ၵူၼ်းၸၢႆးယူႇဝၢၼ်ႈတဵင်ႇၵုင်း( သိမ်ကုန်း ) ၸႄႈဝဵင်း ဝၢၼ်ႈငႂ်ႈ (ယႂႃႇငၢၼ်ႇ) ၸိုင်ႈတႆးပွတ်းၸၢၼ်း ထုၵ်ႇၸုမ်းဢမ်ႇႁူႉၾၢႆႇၶဝ်ႈၶႃႈႁႅမ်ထိုင်ၼႂ်းႁိူၼ်း  ။

ၼႂ်းဝၼ်းတီႈ 29/4/2026 ယၢမ်းၵၢင်ၼႂ် 1 မူင်း မီးၸုမ်းဢမ်ႇႁူႉၾၢႆႇဢဝ်ၵွင်ႈၶဝ်ႈယိုဝ်း လုင်းၺီႇလေး ဢႃယု 40 ပၢႆ တီႈႁိူၼ်း ။ လုင်းၺီႇလေး ထုၵ်ႇယိုဝ်းတီႈတွင်ႉမွၵ်ႈ 10 ၵမ်းၼႆႉ ဝႃႈၼႆ ။

ၼၢင်းယိင်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ ၵၢင်ၼႂ်ၸဝ်ႉမွၵ်ႈ 1 မူင်းၼႆႉ ၵူၼ်းၸုမ်းၼၼ်ႉၶဝ်ႈမႃးၼႂ်းႁိူၼ်းမၼ်းသေ  ၸႂ်ႉလုၵ်ႈလႄႈမေးမၼ်း ဢွၵ်ႇၵႂႃႇယူႇၼွၵ်ႈႁိူၼ်း။ ၸႂ်ႉၶဝ်ၼင်ႈ ၶုပ်ႉၶဝ်ႇဝႆႉ။  သေယဝ်ႉလႄႈ ယိုဝ်းၽူဝ်မၼ်းတၢႆၼႂ်းႁိူၼ်းၼႆ ၊ ပူၵ်ႉၼႃႈပူၵ်ႉတႃႇၶဝ်ႈမႃး ဢမ်ႇႁူႉဝႃႈပဵၼ်ၽႂ် ၵူၼ်းပိုၼ်ႉတီႈတႄႉဢွၼ်ၵၼ်လၢတ်ႈဝႃႈ မၼ်းပဵၼ် ပိဝ်ႇသေႃးထီးသိုၵ်းမၢၼ်ႈ ၵႆႉႁွင်ႉသိုၵ်းမၢၼ်ႈမႃးတီႉၺွပ်းၵူၼ်းပိုၼ်ႉတီႈၼႆ  ”- ဝႃႈၼႆ ။

ဝၢႆးလုင်းၺီႇလေး ထုၵ်ႇႁဵတ်းႁၢႆႉၶႃႈႁႅမ်ယဝ်ႉ သိုၵ်းမၢၼ်ႈၶဝ်ႈဢဝ်ႁူမ်ႇလူမ်ႈ ၵူတ်ႇထတ်းၵူၼ်းပိုၼ်ႉတီႈႁၢဝ်ႈႁႅင်း ႁဵတ်းႁႂ်ႈ ၵူၼ်းပိုၼ်ႉတီႈဢမ်ႇၸၢင်ႈၵႂႃႇမႃးထၢင်ႇႁၢင်ႈလွတ်ႈလႅဝ်းၼႆယဝ်ႉ ။

ၼၢင်းယိင်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ တီႈဝၢၼ်ႈႁဝ်း ထုၵ်ႇၸုမ်းဢမ်ႇႁူႉၾၢႆႇၶဝ်ႈႁႅမ်ထိုင်ႁိူၼ်းၼႆႉ ပဵၼ်သွင်ပွၵ်ႈယဝ်ႉ ပဵၼ်ၽႂ် ၸုမ်းလႂ်တႄႉ ဢမ်ႇႁူႉ ၊ ၸုမ်းၵေႃႈၼမ်ၼႃႇ ၊ ၸုမ်းလႂ်ၵေႃႈလႆႈၵူဝ် ၊ ၵူၼ်းၵေႃႈလႆႈၵူဝ် ယူႇဢမ်ႇမီးလွတ်ႈလႅဝ်းသေဢိတ်း”- ဝႃႈၼႆ ။

