၺ်းၵေႃႈပေႃးႁိုင်ယူႇယဝ်ႉ။ မိူဝ်ႈလဵဝ် တႃႇတေဢဝ်ၵႃးၶဝ်ႈလႆႈၼႂ်းဝၢင်းၵဵတ်ႉတႃႈလေႃႉၼၼ်ႉၵေႃႈ လႆႈၸႅၼ်ႇထႅဝ်ၵၼ်ပႂ်ႉဝႆႉ။ ၵွပ်ႈၼၼ် မၢၵ်ႇမၢၵ်ႇတႅင်တႅင်ၵမ်ႈၽွင်ႈၼႆႉ သမ်ႉပေႃးၼဝ်ႈပႅတ်ႈလၢႆလၢႆ။ ဢမ်ႇမီးၵူၼ်းသိုဝ်ႉၼမ်ၵေႃႈပိူင်ၼိုင်ႈ ၼၼ်ႉၼႃႇ။ သုမ်းၼမ်ယူႇဢေႃႈပီၼႆႉ” ဝႃႈၼႆ။

မိူဝ်ႈပူၼ်ႉမႃး ၵၢၼ်တေႃႉသူင်ႇ မၢၵ်ႇမႆႉမၢၵ်ႇတွၵ်ႇ ၶဝ်ႈၼႂ်းမိူင်းၶႄႇၼႆႉ ၸဝ်ႈၵုၼ်ႇၵႃႉ လႄႈ ရူတ်ႉၵႃးၶဝ် ၸႂ်ႉသဵၼ်ႈတၢင်း မူႇၸေႊ- ၵျိၼ်ႊသၢၼ်းၵျေႃႉသေ ၼႃႈပၢင်ပွႆးပီမႂ်ႇၶႄႇၸိူင်ႉ ၼႆ ၶၢႆလီတေႉတေႉ။ ၵူၼ်းႁပ်ႉသိုဝ်ႉၵေႃႈၼမ်သေတႃႉ ယၢမ်းလဵဝ် တီႈပၢင်ၵၢတ်ႇႁပ်ႉသိုဝ်ႉလႄႈၵႃႉၶၢႆမၢၵ်ႇမႆႉ တႃႈလေႃႉ- မိူင်းလႃးၼႆႉ ဢမ်ႇမီးၵူၼ်းႁပ်ႉသိုဝ်ႉၼမ် ၼႆယဝ်ႉ။

ၵႃႈၸႂ်ႉၸၢႆႇ တႃႇၵႃးတၢင်ႇတႅင်ၼႆႉ ဢမ်ႇၼပ်ႉပႃးၵႃႈတႅင်ၸိုင် ၼိုင်ႈလမ်းမႅၼ်ႈယူႇ ငိုၼ်းၶႄႇ 3 မိုၼ်ႇယႂၢၼ်ႊ (ငိုၼ်းမၢၼ်ႈတူၵ်း 180 သႅၼ်ပျႃး) သေ ၵႃႈၶၼ်ဢၼ်ၸဝ်ႈၵၢၼ်မၢၵ်ႈမီးၶဝ် ႁပ်ႉသိုဝ်ႉတႅင်သမ်ႉ ပေႃးၶၢႆလုမ်း တင်းလမ်းၸိုင် ၵူၺ်းလႆႈငိုၼ်း 3 မိုၼ်ႇငိုၼ်းၶႄႇ ထိုင် 4 မိုၼ်ႇယႂၢၼ်ႊၸိူဝ်းၼႆႉၵူၺ်း ၼႆယဝ်ႉ။