ပၢင်တိုၵ်းသိုၵ်းသိူဝ်ၼႂ်းမိူင်း ပဵၼ်မႃး ပီယၢဝ်းၶၢဝ်းႁိုင် ဢမ်ႇယဝ်ႉဢမ်ႇတူဝ်ႈသေပွၵ်ႈ ၊ ၵူၼ်းပၢႆႈၽေးသိုၵ်း ၼႂ်းၸႄႈဝဵင်း ၵူတ့်ၶၢႆမိူင်းတႆး ပွတ်းႁွင်ႇ မႃးယူႇသဝ်းဝႆႉတီႈပၢင်သဝ်း ၵူၼ်းပၢႆႈၽေးသိုၵ်း ၶၢဝ်းတၢင်း 10 ပီ ပႆႇၸၢင်ႈပွၵ်ႈၶိုၼ်းႁိူၼ်း။ ယၢမ်းလဵဝ် လုၵ်ႈဢွၼ်ႇပၢႆႈၽေး သိုၵ်း ၵမ်ႈၼမ် ဢမ်ႇယူႇလီ။ ၸပ်းၶႆႈၼၢဝ် ထိုင်တီႈဢမ်ႇလုၵ့်လႆႈၵေႃႈမီး။ ၸုမ်းၸဝ်ႈတႃႇၼ ၵေႃႈ တႄႇလိူၼ် ၵျုၼ်ႇပူၼ့်မႃးၼႆ့ ယင့်လိုဝ်ႈလွင်ႈၵမ့်ထႅမ်ၵႂႃႇယဝ်ႉလႄႈ ၵူၼ်းပၢႆႈၽေးသိုၵ်း တိူဝ်းယၢပ်ႇၽိုတ်ႇၵိၼ်းၸႂ်မႃးလိူဝ်ၵဝ်ႇ။
တီႈသုၼ်ပၢႆႈၽေးသိုၵ်း ပၢင်ယၢင်းၶႃး ဝၢၼ်ႈမိူင်းၸီး ၸႄႈဝဵင်းၵူတ့်ၶၢႆၼႆ့ ၵူၼ်းပၢႆႈၽေးသိုၵ်း ဢွၼ်ၵၼ် ဢမ်ႇယူႇလီသေ ႁူပ့်တၢင်းယၢပ်ႇ ၶူဝ်းၶွင်ၵိၼ်ယႅမ့်ဝႆႉ။
ၵူၼ်းဢမ်ႇယူႇလီၼၼ့် ၵမ်ႈၼမ် ပဵၼ်လုၵ်ႈဢွၼ်ႇလႄႈ ၵူၼ်းထဝ်ႈ၊ ထိုင်တီႈဢမ်ႇလုၵ့်လႆႈ မီးပဵၼ် 6-7 ၵေႃ့ ၽူႈၸွႆႈထႅမ်ၵူၼ်းပၢႆႈၽေးသိုၵ်း လၢတ်ႈတီႈၽူႈတွႆႇႁွၵ်ႈ ၼင်ႇၼႆ ။
“လုၵ်ႈဢွၼ်ႇ ၸပ်းၼၢဝ်ဝႆ့ၼႆ့ တေမီးယူႇ 6 ၵေႃ့ 7 ၵေႃ့ၼႆ့ၶႃႈ။ ၸိူဝ်းၶဝ်ၼႆ့ ၼၢဝ်ႁႅင်းသေ ဢမ်ႇလုၵ့်လႆႈ။ ၵူၼ်းလူင် ဢၼ်ဢမ်ႇယူႇလီၵေႃႈ မီးထႅင်ႈဢေႃႈ။ တၢင်းသဵင်ႈ တေမီးယူႇ မွၵ်ႈ 9 ၵေႃ့ ။ ၶဝ်ၵေႃႈ ၶႂ်ႈပဵၼ်ၼႃႇႁႅင်းဝႆ့ ဢမ်ႇလုၵ့်လႆႈၶႃႈ။ လုၵ်ႈဢွၼ်ႇၼႆႉ ၵၢင်ဝၼ်း လႅၼ်ႈၵႂႃႇလႅၼ်ႈမႃး လႆႈယူႇ။ ၵူၺ်းၵႃႈ ပေႃးၵၢင်ၶမ်ႈၼႆ လူမ်းမႆႈၶိုၼ်ႈသေ ၼၢဝ်သၼ်ႇဢေႃႈ။ ”
ၸုမ်း WSA ဢၼ်ၵႆ့ၸွႆႈထႅမ်ပၼ် ၵူၼ်းပၢႆႈၽေးသိုၵ်း တီႈပၢင်သဝ်း ပၢင်ယၢင်းၶႃး ၼႆ့ၵေႃႈ တင်ႈတႄႇ လိူၼ်ၵျုၼ်ႇပူၼ့်မႃး ယင့်လိုဝ်ႈၵၢၼ်ၵမ့်ၸွႆႈဝႆႉလႄႈ တႃႇၵူၼ်းပၢႆႈၽေးသိုၵ်းတိူဝ်းယၢပ်ႇၽိုတ်ႇႁႅင်း ၼႆယဝ့်။