ၼႂ်းပိုၼ်ႉတီႈၼၼ်ႉ သိုၵ်းမၢၼ်ႈယိုတ်းမိူင်း ဢိၵ်ႇပႃး ၸုမ်းလုၵ်ႉၽိုၼ်ႉ တူင်ႉၼိုင်ၵႂႃႇမႃးဝႆႉ။ ပဵၼ်ၸုမ်းလႂ်ႁဵတ်းႁၢႆႉႁႅမ်တၢႆၵႂႃႇဢၼ်ဝႃႈၼၼ်ႉတႄႉ ပႆႇမီးၽႂ်ယိုၼ်ယၼ်။

တီႈၼႂ်းၸႄႈဝဵင်းဝၢၼ်ႈငႂ်ႈၼႆႉ ယွၼ်ႉၵူၼ်းမိူင်း တင်းၵၢင်ႉၵႄႇ ၵႆႉထုၵ်ႇၶႃႈႁႅမ်လႄႈ ၵူၼ်းမိူင်းဢမ်ႇႁတ်း ၵႂႃႇမႃးလွတ်ႈလႅဝ်း။ ဢမ်ႇႁတ်းႁဵတ်းၵၢင်ႉၵႄႇၽူႈယႂ်ႇၵူၼ်းလူင်ဝၢၼ်ႈ ၊ ဢမ်ႇႁတ်းဢွၼ်ၼမ်းႁဵတ်းလွင်ႈတူင်ႉၼိုင်ၼႂ်းဝၢၼ်ႈၼႂ်းသူၼ်သင်သေလွင်ႈ ။

ၾၢႆႇသိုၵ်းမၢၼ်ႈတႄႉ ၵႆႉတီႉၺွပ်းၵူၼ်းပိုၼ်ႉတီႈသေ လွၵ်ႈငိုတ်ႈၵူၼ်းပိုၼ်ႉတီႈ ႁႂ်ႈထွမ်ၵႂၢမ်း ပိဝ်ႇသေႃးထီး ဢၼ်ႁဵတ်းပၼ်ၶွၼ်ႉတဝ်ႉသိုၵ်းမၢၼ်ႈၼၼ်ႉသေတႃႉ ၵူၼ်းၸိူဝ်းၼၼ်ႉၵေႃႈ ၵႆႉထုၵ်ႇၶႃႈႁႅမ်တၢႆ လႄႈ ၵူၼ်းမိူင်းဢမ်ႇမီးလွင်ႈႁူမ်ႇလူမ်ႈ – ၵူၼ်းပိုၼ်ႉတီႈလၢတ်ႈ ။

တီႈဝၢၼ်ႈတဵင်ႇၵုင်း(သိမ်ကုန်း)ၼႆႉ ၼႂ်းၵၢင်လိူၼ် မၢတ်ႉၶျ် ၼၼ်ႉၵေႃႈ သိုၵ်းမၢၼ်ႈ တီႉၵူၼ်းဝၢၼ်ႈၵႂႃႇ 3 ၵေႃႉ ၼၢင်းယိင်း 2 ၵေႃႉလႄႈ ၵူၼ်းၸၢႆး ၵေႃႉၼိုင်ႈ၊ ထိုင်မႃး   ဝၼ်းတီႈ 22/3/2026  သိုၵ်းမၢၼ်ႈၶဝ်ႈ  တီႉၺွပ်း ၵူၼ်းၸၢႆးၼႂ်းဝၢၼ်ႈၵႂႃႇထႅင်ႈ   2 ၵေႃႉ တင်းမူတ်းပဵၼ်ၵႂႃႇ 5 ၵေႃႉ ထိုင်ဝၼ်းမိူဝ်ႈၼႆႉ ပႆႇပွႆႇပၼ်ၶိုၼ်း ၵမ်ႇလႆႈတင်းၵပ်းသိုပ်ႇတင်းၵူၼ်းတီႈႁိူၼ်းၼႆယဝ်ႉ ။

တီႈဝဵင်းဝၢၼ်ႈငႂ်ႈ ( ယႂႃႇငၢၼ်ႇ ) ၼႆႉ မီးၸုမ်းတပ်ႉသိုၵ်းထၼူႉ DPLA ၊ ၸုမ်းသိုၵ်းလုၵ်ႉၽိုၼ်ႉ ၵျဵဝ်းၽိဝ်ႇ ၊ ၸုမ်းသိုၵ်းထၼူႉ DSNDA ၶဝ်တူင်ႉၼိုင်ယူႇသဝ်းဝႆႉၵူၺ်းဢမ်ႇၵႃး ပျီႇတူႉ ၸိတ်ႉပဢူဝ်း PNO တင်း သိုၵ်းမၢၼ်ႈၵေႃႈ ၵႆႉထႅမ်ႁႅင်းသိုၵ်းၶဝ်ႈၼႂ်းဝၢၼ်ႈၼႂ်းဝဵင်း ။