ယၢမ်းလဵဝ်ၼႆ့ ယၢပ်ႇၽိုတ်ႇၵိၼ်းၸႂ် ၶဝ်ႈၼမ့်တၢင်းၵိၼ် ဢိၵ်ႇပႃး တႃႇယူတ်းယႃ ၽူႈၸွႆႈထႅမ်ၵူၼ်းၵူၼ်းပၢႆႈၽေးသိုၵ်း သိုပ်ႇလၢတ်ႈ ၼင်ႇၼႆ ။ “မိူဝ်ႈလဵဝ် တီႈႁဝ်းၶႃႈၼႆ့ မၼ်းယၢပ်ႇၽိုတ်ႇၵိၼ်းၸႂ်ႁႅင်းၼႃႇယဝ့်။ တီႈႁဝ်းၶႃႈၼႆ့ မိူၼ်ၼင်ႇ တႃႇၵိၼ်ယႅမ့်ၵေႃႈယၢပ်ႇ။ ၼမ့်မီႇၼမ့်မၼ်းၸိူဝ်းၼႆ့ ယၢပ်ႇၼႃႇ။ ယဝ့်ၵေႃႈ ယွၼ့်ငဝ်းလၢႆးဝၢၼ်ႈမိူင်းဢမ်ႇၼိမ်သဝ်းသေ ၶၼ်ၵုၼ်ႇၸိူဝ်းၼႆ့ ၶိုၼ်ႈႁႅင်းၼႃႇ။ ၶၼ်ၶဝ်ႈသၢၼ်ၵေႃႈ ၶိုၼ်ႈ။ တီႈႁဝ်းၶႃႈယူႇသမ့် ပဵၼ်တီႈဝၢၼ်ႈၼွၵ်ႈၼႃးပၢင်ႇ ၵၢၼ် ဢမ်ႇပေႃးမီး။ ယွၼ့်ၼၼ် တီႈႁဝ်းၶႃႈၼႆ့ ယၢပ်ႇၽိုတ်ႇၵိၼ်းၸႂ်တႄ့ဢေႃႈ။ ၵူၼ်းပၢႆႈၽေးသိုၵ်းၵေႃႈ ၵႆ့ၵႆ့ပဵၼ် ဢမ်ႇယူႇလီၵၼ်ၼႃႇ။”
တီႈသုၼ်ပၢႆႈၽေးသိုၵ်းၼႆ့ ၵူၼ်းပၢႆႈၽေးသိုၵ်း ၼိုင်ႈဝၼ်းလႂ် လႆႈၵိၼ်ၶဝ်ႈ 2 တႃႇၵူၺ်း။ တႃႇလဵင့်လူၵူၼ်းပၢႆႈၽေးၼႆ့ လႆႈၸိုၵ်းဢဝ် ၶဝ်ႈသၢၼ်တီႈၵူၼ်းၶၢႆၶဝ်ႈသၢၼ်သေ ႁုင်လဵင့်ဝႆ့ၼႆ ၽူႈၸွႆႈထႅမ်ၵူၼ်းပၢႆႈၽေးသိုၵ်း လၢတ်ႈၼင်ႇၼႆ။
သုၼ်ပၢႆႈၽေးသိုၵ်း ပၢင်ယၢင်းၶႃးၼႆ့ ၵႆၵၼ်တင်းဝဵင်းၵူတ့်ၶၢႆ မွၵ်ႈ 48 လၵ်း၊ မီး 41မုင့်ႁေႃႁိူၼ်း ၊ ႁူဝ်ၼပ့်ၵူၼ်းပၢႆႈၽေးမီး 250 ပၢႆ ၊ ၼႂ်းၼၼ့် လုၵ်ႈဢွၼ်ႇ ဢၼ်ဢႃယု ပႃႈတႂ်ႈ 18 ၼႆ့ မီးၸမ် 140 ၵေႃ့ ဝႃႈၼႆ။
ၵူၼ်းပၢႆႈၽေးသိုၵ်း ၸိူဝ်းၼႆ့ ပၢႆႈမႃးၸဵမ်မိူဝ်ႈပီ 2012 ယွၼ့်ပၢင်တိုၵ်း သိုၵ်းၶၢင် တင်း သိုၵ်းမၢၼ်ႈ။ ယၢမ်းလဵဝ် ႁိုင် ၶၢဝ်းတၢင်း 10 ပီယဝ့် ။ ၼႂ်းၸႄႈဝဵင်းၵူတ့်ၶၢႆၼႆ့ သိုၵ်းမၢၼ်ႈယိုတ်းမိူင်းတင်း သိုၵ်းၶၢင် KIA ႁူမ်ႈပႃး PDF တိုၵ့်ၶဵင်ႈၶႅင်ၵၢၼ်သိုၵ်းတေႃႇၵၼ်ဝႆ့။